1 Yinni Gusunɔ u nɛɛ, a gɔɔ swĩiyɔ Isireliban sina bibun sɔ̃, a nɛɛ, 2 ben mɛro u sãawa nge gbee sunɔ niu geu ge ba yɛ̃ gbee sinansun suunu sɔɔ. Ga ra n gen binu kpunɛwa ga n nu diisiamɔ. 3 Ma ga gen buu teu seeya ga kua kpɛmbu. Ga gu yaa mwaabu sɔ̃ɔsi, ma ga tɔmbu sɛ̃sukum wɔri. 4 Ye sɔba gen gari nua, ma ba gu yina bɛria. Yera ba gu mwa ka kɔkɔru ba ka da Egibitiɔ. 5 Ma gen mɛro ga mara gu wurama. Adama ga tɛmanabu kpana, ga wa n ǹ koorɔ. Yen biruwa ga maa gen buu teu sua ga seeya ga dam kua, ga kua gbee sunɔ kpɛmbu. 6 Ma ga wɔri gbee sinansun wuuru sɔɔ. Ga yaa mwaabu mɛɛra. Ma ga tɔmbu sɛ̃sukum wɔri. 7 Ga tem min sina kpaaru wɔri ga sura. Ma mɛn wusu kua bansu. Ma tɔmbu ka ye ya wãa tem mɛ sɔɔ kpuro ya bɛrum soora gen kukiribun sɔ̃. 8 Ma bwesenu nu mɛnna nu ka gu tabu kua. Bwese ni, nu nawa yam kpuron di. Ba gu suura kua ga wɔri. 9 Ma ba gen wɛ̃ru yaba ba taabu doke ba gu sɔri diru garu sɔɔ. Yen biru ba ka gu da Babilonin sina bokon mi. Ma ba gu kɛnusi sere ba ǹ maa gen kukiribu nɔɔmɔ Isireliban guunɔ. 10 Yinni Gusunɔ u maa nɛɛ, ben mɛro u sãawa nge resɛm ye ba duura daa toran bɔkuɔ. Resɛm ye, ya ra ma. Ya maa kãasi yiba nim mɛ ya waamɔn sɔ̃. 11 Ya kãasi damgii mɔ yi ba koo kpĩ bu ka sina dɛki ko. Ya waabu wã, yen gunum ka yen kãasi dabinun sɔ̃. 12 Adama ba ye wuka ka mɔru ba sura temɔ. Woo ge ga wee sɔ̃ɔ yari yerun di, ga yen marum gberasia. Yen kãasi damgii yi, yi gbera yi dɔ̃ɔ mwaara. 13 Tɛ̃ ya gire tem gbebum sɔɔ mi gãanu ku ra kpi. 14 Ma dɔ̃ɔ u yara saa yen kãasin di u yen marum mwa. Ya ǹ maa kãasa damgia mɔ ye ya koo ko sina dɛka. Womu geni ga sãawa gɔɔ wuri. Geya ba ko n da ko bà n gɔɔ wuri mɔ̀.
