Esekiɛli 27

1Esekiɛli u nɛɛ, Tiri, Yinni Gusunɔ u man sɔ̃ɔwa u nɛɛ, 2n nun gɔɔ wuri kuo, 3n nun sɔ̃ n nɛɛ, wunɛ Tiri a wãawa nim wɔ̃kun goorɔ ma a ka bwese dabinu tenkuru mɔ̀. Ye Yinni Gusunɔ u gerua wee. U nɛɛ, wunɛ Tiri, a ra raa nɛɛ, a sãawa wuu burɔ. 4Wunɛn dam mu wãawa sere nim wɔ̃kuɔ. Be ba nun bana, ba nun kuawa nge goo nimkuu burɔ. 5Ma ba wunɛn wasi kua ka dãa ye ba mɔ̀ sipɛrɛ ye ya wee Senirin di. Ma ba dãa ye ba mɔ̀ sɛduru ye ya wee Libanin di sua ba ka wunɛn beku sɔretiru kua. 6Ma ba wunɛn sɛsɛnu kua ka Basanin dãa gea ye ba mɔ̀ sɛɛni. Ma ba wunɛn kitanu kua ka dãa ye ba mɔ̀ buyi ye ba ka na saa Kitimun di ma ba nu suunu donnu mani. 7Ma ba beku ni ba koo nun karea kua Egibitiɔ ka wɛ̃ɛ damgii ba sɔma doke. Beku ni, nu sãawa nge wunɛn gidi bɔra. Ma ba beka ye ya ra wunɛn kianu wukiri kua ka wɛ̃ɛ gaaduragii, ka maa wɛ̃ɛ wunɔmgii yi yi wee saa tem bure te ba mɔ̀ Sipun di. 8Sidonigibu ka Aafadiba ba ra wunɛn sɛsɛnu bwie kpa wunɛgii be ba yɛ̃ru bo ba n bu kpare. 9Gebalin nɔman sɔm kowo be ba sɔma ye yɛ̃ sãa sãa, bera ba ra wunɛn wɔrusu kɔre. Be ba tenkuru mɔ̀ ka goo nimkusu kpuro, ba ra yɔ̃rewa wunɛn mi bu wunɛn kiaru dwe. 10Pɛɛsiba ka Ludiba ka Putigibun tii ba raa sãawa wunɛn tabu kowobu. Ba sãawa tabu durɔbu ka gem. Wunɛn miya ba ra ben tɛrɛnu ka ben sii furɔ kɔkɔnu bwɛ̃ kpa ye kpuro ya n nun bɛɛrɛ doke. 11Aafadiba ka wunɛn tiin tabu kowoba ba ra wunɛn gbãraru kɔ̃su bu ka sikerena. Tabu kowo damgibu gaba ba ra maa wunɛn kuku yenu kɔ̃su. Wunɛn gbãrarɔwa ba ra ben tɛrɛnu bwɛ̃ kpa nu n nun bɛɛrɛ doke. 12Tiri, wunɛn arumani bakan sɔ̃na Taasisigibu ba ra tenkuru nɛ wunɛn mi. Beya ba ra n ka kianu naamɔ wunɛn yaburɔ. Niya sii geesu, ka sii wɔ̃kusu, ka sii kpikisu, ka sii pɛɛrum. 13Wunɛ ka Gɛrɛkiba, ka Tubaligibu, ka Mɛsɛkigibun tii i ra tenkuru koosinɛ. Ba ra ka nun yobu ka gãa ni ba seka ka sii gandu kiaru dweeri. 14Togaamagibu ba ra maa dumi yi ba ra ka sɔmburu ko ka yi ba ra ka tabu de ka kɛtɛkunu dɔram nɛ wunɛn yaburɔ. 15Wunɛ ka Dedanigibu ka be ba wãa tem bureru gia kpuro i ra maa tenkuru koosinɛ. Ba ra nun wunɛn dibu kɔsie ka suunu donnu ka dãa ye ba mɔ̀ ebɛni. 16Wunɛ maa ka Sirigibu i ra tenkuru koosinɛ. Gãa dabina ba ra nun dweeri kpa bu ka nun kpee gobiginu naawa ni nu sãa nge yaka bekusu, ka beku gaaduraginu, ka beku ni ba sɔma dokea, ka beku ni ba kua ka wɛ̃ɛ damgii, ka nim wɔ̃kun kpee buranu, ka kpee gobigii ni nu sɔ̃ri. 17Wunɛ ka Yudaba ka Isireliba i ra tenkuru koosinɛ. Ba ra ka nun alikama ye ya wee Minitin di ka pɛ̃ɛ bwese bweseka ka tim ka gum ka sere gum sawaram kiaru dweeri. 18Wunɛ ka Damasigibu i ra tenkuru koosinɛ wunɛn arumani bakan sɔ̃. Ba ra ka nun tam mɛ mu wee Hɛlubonin di ka wɛ̃ɛ kpiki yi ba kua ka yãa sansu kiaru dweeri. 19Saa Usalin di, Yafanigibu ka Gɛrɛkiba ba ra ka kianu nɛ wunɛn yaburɔ. Niya, sisu ka dãa gaa ka sere dãa kiki nubu durorugisu kpa bu ka nun ye kpuro kiaru dweeri. 20Wunɛ ka Dedanigibu i ra tenkuru koosinɛ kpa bu nun gaari beka dɔre. 21Wunɛ ka Daarububa ka Kedaan wirugibu i tenkuru koosinamɔ. Ba ra nun kiaru dweeriwa ka yãa kpɛmminu ka yãa kinɛnu ka sere maa bonu. 22Wunɛ ka Seban tenkuba ka Ramagibu i ra tenkuru koosinɛ. Ba ra ka turare ye ya gea bo nɛ wunɛn yaburɔ ka kpee gobiginu bwese bweseka ka sere maa wura. 23Wunɛ ka Haranigibu ka Kannɛgibu ka Edɛnigibu ka Seban tenkuba ka Asirigibu ka Kilimadigibu i ra tenkuru koosinɛ. 24Yãa gobigina ba ra ka nun kiaru dweeri. Yãa ni ba ra ka nɛ wunɛn yaburɔ niya, yabe gaaduraginu ka yabe ni ba sɔma doke ka beka ye ba sɔma doke ka sere maa wɛ̃ɛ damgii yi ba tara. 25Taasisin goo nimkusa su ra n wunɛn kianu sɔɔwa. Ma wunɛn dukia ka wunɛn bɛɛrɛ ya kpɛ̃a nim wɔ̃kun bera mi gia. 26Goo tɛmɔbu ba ka nun bɔsu nim bakam sɔɔ. Adama woo gaga koo na saa sɔ̃ɔ yari yerun di gu nun kɔsuku nim wɔ̃ku gen suunu sɔɔ. 27Wunɛn dukia ka wunɛn kianu ka be ba ra wunɛn sɛsɛnu bwie ka be ba ra bu kpare ka be ba ra wunɛn wɔrusu kɔre ka wunɛn kia dɔrobu ka wunɛn tabu kowobu ka sere be kpuro be ba wãa wunɛn tii sɔɔ ba koo num nim wɔ̃kun sɔɔwɔ dɔma te a wɔruma. 28Be ba ra nun kpare ba koo kuuki ko kpa nim wɔ̃kun goonu nu diiri. 29Be ba wunɛn sɛsɛnu bwiamɔ ka be ba bu kpare, be kpuro ba koo sarawa wunɛn min di bu na tem diraɔ. 30Ba koo nɔɔgiru sua bu nun wuri kɔ̃si koosi kpa bu tii tua wisi winɔ bu bindi torom sɔɔ nuku sankiranun sɔ̃. 31Ba koo ben winu kɔni wunɛn sɔ̃, kpa bu saakiba dewe bu nun gɔɔ swĩiya nuku sankiranun sɔ̃. 32Ben nuku sankira ni sɔɔ, ba koo nun womu koosi bu nɛɛ, wunɛ Tiri, a ǹ ka wuu gagu weenɛ. Wee a kam kua nim wɔ̃kun suunu sɔɔ. 33Sanam mɛ a wunɛn tenkuru mɔ̀ tɔn dabira a ra diisie. Wunɛn dukia ka wunɛn kianun kpãarun sɔ̃, a dera sinamba kua dukiagibu. 34Adama a kɔsikira a wɔri nim wɔ̃kun sɔɔwɔ ma wunɛ ka wunɛn kianu ka wunɛn tɔn dabi te kpuro i nim diira. 35Be ba wãa tem burenu sɔɔ ba nuki sankire wunɛn sɔ̃. Ma ben sinambu ba bɛrum soore ba wuswaa burisinɛ. 36Tem tukum tenku be ba koo sara mi, biti koo bu mwa kpa bu nun wia koosi. Domi a kam kua. A ǹ kaa n maa wãa sere ka baadomma.

will be added

X\