Esekiɛli 18

1Yinni Gusunɔ u gerua u nɛɛ, 2Esekiɛli, mban sɔ̃na Isireliba ba ra mɔn teni ko bu nɛɛ, baababa ba resɛm birenu di, ma ben bibun nɔsu yaaya. 3Adama nɛ, Yinni Gusunɔ, na bɛɛ sɔ̃ɔmɔ ma sere ka nɛn wãaru, i ǹ maa mɔn teni gerumɔ Isireliɔ. 4Geema, nɛna na baawuren wãaru nɛni, baaba ka bii. Yen sɔ̃, wi u tora wiya u koo gbi. 5Su tɛ̃ nɛɛ, goo u wãa u gea mɔ̀, win daa ya wã. 6U ku ra de gungunɔ u bũu sã. U ku ra maa bũu yãkunu di. U ku ra ka goon kurɔ mɛnnɛ. Mɛya u ku ra maa ka tɔn kurɔ mɛnnɛ sanam mɛ u yasa mɔ̀. 7U ku ra goo gbɛni. U ku ra maa goo sɔmburu koosie kam. U ra wi u win dibu nɛni win tɔruba wesie. U ra wi gɔ̃ɔra mɔ̀ dĩanu wɛ̃. Kpa u wi u tereru sĩimɔ yãnu wɛ̃. 8U ku ra tɔnu gobi bɔkure u nim doke. U ku ra n maa wãa weesun swaa sɔɔ. U ra siriwa dee dee, u baawure nùn win gem wɛ̃. 9U ra nɛn woodaba mɛm nɔɔwɛ mam mam. Tɔnu win bwesera nɛ, Yinni Gusunɔ na ra soku gemgii. Win wãara ta koo dakaa da. 10Su maa tɛ̃ nɛɛ, durɔ wi, u bii mɔ wi u ra tɔmbu wɔri u go, u ben yãnu gura, ǹ kun mɛ u ra daa kɔ̃sa gaa ko. 11N deema win baaba ku ra yen bweseru ko. Bii wi, u ra bũu yãkuru de gungunɔ. U ra ka gabun kurɔbu mɛnnɛ. 12U ra bwɛ̃ɛbwɛ̃ɛ sɔmburu koosie kam. U ra tɔmbu gbɛni. U ku ra be u tɔruba mwaari ye wesie. U ra bũnu sã, kpa u n kom bɛrɛtɛkɛ mɔ̀. 13U ra tɔmbu gobi bɔkure u nim doke. N weenɛ tɔnu win bweseru u n wãa? Aawo, u koo gbiwa. Domi u daa kɔ̃sa kua. Win yɛm mu koo wɔriwa win tii sɔɔ. 14Su tɛ̃ nɛɛ, bii wi, u seewa u mara. Ma win bii u seewa u win tundon toranu kpuro wa. Adama u ǹ win tundon yira ye swĩi. 15U ku ra bũu yãkunu de gungunɔ. U ku ra bũnu sã ni Isireliba ba sãamɔ. U ku ra ka goon kurɔ mɛnnɛ. 16U ku ra goo sɔmburu koosie kam. U ku ra be ba win dibu nɛni tɔruba mwaari. U ku ra gbɛni. U ra wi gɔ̃ɔra mɔ̀ dĩanu wɛ̃. Kpa u wi u tereru sĩimɔ yãnu wɛ̃. 17U ku ra n wãa weesun swaa sɔɔ. U ku ra tɔnu gobi bɔkure u nim doke. U ra nɛn woodaba mɛm nɔɔwɛ. Bii wi, u ǹ gbimɔ win tundon toranun sɔ̃. U ko n wãawa ka gem. 18Adama tundo wiya u koo gbi win toranun sɔ̃ domi u tɔmbu tɔ̃ya kua u gbɛna. 19I bikiamɔ i mɔ̀, mban sɔ̃na bii kun win tundon durum are sɔɔmɔ. Geema, bii kun ye sɔɔmɔ yèn sɔ̃ u gea kua. Ma u sĩa dee dee nɛn yira sɔɔ, u nɛn woodaba mɛm nɔɔwa mam mam. Yen sɔ̃na u ko n wãa. 20Wi u tora, wiya u koo gbi. Bibu ba ǹ ben baababan toranun are sɔɔmɔ. Mɛya baababa ba ǹ maa ben bibun toranun are sɔɔmɔ. Kon gemgii nùn win are wɛ̃ yèn sɔ̃ u kom gem kua. Kpa n maa tɔn kɔ̃so sɛɛyasia yèn sɔ̃ u kɔ̃sa kua. 21Tɔn kɔ̃so ù n win daa kɔ̃sa deri, ma u gem swĩi nge mɛ nɛn wooda ya gerua kpuro, u ǹ maa gbimɔ. 22Kon win toranu kpuro duari, kpa n de u n wãa gea ye u mɔ̀n sɔ̃. 23I tamaa nɛ, Yinni Gusunɔ na kĩ tɔn kɔ̃so u gbi? Aawo. Ye na kĩ, yera u gɔ̃ru gɔsia kpa u n wãa. 24Adama wi u gem deri, ma u daa kɔ̃sa mɔ̀ nge tɔn kɔ̃so, i tamaa u ko n wãa? Aawo. Kon win yellun daa gea ye duariwa kpa n de u gbi win daa kɔ̃sa ka win mɛm nɔɔ sarirun sɔ̃. 25Bɛɛ Isireliba, i mɔ̀, nɛn gere ye, ya ǹ sãa dee dee. I swaa dakio i nɔ. Nɛn gerewa ya ǹ sãa dee dee? Nge bɛɛya i saka saramɔ. 26Gemgii ù n gea deri, ma u kɔ̃sa mɔ̀, u koo gbiwa kɔ̃sa yen sɔ̃. 27Tɔn kɔ̃so ù n maa win daa kɔ̃sa deri, ma u daa gea mɔ̀, u win wãaru wɔramɔwa. 28U ko n wãa, domi u gia ma kɔ̃sa u raa mɔ̀, ma u ye deri. Ǹ n mɛn na, u ǹ maa gbimɔ. 29Bɛɛ Isireliba i mɔ̀, nɛn gere ya ǹ sãa dee dee. Adama n ǹ mɛ, bɛɛya i saka saramɔ. 30Yen sɔ̃, kon baawure siriwa nge mɛ win daa ya sãa. Ǹ n mɛn na, i bɛɛn daa kɔsio i kɔ̃sa deri. I ku de bɛɛn daa kɔ̃sa yu bɛɛ kam koosia. 31I bɛɛn daa kɔ̃sa derio kpa i bɛɛn gɔ̃run bwisikunu gɔsia. Mban sɔ̃na i ko i tii go. 32I yɛ̃ ma nɛ, Yinni Gusunɔ, na ǹ goon gɔɔ kĩ. Ǹ n mɛn na, i gɔ̃ru gɔsio kpa i wa i n wãa.

will be added

X\