Esekiɛli 10

1Esekiɛli u mɛɛra wɔllun kɔ̃sobun weenasii ben wɔllɔ. Ma u kpee gobigiru wa ta ka sina kitaru weenɛ. 2Ma Gusunɔ u durɔ wi u yãku kowon yãnu doke mi sɔ̃ɔwa u nɛɛ, a duo uruu ben baa sɔɔ, be ba wãa wɔllun kɔ̃so ben temɔ. Kpa a dɔ̃ɔ gɛ̃ɛ gure wunɛn nɔmaɔ wɔllun kɔ̃so ben suunu sɔɔn di kpa a da a dɔ̃ɔ gɛ̃ɛ yi wisi wuu ge sɔɔ. Yera Esekiɛli u wa durɔ wi, u da u dɔ̃ɔ gɛ̃ɛ yi sua. 3Sanam mɛ u tura sãa yee ten mi, wɔllun kɔ̃so be, ba yɔ̃ ten nɔm geu gia. Ma guru wiru ta dii te yiba. 4Ma Yinni Gusunɔn yiikon girima ya seewa wɔllun kɔ̃so ben wɔllun di ya da sãa yee ten kɔnnɔwɔ. Ma sãa yee te, ta wiisu yiba. Yera Yinni Gusunɔn yiikon giriman yam bururam sɔ̃ɔsira sere ka ten yaaraɔ. 5Ma wɔllun kɔ̃sobun kasenun wɔkinu nu nɔɔra sere sãa yee ten yaaraɔ. Ma n sãare nge Gusunɔ Dam kpurogiin nɔɔwa ga gari mɔ̀. 6Yera Yinni Gusunɔ u wi u yãku kowon yãnu sebua mi sɔ̃ɔwa u nɛɛ, a doo a dɔ̃ɔ sua uruu be sɔɔ, wɔllun kɔ̃so ben baa sɔɔ. Ma durɔ wi, u da uruu ben bɔkuɔ. 7Ma kɔ̃so ben turo u nɔma dɛmiɛ dɔ̃ɔ gia, wi u wãa ben suunu sɔɔ. Ma u ka ye dɔ̃ɔ gura u durɔ wi wɛ̃. Ma durɔ wi, u ka doona. 8Ma n sãare tɔnun nɔma yarima saa kɔ̃so ben kasan tem di. 9Ma Esekiɛli u maa uruu nnɛ wa, yen baayere ya wãa wɔllun kɔ̃so ben turon bɔkuɔ. Uruu yen baayere ya ballimɔwa nge kpee gobigiru. 10Ye kpuro ya weenɛwa ma n sãare tia wãa tian sɔɔwɔ. 11Ya koo kpĩ yu sĩ beri nnɛ kpuro ya kun tii sĩiyɛ. Ma ya dɔɔ mì gia wɔllun kɔ̃sobun wira wãa. 12Kɔ̃so ben wasi ka biru ka nɔma ka kasenu, ye kpuro ya nɔni mɔwa. Nge mɛya maa uruu nnɛ ye kpuro ya mɔ. 13Ma Esekiɛli u nua ba uruu be sokumɔ woo guna. 14Wuswaa nnɛwa wɔllun kɔ̃so ben baawure u mɔ. Wuswaa gbiikaa ya ka Gusunɔn gɔradogia weenɛ. Yiruse ya ka tɔnugia weenɛ. Itase ya ka gbee sunɔgia weenɛ. Nnɛse maa ya ka gunɔ bakerugia weenɛ. 15Ma wɔllun kɔ̃so be, ba yɔ̃ɔwa wɔllɔ. Ba sãare nge hunde koni ye u wa Kebarin daarun bɔkuɔ. 16Bà n swaa wɔri, uruu be, ba ra n maa swaa wɔriwa. Bà n seewa bu ka yɔ̃, uruu be, ba ku ra bu deri. 17Bà n yɔ̃ra, uruu ben tii ba ra yɔ̃rewa. Bà n yɔ̃ɔwa ba ra ka bu yɔ̃wa. Domi hunde koni beya, ba uruu be gawe. 18Yera Yinni Gusunɔn yiikon girima ya doona dii kɔnnɔ gen min di ma ya na ya sina wɔllun kɔ̃so be sɔɔ. 19Yera Esekiɛli u wa kɔ̃so be, ba ben kasi dɛria ba seewa ba yɔ̃ɔwa ka uruu be. Ma ba da ba yɔ̃ra sãa yerun kɔnnɔwɔ ge ga wãa sɔ̃ɔ yari yeru gia. Ma Gusunɔ Isireliban Yinnin yiikon girima ya ballimɔ ben wɔllɔ. 20Hunde koni ben bwesera Gusunɔ u dera u raa wa Kebariɔ. Ma u gia ma wɔllun kɔ̃soba. 21Ben baawure u wuswaa nnɛ mɔ ka kasenu nnɛ. Ma ba nɔma mɔ nge tɔnugia ya wãa ben kasan temɔ. 22Ben wuswɛɛ yi, yi ka hunde koni ye u wa Kebariɔ migii weenɛ. Ben baawure u dɔɔwa deedeeru mi u wuswaa kisi.

will be added

X\