Esekiɛli 29

1Isireliban yorun wɔ̃ɔ wɔkurusen suru wɔkurusen sɔ̃ɔ wɔkura yiruse sɔɔra Yinni Gusunɔ u Esekiɛli sɔ̃ɔwa u nɛɛ, 2tɔnun bii, a wunɛn wuswaa kisio Egibiti sunɔn mi gia kpa a wi, ka win temgibu kpuro sɔ̃ 3a nɛɛ, amɛniwa nɛ, Yinni Gusunɔ na gerua. Na nɛɛ, wee kon nùn wɔrima wi, wi u sãa nge karaku ge ga nanum mɔ ga kpĩ daa te ba mɔ̀ Niluɔ. Ma u gerumɔ u mɔ̀, daa te, ta sãawa wigiru domi wiya u tu kua. 4Kon kɔkɔnu sɔre win baa saburosu sɔɔ kpa n de daa ten swɛ̃ɛ yi n sɔre sɔre win koko wɔrukisɔ. Kpa n nùn gawa n yara daa ten min di ka swɛ̃ɛ yi sannu. 5Kpa n nùn sua n kɔ̃ gbaburɔ ka swɛ̃ɛ yi kpuro. U koo wɔriwa yakasɔ. Goo kun nùn seeyamɔ, goo kun maa nùn dɔbamɔ. Gbeeku yɛɛ ka gunɔsa su koo win goru di. 6Saa ye sɔɔra Egibitigibu kpuro ba koo gia ma nɛna na sãa Yinni Gusunɔ. Domi somi te u Isireliba kua ta sãawa nge kabaru, ta ǹ dam mɔ. 7Ba nùn tãsisi ma u bɔɔra ben nɔmaɔ u ben senu mɛɛra kua ma u dera ba suba. 8Yen sɔ̃, wee ye nɛ, Yinni Gusunɔ na gerumɔ. Na nɛɛ, kon de bu nùn wɔrima ka takobi kpa n de bu win tɔmbu ka yɛɛ kpuro go. 9Egibitin tem mu koo ko bansu kpa bu gia ma nɛna na sãa Yinni Gusunɔ. Domi yen sunɔ u nɛɛ, wiya u daa te ba mɔ̀ Nilu mɔ. Wiya u maa be tu kua. 10Yen sɔ̃, kon wi ka win daa te wɔrima. Kpa win tem mu ko bansu saa Migidolin di n ka da Asuaniɔ ka Etiopin tem nɔɔ bura yenɔ. 11Tɔnu kun maa sarɔ mi, mɛya yaa gaa kun maa sarɔ mi. Ya koo kowa wɔ̃ɔ weeru goo kun maa wãa mi. 12Wɔ̃ɔ weerun baa sɔɔ, kon de Egibitin tem ka yen wusu su ko bansu n kere bansu kpuro. Kon bu yarinasia n de ba n wãa bwese tukunun suunu sɔɔ. 13Amɛniwa nɛ, Yinni Gusunɔ na maa gerua. Na nɛɛ, wɔ̃ɔ wee ten biru, kon Egibitigibu mɛnnama bwese tukunun suunu sɔɔn di mi ba yarinɛ. 14Be, Egibitigii be ba raa yoru dimɔ kon ka bu wurama ben temɔ bera mi ba mɔ̀ Paturɔsi. Miya ba koo bandu swĩi te ta ǹ dam mɔ. 15Ta ko n sãawa ban te ta piiburu bo kpa ta kun dam mɔ bwese ni nu tie sɔɔ. Kon tu kawawa kpa tu ku raa ka bwese ni nu tie taare. 16Isireliba ba ǹ maa tu naanɛ mɔ̀. Ba ǹ maa dɔɔ ten mi, bu somiru kana ye ya ko n sãa ben durum. Saa ye sɔɔ, ba koo gia ma nɛna na Yinni Gusunɔ. 17Isireliban yorun wɔ̃ɔ yɛnda nɔɔbu ka yirusen suru gbiikoon tɔ̃ɔ gbiikiru sɔɔra Yinni Gusunɔ u nɛɛ, 18tɔnun bii, wee Nɛbukanɛsaa Babilonin sina boko u dera win tabu kowobu ba sɔm sɛ̃sɔginu kua bu ka Tiri kamia. Adama win tabu kowo be kpuro ba wii kpaki kua ma ben senu potikira. Ka mɛ, Babilonin sina bokon tii ka win tabu kowo be, ba ǹ arufaani gaa wa sɔmbu te sɔɔ, te ba kua. 19Yen sɔ̃na nɛ, Yinni Gusunɔ na nɛɛ, kon Babilonin sina boko Egibitin dukia kpuro wɛ̃. U koo ben yãnu gura kpa nu n sãa win tabu kowobun kɔsiaru. 20Kon nùn Egibiti wɛ̃wa ya n sãa win sɔmbu te u kuan kɔsiaru. Domi nɛna, wi ka win sɔm kowobu ba sɔmburu kua. 21Yen tɔ̃ɔ te, kon Isireliba dam kɛ̃ kpa n maa wunɛ tɔnun biin nɔɔ wukia a ka bu gari ko kpa bu gia ma nɛna na sãa Yinni Gusunɔ.

will be added

X\