Esekiɛli 22

1Yinni Gusunɔ u gerua u nɛɛ, 2wunɛ tɔnun bii, a sɔɔru koowo a ka Yerusalɛmugibu siri be ba sãa tɔn gowobu mi. A ku sika ko. A de bu bwisiku ben daa kɔ̃sa ye ba kuan sɔ̃. 3A bu sɔ̃ɔwɔ a nɛɛ, nɛ, Yinni Gusunɔwa na yeni gerua. Wee ba tɔmbu goomɔ. Yera ya koo de ben wuu Yerusalɛmun tii yu kam ko. Wee ba bwãarokunu sekumɔ ma ba ben tem disi doke. 4Tɔn be ba go mi, ben taarɛwa. Ba tii disi doke ye ba ka tii bwãarokunu kua. Nge mɛya ba ka ben wãarun tɔ̃nu kawa. Yen sɔ̃na kon de bwese tukunu nu bu yɛ̃ɛ. 5Be ba toma ka be ba wãa turuku ba koo bu yɛ̃ɛ yèn sɔ̃ ben wuu Yerusalɛmun yĩsira bɛɛrɛ bia, ma ya burisire. 6Wee be, Isireliban sinambu ba tɔmbu dam dɔremɔ ba goomɔ Yerusalɛmu ye sɔɔ. 7Ma yen tɔmbu ba ben mɛrobu ka ben tundobu gɛma. Gaba sɔbu dam dɔremɔ. Gaba maa gobekuba ka gɔminibu taki dimɔ. 8Tɔmbu ba ǹ nɛn sãa yeru daabu kĩ. Ba ǹ maa kĩ bu nɛn tɔ̃ɔ wɛ̃rarugiru mɛm nɔɔwa. 9Gaba wãa ba ben winsim kɔ̃sa gerumɔ bu ka nùn go. Mɛya maa tɔmbu ba ra bũnun dĩanu di gungunun wɔllɔ kpa ba n sekuru sari kookoosu mɔ̀. 10Gabu ba wãa ba ra ka ben tundon kurɔbu kpunɛ. Gabu ba ra mam tɔn kurɔbu gabe sanam mɛ ba yasa mɔ̀. 11Gaba maa wãa ba sakararu mɔ̀ ka ben bensim kurɔbu, ǹ kun mɛ ka ben biin kurɔ ǹ kun mɛ ka ben sesu tundo turosibu. 12Gaba maa wãa be ba ra wure bu gobi mwa bu ka tɔmbu go. Gaba wãa ba ra are bɛkɛ kasu bà n ben winsim gobi bɔkura. Gaba wãa be ba ben winsim taki dimɔ bu ka gobi ko. Ma ba nɛ, Yinni Gusunɔ duari mam mam. Nɛ, Yinni Gusunɔwa na yeni gerua. 13Wee kon bu so be, Yerusalɛmugibu ben gbɛna ka tɔn be ba gon sɔ̃. 14Nà n bu wɔri yen tɔ̃ɔ te, ba ǹ ko n maa dam ka mwia mɔ. Nɛ, Yinni Gusunɔwa na yeni gerua. Ya koo maa koora. 15Kon de bu yarina ba n wãa bwese tukunu sɔɔ. Kpa bu da baama. Nge mɛya kon ka ben disi yi wuna Yerusalɛmu ye sɔɔn di. 16Bwese ni nu tie, nu koo bu gɛm. Saa ye sɔɔ, ba koo gia ma nɛna na sãa Yinni Gusunɔ. 17Yen biru, Yinni Gusunɔ u maa nɛɛ, 18tɔnun bii, wee nɛn nɔni sɔɔ Isireliba ba sãa nge sii bisu ǹ kun mɛ nge sii gandu ǹ kun mɛ nge sii kpikisu ǹ kun mɛ nge pɛɛrum ǹ kun mɛ nge sii wɔ̃kusu si ba doke sɔwatia sɔɔ bu ka su sɔwa. Ba sãawa nge sii geesun bisu. 19Yen sɔ̃na nɛ, Yinni Gusunɔ na nɛɛ, kon bu mɛnna Yerusalɛmu sɔɔ. 20Nge mɛ ba ra sii geesu ka sii gandu ka sii wɔ̃kusu ka sii kpikisu ka sii pɛɛrum mɛnnɛ bu doke sɔwatia sɔɔ, kpa bu dɔ̃ɔ doke su ka yanda, nge mɛya kon bu mɛnna nɛn mɔru sɔɔ, kpa n bu deri bu yanda. 21Kon bu mɛnna sube teeru sɔɔ, kpa n bu kpɛ̃ɛ nɛn mɔrun sundu sɔɔ kpa bu yanda nge sisu. 22Nge mɛ sii geesu su ra yande dɔ̃ɔ sɔɔ, nge mɛya ben tii ba koo yanda Yerusalɛmun suunu sɔɔ. Saa yera ba koo gia ma na ka bu mɔru seewa. 23Yinni Gusunɔ u maa gerua u nɛɛ, 24tɔnun bii, a Yerusalɛmugibu sɔ̃ɔwɔ a nɛɛ, ben tem mu sãawa nge mi gura ku ra nɛ. Yen sɔ̃, kon de mu kam ko nɛn mɔrun saa sɔɔ. 25Ben sɔmɔbu ba sãawa nge gbee sinan si su kukirimɔ sanam mɛ su yaa wa su sɛ̃re. Domi ba tɔmbu goomɔ. Ma ba gabun gobi ka dukia wɔramɔ. Ma ba derimɔ kurɔ gɔminibu ba dabiamɔ. 26Ben yãku kowobu ba ku ra nɛn woodaba mɛm nɔɔwɛ. Ba ku ra maa nɛn sãa yeru bɛɛrɛ wɛ̃. Ba ku ra wunanɛ ye ya sãa nɛgia ka ye ya ǹ sãa nɛgia. Ba ku ra maa tɔmbu sɔ̃ɔsi ye ya dɛɛre ka ye ya ǹ dɛɛre. Ba ku ra mam nɛn tɔ̃ɔ wɛ̃rarugii te mɛm nɔɔwɛ. Ye kpuro sɔɔra ba ku ra man bɛɛrɛ wɛ̃. 27Ben sinambu ba sãawa nge gbeeku yɛɛ. Domi ba tɔmbu goomɔ bu wa bu ka ben binɛ suresia. 28Ben sɔmɔbu ba ye kpuro wukirimɔ nge gãa ni ba soo tɛɛni. Wee ba bu kãsi weesuginu ka gari weesugii sɔ̃ɔmɔ. Ba gerumɔ ba mɔ̀, gari yi ba tɔmbu sɔ̃ɔmɔ yi weewa nɛn min di. N deema nɛ, Yinni Gusunɔ na ǹ bu gãanu sɔ̃ɔwa. 29Tem mɛn tɔmbu ba dam dɔrenamɔ ba gbɛnimɔ ba sãarobu ka be ba ǹ dam mɔ taaremɔ. Ma ba sɔbu taki dimɔ ba gem biramɔ. 30Wee na goo kasu ben suunu sɔɔ u gbãraru bani u ka sikerena, ǹ kun mɛ u yɔ̃ra kururu mi, u ka tem mɛ yina n ku ka mu kam koosia. Adama na ǹ goo wa. 31Kon bu mɔru seesiwa. Na ǹ yɔ̃ramɔ sere nɛn mɔru yu ka kpe. Kon de bu bu ben daan are kɔsie. Nɛ, Yinni Gusunɔwa na yeni gerua.

will be added

X\