Esekiɛli 11

1Yinni Gusunɔn Hunde u Esekiɛli sua ma u ka nùn da sãa yerun kɔnnɔwɔ ge ga wãa sɔ̃ɔ yari yeru gia. Kɔnnɔ gen miya u tɔmbu yɛnda nɔɔbu wa. Be sɔɔ, u Yaasania Asurin bii tuba ka Pelatia Bɛnayan bii. Be kpuro ba sãawa Isireliban wirugibu. 2Yinni Gusunɔ u nɛɛ, tɔnun bii, tɔn be a wa mi, ba sãawa be ba kɔ̃sa bwisikumɔ ma ba tɔmbu bwisi kɔ̃si kɛ̃mɔ Yerusalɛmuɔ. 3Ba mɔ̀, n ǹ mɔ tɛ̃ sa ko dinu bani. Domi Yerusalɛmu ya sãawa nge wekeru. Ma bɛsɛ yen tɔmbu sa sãa nge yaa ye ya wãa te sɔɔ. 4Yen sɔ̃, tɛ̃ tɔnun bii, a bu gerusio. 5Ma Yinni Gusunɔn Hunde u nùn yɔɔwa u nɛɛ, a bu sɔ̃ɔwɔ a nɛɛ, nɛ, Yinni Gusunɔ na yɛ̃ ye be Isireliba ba bwisikumɔ ka ye ba gerumɔ. 6Wee ba begibu goomɔ dabi dabinu wuu ge sɔɔ. Ma gonu yiba ben swɛɛ sɔɔ. 7Yen sɔ̃, begii be ba go mi, ba sãawa nge yaa. Ma wuu gen tii ga sãa nge wekeru. Adama be ba tie ba wasi, ba koo bu yarawa bu ka doona. 8Wee ba tabun bɛrum mɔ. Adama kon de taa bi, bu bu deema. Nɛ, Yinni Gusunɔwa na ye gerua. 9Kon de bu yari wuu gen di. Kpa n bu tɔn tukobu nɔmu bɛria. Nge mɛya kon ka bu sirisina. 10Tabu sɔɔra ba koo gbi. Kon bu siri be Isireliba, ben tem nɔɔ bura yerɔ. Saa ye sɔɔra ba koo gia ma nɛna na sãa Yinni Gusunɔ. 11Wuu ge, ga ǹ bu nɛnumɔ nge wekeru. Ba ǹ ko n maa sãa nge yaa te sɔɔ. Ben tem nɔɔ bura yerɔwa kon bu siri. 12Saa ye sɔɔ, ba koo gia ma nɛna na sãa Yinni Gusunɔ wìn gere ba ǹ mɛm nɔɔwɛ, ka wìn woodaba ba ǹ swĩi. Ma ba sere bwese tuku ni nu ka bu sikerenɛn gari swĩi. 13Sanam mɛ Esekiɛli u Yinni Gusunɔn gari yi gerumɔ, yera Pelatia Bɛnayan bii u kpuna u gu. Saa ye sɔɔra Esekiɛli u wuswaa tem girari u nɔɔgiru sua u nɛɛ, Yinni Gusunɔ, kaa dewa Isireli be ba tie bu gbisuku? 14Yinni Gusunɔ u nɛɛ, 15tɔnun bii, wee, be ba wãa Yerusalɛmuɔ ba Isireliba, wunɛn mɛro bisibu, ka be ba tie bwisi kɛ̃mɔ ba mɔ̀, bu yɔ̃ro mi ba yoru dimɔ mi, ba n ka Yinni Gusunɔ tonde, domi be, be ba wãa Yerusalɛmuɔ mi, beya ba tem mɛ wɛ̃. 16Adama a bu sɔ̃ɔwɔ a nɛɛ, baa mɛ na dera ba yarinɛ mi, ba wãa tem tukumɔ, sɔ̃ɔ teeru ko na n ka bu wãa nge mɛ na ra n wãa sãa yerɔ. 17Kpa n bu mɛnna n yara bwese nin suunu sɔɔn di mi ba yarinɛ mi, n bu Isireliban tem wɛ̃. 18Mɛya ba koo na kpa bu bũu ni kpuro wuna ni ba ra raa sã mi, ni nɛ, Yinni Gusunɔ na ǹ kĩ. 19Kon bu gɔ̃ru teu wɛ̃ kpa n bu bwisiku kpaanu wɛ̃. Kon ben gɔ̃ru ge ga raa bɔɔbu nge kperu mi wuna, kpa n bu gɔ̃ru kpɔɔ wɛ̃ ge ga du. 20Kpa bu ka nɛn gere mɛm nɔɔwa, bu nɛn woodaba swĩi. Ba ko n sãawa nɛn tɔmbu, kpa na n maa sãa Gusunɔ ben Yinni. 21Adama be ba yɔ̃rari ba ben kĩru swĩi ba da ba bũnu sãamɔ ni nɛ, Yinni Gusunɔ na ǹ kĩ mi, kon bu ben kookoosun are kɔsia. Nɛ, Yinni Gusunɔwa na yeni gerua. 22Yen biruwa wɔllun kɔ̃so be, ba kasi dɛria ba seewa ka ben uruu be sannu. Ma Yinni Gusunɔn yiikon girima ya sɔ̃ɔsire ben wɔllɔ. 23Ma win yiikon girima ye, ya seewa wuu suunun di ya da ya wãa guuru garun wɔllɔ, wuun sɔ̃ɔ yari yeru gia. 24Ma Gusunɔn Hunde u Esekiɛli sua kãsi te sɔɔ, u ka wurama Babiloniɔ mi Isireliba ba yoru dimɔ. Saa yera kãsi te u waamɔ mi, ta kpa. 25Ma u Isireli be ba yoru dimɔ mi, sɔ̃ɔwa kpuro ye Yinni Gusunɔ u dera u wa.

will be added

X\