Yaribu 6

1Yinni Gusunɔ u Mɔwisi sɔ̃ɔwa u nɛɛ, tɛ̃ kaa wa ye kon Egibiti sunɔ kua. Kon nùn tilasi ko u ka bu yɔ̃su bu doona. U koo mam bu girawa win tem di. 2Ma Gusunɔ u kpam ka Mɔwisi gari kua u nɛɛ, nɛna Wi u ra n wãa. 3Na Aburahamu ka Isaki ka Yakɔbu kure na ka bu gari kua. Ba maa gia ma nɛna na sãa Gusunɔ Dam kpurogii. Adama ba ǹ tuba ma nɛn yĩsira Wi u ra n wãa. 4Na maa ka bu arukawani bɔkua ma kon bu Kananin tem wɛ̃ mu ko begim mɛ̀ sɔɔ ba sina nge sɔbu. 5Na Isireliban weeweenu nua mi ba yoru dimɔ Egibitigibun mi, na maa nɛn arukawani ye yaaye. 6Yen sɔ̃, a Isireliba sɔ̃ɔwɔ a nɛɛ, nɛna Wi u ra n wãa, na kon maa bu wɔra saa wahala ye Egibitigiba bu koosiamɔn di. Kon bu yakia ben yorun di, kpa n nɛn dam sɔ̃ɔsi n Egibitigibu wahala doke, kpa n nɛn tɔmbu faaba ko. 7Kon bu mwa bu ko nɛn tɔmbu, kpa n ko ben Yinni, kpa bu gia ma nɛna Wi u ra n wãa, na maa sãawa ben Yinni nɛ wi na bu yakiamɔ ben yoo sɔma ye Egibitigiba bu koosiamɔn di. 8Na kon bu duusia tem mɛ sɔɔ, mɛ na Aburahamu ka Isaki ka Yakɔbu nɔɔ mwɛɛru kua na nɛɛ, kon bu wɛ̃ ba n mɔ. Nɛ wi na ra n wãa nɛna na gerua mɛ. 9Yera Mɔwisi u da u Isireliba gari yi sɔ̃ɔwa. Adama ba ǹ nùn swaa daki, domi ben yoo sɔm sɛ̃sɔgii ni, nu kpɛ̃a sere ba mwia kpanamɔ. 10Ma Yinni Gusunɔ u Mɔwisi sɔ̃ɔwa u nɛɛ, 11a seewo a da a Egibiti sunɔ sɔ̃ u be de Isireliba bu doona win tem di. 12Ma Mɔwisi u Yinni Gusunɔ wisa u nɛɛ, wee Isireliba ba ǹ nɛn gari swaa daki. Amɔna Egibiti sunɔ u koo ka man swaa daki. Na ǹ daa nun sɔ̃ɔwa ma gari gerubu ra n ka man sɛ̃? 13Yen biru Yinni Gusunɔ u Mɔwisi ka Aroni wooda wɛ̃ ye ba koo Isireliba ka Egibiti sunɔ sɔ̃ kpa bu ka Isireliba yara Egibitin di. 14Isirelin bii gbiikoo wi ba mɔ̀ Rubɛni, win bibun yĩsa wee, Enɔku ka Paalu ka Hɛsironi ka Kaami. Ben min diya Rubɛnin bwese kɛri marura. 15Be ba maa sãa Simɛɔba, beya Yɛmuɛli ka Yamini ka Ohadi ka Yakini ka Sokaa ka Sɔɔlu wìn mɛro sãa Kananigii. Ben min diya Simɛɔn bwese kɛri marura. 16Be ba maa sãa Lefin bibu, beya Gɛɛsɔni ka Kehati ka Mɛrari. Ben min diya Lefin bwese kɛri maa marura. Ben baaba Lefi wi, u kuawa wɔ̃ɔ wunaa weeru ita sari u sere gu. 17Ma Gɛɛsɔni u seewa u bii tɔn durɔbu yiru mara. Beya Libini ka Simɛi. Ma ba marura ba kua Gɛɛsɔnin bweseru. 18Be ba maa sãa Kehatiba, beya Amuramu ka Yisehari ka Heboroni ka Usiɛli. Ma ben baaba Kehati wi, u kua wɔ̃ɔ wunaa teeru ka wɔkura ita u sere kpuna u gu. 19Be ba maa sãa Mɛrariba, beya Makili ka Musi. Beni kpurowa ba kua Lefin bwese kɛri. 20Amuramu u win tiɔ Yokebɛdi sua kurɔ. Wiya u ka Aroni ka Mɔwisi mara. Amuramu wi, u kuawa wɔ̃ɔ wunaa weeru ita sari u sere kpuna u gu. 21Be ba maa sãa Yiseharin bibu, beya Kore ka Nɛfɛgi ka Sikiri. 22Be ba maa sãa Usiɛlin bibu, beya Mikali ka Elisafani ka Sitiri. 23Aroni u Eliseba, Abinadabun bii sua kurɔ. Kurɔ wi, u sãawa Nasonin sesu. Ma u ka Aroni bibu mara. Bera Nadabu ka Abihu ka Eleasaa ka Itamaa. 24Be ba maa sãa Koren bibu, beya Asiri ka Ɛlikana ka Abiasafu. Ben min diya Koren bwesera marura. 25Ma Eleasaa, Aronin bii wi, u Putiɛlin bii wɔndia turo sua kurɔ. U ka nùn bii tɔn durɔ mara. Bii win yĩsira Finɛɛsi. Be sa wa mi kpuro, beya ba sãa Lefin bwese kɛrin wirugibu. 26Be sɔɔra Yinni Gusunɔ u Mɔwisi ka Aroni gɔsa bu ka Isireliba yara saa Egibitin di. U nɛɛ, bà n yariɔ bu de ba n swĩinɛ bweseru ka bweseru ba n sɔka sãa swɛɛ swɛɛ. 27Ma Mɔwisi wi ka Aroni wi, ba wura ba da ba Egibitin sina boko wi kana u de Isireliba bu yari win tem di. 28Sanam mɛ Yinni Gusunɔ u ka Mɔwisi gari kua Egibitiɔ, 29u nùn sɔ̃ɔwa u nɛɛ, nɛna Wi u ra n wãa. A Egibiti sunɔ sɔ̃ɔwɔ kpuro ye na nun sɔ̃ɔmɔ mini. 30Ma Mɔwisi u Yinni Gusunɔ wisa u nɛɛ, wee, gari gerubu ra n ka man sɛ̃. Egibiti sunɔ u koo wura u man swaa daki?

will be added

X\