Esekiɛli 12

1Yinni Gusunɔ u Esekiɛli sɔ̃ɔwa u nɛɛ, 2tɔnun bii, wee a wãa mɛm nɔɔ sariban suunu sɔɔ. Ba nɔni mɔ adama ba ǹ kĩ bu ka yam wa. Ba swasu mɔ, adama ba ǹ kĩ bu ka gari nɔ yèn sɔ̃ ba bɔ. 3Yen sɔ̃, a sɔɔru koowo kpa a se a doona sɔ̃ɔ sɔɔ ben baawuren nɔni biru a da a n wãa gam. Sɔrɔkudo ba koo gia ma ba sãa bwese mɛm nɔɔ sariba. 4Yen biru Yinni Gusunɔ u nɛɛ, a wunɛn yãnu mɛnnɔ a yara wunɛn dirun di sɔ̃ɔ sɔɔ gbãara. Kpa a yari wuu gen min di yoka ben baawuren nɔni biru nge wi ba yoru mwa. 5Kpa a gana yaba ben nɔni biru a wunɛn yãnu yara min di. 6U maa nɛɛ, a yãa ni sɔɔwo ben nɔni biru kpa a ka nu yari wɔ̃kuru. Kpa a tii wɔ̃ke ka yasa a ku ka tem mɛ mɛɛri. Domi na kĩwa a n sãa yĩreru Isireliban sɔ̃. 7Ma u kua ye Yinni Gusunɔ u nùn sɔ̃ɔwa. U yara sɔ̃ɔ sɔɔ gbãara ka win sɔɔru nge wi ba yoru mwa. Yoka u da u gbãraru yaba ka nɔma u win yãa ni sua u yara wɔ̃kuru tɔmbun nɔni biru. 8Buru buru Yinni Gusunɔ u ka nùn gari kua u nɛɛ, 9Isireliba, mɛm nɔɔ sari be, bà n nun bikia ba nɛɛ, mba a mɔ̀ mi, 10a bu wisio a nɛɛ, Isireliban sunɔ wi u wãa Yerusalɛmuɔ mi, wiya ye a mɔ̀ ya ka yã, ka sere maa Isireliba kpuro be ba wãa mi. 11A sãawa yĩreru te ta sɔ̃ɔsimɔ ma ba koo yoru da tem gam. Ya koo maa koora. 12Sunɔ wi u wãa ben suunu sɔɔ u koo win yãnu gura wɔ̃kuru kpa u yari. Ba koo gbãraru yabawa bu ka yari min di. Kpa u tii wɔ̃ke u ku ka win tem wa. 13Nɛ, Yinni Gusunɔ kon nùn yina bɛria kpa u wɔri ye sɔɔ. Kon ka nùn da Babilonin temɔ. Adama u ǹ tem mɛ wasi. Miya u koo gbi. 14Win sina asakpɔbu ka win kɔ̃sobu ka win tabu kowobu be kpurowa kon yarinasia kpa n de bu bu takobi sɔkiri. 15Saa ye sɔɔra ba koo gia ma nɛna na sãa Yinni Gusunɔ, nà n bu yarinasia bwese tukunun suunu sɔɔ. 16Adama kon de gabu bu kisira tabun di ka gɔ̃ɔrun di ka bararun di kpa bu wa bu ka gere kɔ̃sa ye ba nɛ, Yinni Gusunɔ kua. Saa ye sɔɔ, ba koo gia ma nɛna na sãa Yinni Gusunɔ. 17Yinni Gusunɔ u maa nɛɛ, 18tɔnun bii, ka nandaba kaa wunɛn pɛ̃ɛ di kpa a n diirimɔ a n ka nim nɔrumɔ. 19Kpa a Isireliba sɔ̃ a nɛɛ, amɛniwa nɛ, Yinni Gusunɔ na gerua. Na nɛɛ, be, Yerusalɛmugibu ba koo ben dĩanu diwa ka bɛrum kpa bu nim nɔ ka nuku sankiranu. Domi ben tem mu kua bansu. Gãa ni nu wãa mi kpuro, nu koo kam kowa ben tɔn dam dɔrebun sɔ̃. 20Wuu si su tɔmbu dabi su koo kowa bansu, kpa tem mɛ kpuro mu kam ko. Saa ye sɔɔra Isireliba ba koo gia ma nɛna na sãa Yinni Gusunɔ. 21Yinni Gusunɔ u maa Esekiɛli sɔ̃ɔwa u nɛɛ, 22mban sɔ̃na Isireliba ba ra n mɔndu mɔ̀ ba n mɔ̀, wee tɔ̃ra dɛnyamɔ, adama kãsi nin gara kun kooramɔ. 23Yen sɔ̃, a bu sɔ̃ɔwɔ a nɛɛ, nɛ, Yinni Gusunɔ kon de mɔn te, tu kpe. Ba ǹ maa tu gerumɔ Isireliɔ. Adama a bu sɔ̃ɔwɔ a nɛɛ, tɔ̃ra turuku mɔ̀. Kãsi nin baatere ta koo koorawa. 24Domi nin garu sari te ta koo kam ko. Nɛn gari gɛɛ maa sari yi ba gerua bu ka bu nɔni wɔ̃ke Isireliɔ. 25Nɛ, Yinni Gusunɔ, ye na gerua kon ye ko. Ya koo koorawa ya ǹ tɛɛmɔ. Be, mɛm nɔɔ sariba, ka gem ben nɔni bira kon de gari yi, yi koora. 26Yinni Gusunɔ u maa nɛɛ, 27tɔnun bii, wee Isireliba ba nɛɛ, kãsi ni a wa mi, nu ǹ kooramɔ tɛ̃. Nu koo koorawa sere saa gaa. Yen sɔ̃, a bu sɔ̃ɔwɔ a nɛɛ, 28nɛ, Yinni Gusunɔ na nɛɛ, gari yi na gerua kpuro yi koo koorawa tɛ̃, ya ǹ tɛɛmɔ.

will be added

X\