Yaribu 5

1Yen biru Mɔwisi ka Aroni ba seewa ba da Egibiti sunɔn mi ba nɛɛ, amɛniwa Isireliban Yinni wi ba mɔ̀ Wi u ra n wãa, u gerua. U nɛɛ, a de win tɔmbu bu da gbaburɔ bu sãaru ko. 2Ma Egibiti sunɔ u nɛɛ, wara ba mɔ̀ Wi u ra n wãa, n ka sere nùn mɛm nɔɔwa, n de bɛɛ Isireliba i doona. Na ǹ nùn yɛ̃. Na ǹ maa derimɔ i doona. 3Yera ba nɛɛ, bɛsɛ Heberuban Yinniwa u sun kure u ka sun gari kua. Yen sɔ̃, a de su da gbaburɔ nge sɔ̃ɔ itan sanum saka su ka nùn yãkuru kua, kpa u ku raa sun bara bakaru kpɛ̃ɛ su gbi, ǹ kun mɛ u de bu sun go tabu sɔɔ. 4Ma Egibiti sunɔ u bu sɔ̃ɔwa u nɛɛ, wunɛ Mɔwisi ka Aroni, mban sɔ̃na i tɔn be sɔmburu yɔ̃rasia. I doo i bɛɛn sɔma ko. 5Wee, ye tɔn be, ba marura ba dabia tɛ̃ tem mɛni sɔɔ, yera i kĩ i ben sɔmburu yɔ̃rasia? 6Dɔma teya Egibiti sunɔ u wigii be ba tɔn be kpare sɔma ye sɔɔ, ka Isireliban swaa gbiobu sɔ̃ɔwa u nɛɛ, 7i ku ra maa tɔn be taka nɔɔ wɛ̃ nge yellu bu ka birikiba ko. I de ben tii bu da bu taka nɔɔ kasu. 8Ka mɛ, i ku ben birikiban geeru kawa mɛ ba ra raa ko yellu. Domi yikura ta bu mɔ̀. Yen sɔ̃na ba weeweenu mɔ̀ ba mɔ̀, bu da bu ben Yinni yãkuru kua. 9I de tɔn ben sɔmburu tu sɛ̃sɔ sosi, kpa ba n tu mɔ̀. Sanam mɛ, ba ǹ koo maa weesu swaa daki. 10Ma be ba tɔn be kpare sɔma ye sɔɔ mi, ka Isireliban swaa gbiobu ba na ba bu sɔ̃ɔwa ba nɛɛ, amɛniwa Egibiti sunɔ u gerua. U nɛɛ, u ǹ maa bɛɛ taka nɔɔ wɛ̃ɛmɔ. 11Ǹ n mɛn na, i doo i bɛɛn taka nɔɔ kasu mi i ko wa. Adama ka mɛ, sa ǹ gãanu kawamɔ bɛɛn sɔma sɔɔ. 12Ma tɔn be, ba yarina baama Egibitin tem sɔɔ, ba yakasu kasu bu ka taka nɔɔ ko. 13Be ba bu kpare sɔma ye sɔɔ, ba bu baasi ba mɔ̀, i bɛɛn sɔma yibio tɔ̃ru baatere nge mɛ i ra raa ko, sanam mɛ ba bɛɛ taka nɔɔ wɛ̃ɛmɔ. 14Ma ba Isireliban swaa gbio be Egibiti sunɔn tɔmba wuna soomɔ ba bu bikiamɔ, mban sɔ̃na i ǹ bɛɛn birikiban geeru yibie gĩa ka gisɔ nge mɛ i ra raa ko. 15Sanam mɛ sɔɔra Isireliban swaa gbio be, ba da ba Egibiti sunɔ wuri koosimɔ ba mɔ̀, mba n kua, yinni, a ka sun yenin bweseru kuammɛ. 16Ba ku ra maa sun taka nɔɔ wɛ̃. Kpa ba n mɔ̀ su birikiba muro. Yen biru sà kun kue, kpa ba n sun soomɔ. N sere deema, wunɛn tɔmbun taarɛwa. 17Ma Egibiti sunɔ u bu wisa u nɛɛ, yikurobu bɛɛ, i ǹ garu kobu kĩ. Yen sɔ̃na i gerumɔ, n de i da i Yinni Gusunɔ yãkuru kua. 18I doo tɛ̃n tɛ̃ ge i bɛɛn sɔmburu ko. Goo kun maa bɛɛ taka nɔɔ wɛ̃ɛmɔ. Adama birikiban gee tee tera i ko n muramɔ mi. 19Isireliban swaa gbio be, ba wa ma ben wahala ya sosimɔwa domi ba nɛɛ, bu ku raa ben birikiban geeru kawe. Tɔ̃ru baatere ka ten sɔmbura. 20Ye tɔn be, ba yarima Egibiti sunɔn min di, ba Mɔwisi ka Aroni deema ba yɔ̃ ba bu mara. 21Yera ba bu sɔ̃ɔwa ba nɛɛ, Yinni Gusunɔ u bɛɛ waamɔ. U koo maa bɛɛ siri. Bɛɛya i sun tusiru kasua Egibiti sunɔ ka win tɔmbun mi. Wee, i takobi doke ben nɔmuɔ bu ka sun go. 22Ma Mɔwisi u wura Yinni Gusunɔn mi, u nɛɛ, Yinni, mba n dera a tɔn be kɔ̃sa kuammɛ. Mban sɔ̃na a man gɔrima ben mi. 23Saa mìn di na da Egibiti sunɔn mi, na ka wunɛn yĩsiru nùn gari sɔ̃ɔwa, u wunɛn tɔmbu gɔba kuammɛwa, a ǹ maa bu wɔre sere ka tɛ̃.

will be added

X\