Esekiɛli 13

1Yinni Gusunɔ u maa nɛɛ, 2tɔnun bii, a tɔn be gerusio be ba tii kua nɛn sɔmɔbu. A de bu swaa daki ye kon bu sɔ̃. 3Wee ye nɛ, Yinni Gusunɔ na bu sɔ̃ɔmɔ. Na nɛɛ, kɔ̃sa koo bu deema be, be ba sãa gari bakasu. Domi ben tiin bwisikuna ba swĩi ba ka gari gerumɔ, ba ǹ gãanu ganu waamɔ. 4Bɛɛ Isireliba bɛɛn sɔmɔbu ba sãawa nge gbeeku bɔ̃nu ni nu bɔsu bansɔ. 5Wee ba ǹ dere bu gbãrarun kuunu kɔre. Ba ǹ maa gbãraru banɛ tu ka bu ganɛ nɛ, Gusunɔn mɔrun saa sɔɔ. 6Wee ba kãsi weesuginu saarimɔ, ma ba gari gerumɔ yi yi ǹ sãa gem. Ba mɔ̀, wee nɛ, Yinni Gusunɔwa na bu ye kpuro wɛ̃. Adama na ǹ bu gɔre. Ma ba tamaa kon ben garin dam sirewa. 7Adama na nɛn sɔmɔ be sɔ̃ɔmɔ ma ben kãsinu nu sãawa ni ben tii ba seka. Ben gari yi maa sãawa weesu. Ba tamaa nɛn gariya ba tɔmbu sɔ̃ɔmɔ. N deema na ǹ mam ka bu gari koore. 8Yen sɔ̃ tɛ̃, kon bu wɔrima domi ba kãsinu seka ma ba weesu kparamɔ. Nɛ, Yinni Gusunɔwa na yeni gerumɔ. 9Kon bu nɛn dam sɔ̃ɔsi be, be ba weesu kparamɔ mi. Ba ǹ ayeru wasi nɛn tɔmbun suunu sɔɔ. Ba koo ben yĩsa go mi nɛn tɔmbun yĩsa yorua. Ba ǹ maa wurɔ ben temɔ. Nge mɛya ba koo ka gia ma nɛna na sãa Yinni Gusunɔ. 10Wee ba nɛn tɔmbu nɔni wɔ̃kumɔ ba mɔ̀, bɔri yɛnda wãa. Adama bɔri yɛndu garu sari. Nɛn tɔmba gani seeyamɔ. Ma sɔmɔ be, ba ye soo tɛɛnimɔ. 11Adama a be ba soo tɛɛnimɔ mi sɔ̃ɔwɔ a nɛɛ, gana ye, ya koo wɔruma. Guru baka ya koo nɛ ka kpenu sannu kpa woo bɔkɔ gu se. 12Gana ye, yà n wɔruma saa yera tɔmba koo bikia bu nɛɛ, mba soo yen arufaani ye ba tɛɛni mi. 13Yen sɔ̃, wee ye nɛ, Yinni Gusunɔ na gerumɔ. Na nɛɛ, kon de nɛn mɔru yu woo bɔkɔ seeya, kpa guru baka yu nɛ. Kpa guru kpenu nu nɛ ka dam nu gãanu kpuro go. 14Kon gana ye sura yu wɔruma temɔ, kpa yen kpɛɛkpɛɛku gu sɔ̃ɔsira. Ya koo bɛɛ wɔri kpa i gbisuku. Saa yera ba koo gia ma nɛna na sãa Yinni Gusunɔ. 15Nɛ, Yinni Gusunɔ kon nɛn mɔru yɔ̃suwa mam mam gana yen sɔ̃ ka be ba ye soo doken sɔ̃. Saa ye sɔɔ, ba koo gere bu nɛɛ, gana ye, ya wɔruma. Be ba raa ye soo doke, ben goo kun maa wãa! 16Sɔmɔ weesugii be, ba kpa be, be ba raa gari gerumɔ Yerusalɛmun sɔ̃, be, be ba ra n waamɔ kãsiru sɔɔ ma bɔri yɛnda wãa, adama bɔri yɛndu garu sari. Nɛ, Yinni Gusunɔwa na yeni gerua. 17Yinni Gusunɔ u maa nɛɛ, tɔnun bii, a Isireliban tɔn kurɔ be ba tii kua nɛn sɔmɔbu sɔ̃ɔwɔ a nɛɛ, 18bɔ̃ruroba ba sãa. Domi ba kĩasu gbinumɔ tɔmbun nɔm wĩinu sɔɔ nge bɔki ma ba tɔmbu kpuro yasi sɛ̃kemɔ wirɔ bukurobu ka bibɔ kpa bu wa ba n ka tɔn be taare. Ba kĩwa bu nɛn tɔmbun wãaru kpeesia kpa na n begiru berua. 19Wee ba ǹ man bɛɛrɛ wɛ̃ɛmɔ nɛn tɔmbun wuswaaɔ dĩa nɔm wɔɔnun sɔ̃. Ma ba tɔmbu goomɔ be n ǹ weenɛ bu go. Ma ba gabu deri be n weenɛ bu go. Mɛya ba ra nɛn tɔmbu weesu kue kpa ba n ben wee si swaa daki. 20Yen sɔ̃na nɛ, Yinni Gusunɔ na nɛɛ, kon bu wɔri ben kĩa sin sɔ̃, si ba ka tɔmbun wãaru mwɛɛrimɔ mi. Kon bu si mwaariwa n gɛ̃ɛku kpa n be ba raa mwa yakia. 21Kon ben yasi yi gɛ̃ɛku kpa n nɛn tɔmbu yakia ben nɔman di. Ba ǹ maa kpɛ̃ ba n bu mɔ. Ba koo gia ma nɛna na sãa Yinni Gusunɔ. 22Ben weesun sɔ̃, ba gemgibu nukuru sanka, be, be na ǹ daa kĩ n kɔ̃sa kua. Ba yina bu tɔn kɔ̃sobu kirɔ ko bu ka ben kom kɔ̃sum deri kpa bu ben wãaru yakia. 23Yen sɔ̃, ba ǹ maa kãsinu ka gari weesugii mɔ̀. Kon nɛn tɔmbu yakia ben nɔman di. Nge mɛya ba koo ka gia ma nɛna na sãa Yinni Gusunɔ.

will be added

X\