Esekiɛli 14

1Sɔ̃ɔ teeru Isireliban guro gurobu gabu ba na ba Esekiɛli deema u ka bu bikiaru kua Gusunɔn mi. 2Yera Yinni Gusunɔ u nɛɛ, 3tɔnun bii, tɔn be, ba bũu sãamɔwa ben gɔ̃ruɔ, ma ba tii nu wɛ̃, ma nu dera ba wãa durum sɔɔ. Yera ba tamaa kon ben bikiaru wura? 4A bu sɔ̃ɔwɔ a nɛɛ, amɛniwa nɛ, Yinni Gusunɔ na gerua. Na nɛɛ, Isireli goo ù n tii wɛ̃ bũu sãaru sɔɔ, ma ta dera u toramɔ, ma u na nɛn sɔmɔ goon mi u ka nùn bikiaru kua nɛ, Yinni Gusunɔn mi, nɛn tiiwa kon yɛ̃ro wisi nge mɛ̀n nɔɔ win bũnu dabiru nɛ. 5Nɛn wisi biya bu koo de Isireliba bu bwisiku ben gɔ̃ruɔ be, be ba man yina ben bũu sãarun sɔ̃. 6Yen sɔ̃, a bu sɔ̃ɔwɔ a nɛɛ, nɛna na nɛɛ, bu gɔ̃ru gɔsio kpa bu ben bũnu deri ka maa kom kɔ̃sum mɛ ba mɔ̀, mɛ mu ǹ nɛ, Yinni Gusunɔ wɛ̃remɔ. 7Isireliban goo ǹ kun mɛ sɔɔ goo ben suunu sɔɔ ù n man deri u bũnu sãamɔ ma ta dera u toramɔ ma u na nɛn sɔmɔn mi u ka bikiaru ko nɛn mi, nɛ, Yinni Gusunɔn tiiwa kon nùn wisi. 8Kon yɛ̃ro wɔriwa n sɛɛyasia kpa u n sãa seeda ye ba ko n da ka mɔndu ko. Kon nùn wunawa nɛn tɔmbun suunu sɔɔn di, kpa i gia ma nɛna na sãa Yinni Gusunɔ. 9Nɛn sɔmɔ goo ù n wura durɔ wi, u nùn nɔni wɔ̃kua, ma u nùn bikiaru kua, nɛ, Yinni Gusunɔwa na dera u kua mɛ. Nɛn tiiwa kon sɔmɔ wi wuna nɛn tɔmbun suunu sɔɔn di. 10Sɔmɔ wi ka durɔ wi u bikiaru na mi, be kpurowa ba ko n sãa torobu. Ba koo maa ben tora nin are sɔbe. 11Nge mɛya be Isireliba ba ǹ maa tondamɔ nɛn swaan di. Ba ǹ maa ben tii disi dokemɔ ka ben tora dabi ni. Ba ko n sãawa nɛn tɔmbu kpa na n sãa ben Yinni. Nɛ, Yinni Gusunɔwa na yeni gerua. 12Yinni Gusunɔ u maa gerua u nɛɛ, 13tɔnun bii, su tɛ̃ nɛɛ, tem gam tɔmbu ba man mɛm nɔɔbu sariru kua. Ma na bu nɛn dam sɔ̃ɔsi na ben dĩanu kam koosia na bu gɔ̃ɔru kpɛ̃ɛ ba gbisukumɔ be ka ben yaa sabenɔ kpuro, 14baa tɔmbu ita beni Nɔwɛ ka Daniɛli ka Yoobu bà n wãa mi, ba ǹ kpɛ̃ bu tem mɛn tɔmbu kpuro faaba ko ben gem sɔ̃. Ben tii tɔnawa ben gem mu koo de bu faaba wa. Nɛ, Yinni Gusunɔwa na yeni gerua. 15Ǹ kun mɛ nà n dera gbeeku yɛɛ yi tem mɛ wɔri yi bu go kpuro kpa tem mɛ, mu ko bansu sere goo kun maa sarɔ mi, gbeeku yɛɛ yin sɔ̃, 16sere ka nɛn wãaru, baa tɔmbu ita be, bà n wãa tem mɛ sɔɔ, tem mɛgibu ba ǹ kpɛ̃ bu faaba wa. Tɔmbu ita be tɔnawa ba koo faaba wa, baa ben tiin bibu ba ǹ kpɛ̃ bu faaba wa. Ma tem mɛ, mu koo kowa bansu. 17Ǹ kun mɛ nà n dera ba tɔn be tabu wɔrima, ma ba bu kam koosia sere ka ben yaa sabenɔ, 18baa tɔmbu ita be, bà n wãa mi, be tɔnawa ba koo faaba wa. Sere ka nɛ, Yinni Gusunɔn wãaru, ba ǹ kpɛ̃ bu mam ben tiin bibu faaba ko. 19Ǹ kun mɛ nà n dera barara dua tem mɛ sɔɔ, ma ba gbisuka be ka ben yaa sabenɔ, 20baa Nɔwɛ ka Daniɛli ka Yoobu bà n wãa tem mɛ sɔɔ, tem mɛn tɔmbu ba ǹ kpɛ̃ bu faaba wa ben sɔ̃. Be ita ye tɔnawa ba koo faaba wa ben gem sɔ̃. Baa mam ben tiin bibu ba ǹ kpɛ̃ bu faaba ko ben gem sɔ̃. 21Yen biruwa Yinni Gusunɔ u nɛɛ, wee na Yerusalɛmu wahala baka nnɛ yeni kpɛ̃ɛ n ka yen tɔmbu ka ben yaa sabenu go. Yera tabu ka gɔ̃ɔru ka gbeeku yɛɛ gɔbi ka baranu. 22Adama gabu ba koo tiara kpa bu bu yara wuun di, kpa bu bɛɛ deema kpiki yeru mi. Saa ye sɔɔ, ì n ben daa ka ben kookoosu wa, biti kun maa bɛɛ mɔ̀ kɔ̃sa ye na Yerusalɛmu kuan sɔ̃. 23Ya koo bɛɛn nukuru yɛmiasia ì n ben daa ka ben kookoosu wa. Saa ye sɔɔ, i ko i gia ma n ǹ kam sɔɔ na bu wahala yeba kpɛ̃ɛ. Nɛ, Yinni Gusunɔwa na yeni gerua.

will be added

X\