Esekiɛli 25

1Yinni Gusunɔ u Esekiɛli sɔ̃ɔwa u nɛɛ, 2tɔnun bii, a wuswaa sĩiyɔ Amɔniban mi gia. 3Kpa a bu sɔ̃ a nɛɛ, bu nɛ, Yinni Gusunɔn gari swaa dakio bu nɔ. Yèn sɔ̃ ba yɛ̃ɛ sanam mɛ nɛn sãa yera disi duura ka yèn sɔ̃ Isireliba ba kam kua ma ba Yudaba yoru mwa ba ka doona, 4yen sɔ̃ tɛ̃, kon bu sɔ̃ɔ yari yerugibu nɔmu bɛria, kpa bu ben karaba gira ben tem suunu sɔɔ, kpa bu ben wãa yenu ko mi. Beya ba koo ben dãa marum di kpa bu ben sabenun bom nɔ. 5Kon de Raba yu ko yooyoosun kpara yeru kpa ben tem kpuro mu n sãa yãanun wãa yeru. Saa ye sɔɔra ba koo gia ma nɛna na sãa Yinni Gusunɔ. 6Wee ye nɛ, Yinni Gusunɔ na maa gerua. Na nɛɛ, yèn sɔ̃ ba taki kua, ba yɔ̃ɔka ma ba nuku dobu kua sanam mɛ Isireliba ba nɔni sɔ̃ɔre, 7yen sɔ̃na tɛ̃, kon bu nɔmu dɛmiɛ, kpa n bu bwesenu ganu nɔmu bɛria nge gbeeku yɛɛ. Kon bu kpeerasia bwesenun suunu sɔɔn di kpa bu kam ko mam mam. Saa ye sɔɔ, ba koo gia ma nɛna na sãa Yinni Gusunɔ. 8Wee ye Yinni Gusunɔ u gerua. U nɛɛ, yèn sɔ̃ Mɔabuba ka Edɔmuba ba nɛɛ, Isireliba ba sãawa tia ka bwese ni nu tie handunia ye sɔɔ, 9yen sɔ̃ tɛ̃, u koo wuu si wɔri si su dam mɔ mi, si su ǹ derimɔ bu Mɔabuban tem du. Wuu si, su koo wɔrukuwa tia tia baa ka si su buram bo nge Bɛti Yesimɔti ka Baali Mɛɔni ka Kiriataimu. 10U koo dewa sɔ̃ɔ yari yerugibu bu bu wɔri nge mɛ ba Amɔniba kua sere ba ǹ maa bu yaayamɔ sere ka baadommaɔ. 11Ba koo win siribu wa. Saa ye sɔɔra ba koo gia ma wiya u sãa Yinni Gusunɔ. 12Wee ye Yinni Gusunɔ u gerua. U nɛɛ, yèn sɔ̃ Edɔmuba ba tora ba Yudaba mɔru kɔsie, 13yen sɔ̃ tɛ̃, u koo bu nɔmu dɛmiɛ kpa u tɔmbu ka sabenu go. U koo de ben tem mu ko bansu saa Temanin di n ka da Dedaniɔ, kpa mɛn tɔmbu bu gbisuku tabu sɔɔ. 14U koo de win tɔmbu Isireliba bu bu mɔru kɔsie. Ba koo bu kua nge mɛ win mɔru ya kpãaru nɛ kpa bu gia ma ba ku ra nùn tore kam. Wi, Yinni Gusunɔwa u yeni gerua. 15Wee ye Yinni Gusunɔ u gerua. U nɛɛ, wee Filisitiba ba Isireliba mɔru kɔsie ka dam domi ba sãawa ben yibɛrɛba saa yellun di. 16Yen sɔ̃ tɛ̃, u koo bu win nɔmu dɛmiɛ kpa u be kpuro kpeerasia be, be ba wee Keretin di ba ka wãa nim wɔ̃kun goorɔ. 17U koo bu sɛɛyasia u mɔru kɔsia ka dam. Saa ye sɔɔra ba koo gia ma wiya u sãa Yinni Gusunɔ.

will be added

X\