Yaribu 7

1Yinni Gusunɔ u Mɔwisi sɔ̃ɔwa u nɛɛ, wee, na nun kua nɛn kɔsire Egibiti sunɔn sɔ̃. Wunɛn mɔɔ Aroni u ko n maa sãa wunɛn gari gero. 2Wuna kaa nùn sɔ̃ ye na nun sɔ̃ɔmɔ kpuro. Wiya u koo maa Egibiti sunɔ sɔ̃, kpa u de Isireliba bu doona win tem di. 3- 4Kon de Egibiti sunɔn gɔ̃ru gu bɔbia sere u ǹ bɛɛ swaa dakimɔ, baa mɛ kon yĩre nanumgii dabinu ko win temɔ. Yen sɔ̃, na kon nùn nɛn dam sɔ̃ɔsi n win tɔmbu wahala doke, kpa n nɛn tɔmbu Isireliba yara win tem di, ba n sɔka sãa swɛɛ swɛɛ nge tabu kowobu. 5Sanam mɛ na nɛn dam sɔ̃ɔsi tem mi, ma na Isireliba yara min di, sanam mɛya Egibitigiba koo gia ma nɛna Yinni Gusunɔ. 6Ma Mɔwisi ka Aroni ba kua mam mam nge mɛ Yinni Gusunɔ u bu sɔ̃ɔwa. 7Sanam mɛ ba ka Egibiti sunɔ gari yiba mɔ̀, Mɔwisi u mɔwa wɔ̃ɔ wɛnɛ, ma Aroni u mɔ wɔ̃ɔ wɛnɛ ka ita. 8Yen biru Yinni Gusunɔ u Mɔwisi ka Aroni sɔ̃ɔwa u nɛɛ, 9Egibiti sunɔ ù n bɛɛ sɔ̃ɔwa u nɛɛ, i nùn yĩreru kuo te ta sɔ̃ɔsi ma nɛna na bɛɛ gɔrima, saa ye sɔɔra wunɛ Mɔwisi kaa Aroni sɔ̃ u win dɛka suo u ye kɔ̃ sunɔ win wuswaaɔ. Ya koo gɔsia waa. 10Ma ba seewa ba da Egibiti sunɔn mi, ba kua ye Yinni Gusunɔ u bu sɔ̃ɔwa. Aroni u win dɛka ye kɔ̃ sunɔ wi ka win bwãabun wuswaaɔ. Ma ya gɔsia waa. 11- 12Yera Egibiti sunɔ u win bwisigibu ka win timgibu ka win sɔrobu soka. Ben baawure u dobo dobo kua, u win dɛka kɔ̃ ma ya gɔsia waa. Adama Aronigia ya begii mwɛɛki. 13Ka mɛ, Egibiti sunɔn gɔ̃ru ga bɔbia, u ǹ maa Mɔwisi ka Aronin gere swaa daki, nge mɛ Yinni Gusunɔ u raa gerua. 14Yinni Gusunɔ u kpam Mɔwisi sɔ̃ɔwa u nɛɛ, Egibiti sunɔn gɔ̃ru ga bɔbia. U yina tɔn be, bu doona. 15Wee u koo da daarɔ buru buru yellu. A doo a ka nùn yinna daarun goorɔ kpa a n dɛka ye nɛni, ye ya raa gɔsia waa mi. 16Kpa a nùn sɔ̃ a nɛɛ, nɛ Gusunɔ Heberuban Yinniwa na nun gɔrima win mi. U de nɛn tɔmbu bu da bu man sã gbaburɔ. Na wa ma sere ka tɛ̃ u ǹ gari yi swaa sue. 17Yèn sɔ̃ u nɛɛ, u ǹ man yɛ̃, yen sɔ̃na na nɛɛ, amɛniwa u koo ka man gia, nɛ wi na ra n wãa. A daa ten nim soowo ka dɛka ye a nɛni mi, kpa n nim mɛ gɔsia yɛm. 18Swɛ̃ɛ yi yi wãa daa te sɔɔ, kpa yi gbi, kpa daa ten nim mu sankira sere Egibitigibu bu kpana bu mu nɔ. 19Yera Yinni Gusunɔ u Mɔwisi sɔ̃ɔwa u nɛɛ, a Aroni sɔ̃ɔwɔ u win dɛka suo u ye tĩi Egibitin nim kpuron wɔllɔ mɛ mu wãa daanɔ ka yɛrusɔ ka sere kotosɔ ka wekenɔ. Mi nim mu wãa kpuro gesi mu koo gɔsiawa yɛm, kpa yɛm mu n wãa Egibitin tem kpuro sɔɔ. 20Ma Mɔwisi ka Aroni ba kua nge mɛ Yinni Gusunɔ u bu sɔ̃ɔwa. Aroni u win dɛka ye sua, ma u daa ten nim so Egibiti sunɔ ka win bwãabun wuswaaɔ. Ma mu gɔsia yɛm. 21Swɛ̃ɛ yi yi wãa daa te sɔɔ, yi gu. Ma daa ten nim mu sankira. Egibitigiba kpana bu mu nɔ. Ma nim mɛ mu wãa tem mɛ kpuro sɔɔ mu kua yɛm. 22Adama Egibitin sɔrobu ba maa kua mɛ ka ben dobo dobo. Ye Egibiti sunɔ u wa mɛ, ma win gɔ̃ru ga bɔbia, u ǹ Mɔwisi ka Aronin gari swaa daki nge mɛ Yinni Gusunɔ u raa gerua. 23Egibiti sunɔ u gɔsira win yɛnuɔ. Gari yi, yi ǹ mam nùn nande. 24Ma Egibitigibu kpuro ba tem gba gba daa ten goorɔ bu ka nim wa bu nɔ, domi ba ǹ kpɛ̃ bu daa ten nim nɔ. 25Ma daa ten nim mɛ, mu gɔsire yɛm n ka kua sɔ̃ɔ nɔɔba yiru saa dɔma tèn di Yinni Gusunɔ u dera ba mu so. 26Yen biru Yinni Gusunɔ u kpam Mɔwisi sɔ̃ɔwa u nɛɛ, a doo Egibiti sunɔn mi, a nùn sɔ̃ a nɛɛ, nɛ Yinni Gusunɔ na nɛɛ, u de nɛn tɔmbu bu da bu man sã. 27Ù n maa yina u bu kara bu doona, kon de surenu yibu nu wahala doke win tem sɔɔ kpuro. 28Surenu koo marura daa baka ten di, kpa nu gasirima sere win yɛnuɔ ka win dii sɔɔwɔ ka win kpinu wɔllɔ n ka da win bwãabu ka win tɔmbun diaɔ. Nu koo mam du sere doo koo yenɔ ka sonɔ. 29Sure ni, nu ko nu n kabirimɔ kpa nu win tii ka win tɔmbu ka win bwãabu makiri.

will be added

X\