1 Ma Yinni Gusunɔ u Mɔwisi sɔ̃ɔwa u nɛɛ, a Aroni sɔ̃ u doo u win nɔmu dɛmia u dɛka ye tĩi daanu ka yɛrusun wɔllɔ kpa surenu nu gasirima nu na nu n wãa Egibitin tem sɔɔ. 2 Yera Aroni u win nɔma dɛmia Egibitin daanu gia, ma surenu nu gasirima nu Egibitin tem wukiri. 3 Adama Egibiti sunɔn sɔro be, ba maa kua mɛ, ka ben dobo dobo. Ba dera surenu nu gasirima Egibitin temɔ. 4 Ma Egibiti sunɔ u Mɔwisi ka Aroni soka u nɛɛ, i Yinni Gusunɔ kanɔ u sure ni doonasia nɛ ka nɛn tɔmbun min di, kpa n de tɔn be, bu doona bu nùn yãkuru kua. 5 Sanam mɛya Mɔwisi u Egibiti sunɔ sɔ̃ɔwa u nɛɛ, na wunɛn gere mara, a man sɔ̃ saa yerà dim dim kon Yinni Gusunɔ kana wunɛ ka wunɛn tɔmbu ka wunɛn bwãabun sɔ̃, u ka de sure ni, nu tonda bɛɛ ka bɛɛn yɛnusun di, kpa nu kun maa tie ma n kun mɔ daa bakaru sɔɔ. 6 U wisa u nɛɛ, sia. Ma Mɔwisi u nɛɛ, n koo koora mɛ, kpa a gia ma goo sari wi u sãa nge Gusunɔ bɛsɛn Yinni. 7 Sure ni, nu koo ka nun tonda nu gɛɛra wunɛn bwãabu ka wunɛn tɔmbu ka bɛɛn yɛnusun di. Daa bakaru tɔna sɔɔra nu ko nu n tie. 8 Yen biru Mɔwisi ka Aroni ba yara Egibiti sunɔn min di. Ma Mɔwisi u Yinni Gusunɔ nɔɔgiru sue u sure ni gira ni u Egibiti sunɔ wisi mi. 9 Ma Yinni Gusunɔ u kua nge mɛ Mɔwisi u bikia. Yera sure ni, nu gbisuka diaɔ ka yɛnu yaariɔ ka gbeaɔ. 10 Ba nu gura ba mɛnna mɛnna. Ma nin nubura yiba tem mɛ sɔɔ. 11 Ye Egibiti sunɔ u wa ma wahala ya dwiiya yera u kpam win gɔ̃ru bɔbiasia. U ǹ maa Mɔwisi ka Aroni swaa daki, nge mɛ Yinni Gusunɔ u raa gerua. 12 Yen biru Yinni Gusunɔ u Mɔwisi sɔ̃ɔwa u nɛɛ, u Aroni sɔ̃ɔwɔ u win dɛka suo u tem so, kpa tua yu gɔsia gaanikunu Egibitin tem kpuro sɔɔ. 13 Ma ba kua nge mɛ. Tua kpuro ya gɔsia gaanikunu tem mɛ kpuro sɔɔ. Gaanikuu ni, nu dua tɔmbu ka yaa sabenu sɔɔ. 14 Ma sɔrobu ba dobo dobo kua bu ka maa gaanikunu ko. Adama ba kpana. Gaanikuu ni, nu wãawa baama. 15 Yera sɔro be, ba Egibiti sunɔ sɔ̃ɔwa ba nɛɛ, Gusunɔn tiin dama mini. Adama ka mɛ, Egibiti sunɔn gɔ̃ru ga bɔɔbu. U ǹ Mɔwisi ka Aronin gari swaa daki nge mɛ Yinni Gusunɔ u raa gerua. 16 Yen biru Yinni Gusunɔ u maa Mɔwisi sɔ̃ɔwa u nɛɛ, a seewo buru buru yellu a da a ka Egibiti sunɔ yinna sanam mɛ u dɔɔ daarɔ, kpa a nùn sɔ̃ a nɛɛ, amɛniwa nɛ Yinni Gusunɔ na gerua. U de nɛn tɔmbu bu da bu man sã. 17 Ù n maa yina nɛn tɔmbu bu doona kon nùn gbabu swɛ̃ɛ surema yi yi koo wi ka win bwãabu ka win tɔmbu kuni. Egibitigibun yɛnusu kpurowa su ko n gbabu swɛ̃ɛ yiba kpa yi tem wukiri. 18 Adama dɔma te, na ǹ derimɔ gbabu swɛ̃ɛ yi da Gosɛniɔ mi nɛn tɔmba wãa, kpa u gia ma nɛ, Yinni Gusunɔ na wãa tem mɛ sɔɔ. 19 Kon nɛn tɔmbu ka win tɔmbu wunana. Siawa yĩre te, ta koo sɔ̃ɔsira. 20 Yinni Gusunɔ u kua nge mɛ. Gbabu swɛ̃ɛ wuuru ta Egibiti sunɔ ka win bwãabun yɛnusu wɔri. Ma Egibitin tem kpuro mu sankira gbabu swɛ̃ɛ yin saabu. 21 Yera Egibiti sunɔ u Mɔwisi ka Aroni sokusia u nɛɛ, i doo i bɛɛn Yinni yãku te kua tem mɛ sɔɔ, i ku yari. 22 Adama Mɔwisi u wisa u nɛɛ, n ǹ koorɔ mɛ domi bɛsɛn yãkunu ko n sãa taarɛ Egibitigibun nɔni sɔɔ. Sà n maa yãku taarɛginu kua ben nɔni biru, ba ǹ koo sun kpenu kasuku? 23 Yen sɔ̃, sa ko dawa gbaburɔ mi n toma nge sɔ̃ɔ itan sanum saka su ka Gusunɔ bɛsɛn Yinni yãkuru kua, nge mɛ u sun sɔ̃ɔwa su ko. 24 Egibiti sunɔ u nɛɛ, kon de i da i Gusunɔ bɛɛn Yinni yãkuru kua gbaburɔ, adama i ku tonda. Yen sɔ̃, i kanaru koowo nɛn sɔ̃. 25 Ma Mɔwisi u nùn wisa u nɛɛ, wee, na doonɔ wunɛn min di, n ka Yinni Gusunɔ kana wunɛn sɔ̃. Sia gbabu swɛ̃ɛ yi, yi koo doona wunɛ ka wunɛn bwãabu ka wunɛn tɔmbun min di. Adama a ku maa sun yaakoru ko a yina su da su Gusunɔ bɛsɛn Yinni yãkuru kua. 26 Yera Mɔwisi u yara Egibiti sunɔn min di, u da u Yinni Gusunɔ suuru kana. 27 Ma Yinni Gusunɔ u kua nge mɛ Mɔwisi u nùn bikia. Gbabu swɛ̃ɛ yi, yi tonda Egibiti sunɔ ka win bwãabu ka win tɔmbun min di. Yi ǹ maa tie mi, baa tia. 28 Adama ka mɛ kpuro, Egibiti sunɔn gɔ̃ru ga bɔbia kpam maa, ma u yina tɔn be, bu doona.
