Yaribu 4

1Ma Mɔwisi u wisa u nɛɛ, na tɔn be yɛ̃. Ba ǹ koo man naanɛ ko. Ba ǹ gari yi swaa dakimɔ. Ba koo nɛɛ, wunɛ Yinni Gusunɔ a ǹ man kure a ka man gari kue. 2Yinni Gusunɔ u nùn bikia u nɛɛ, mba a nɛni wunɛn nɔmuɔ mi. Mɔwisi u nɛɛ, dɛka. 3Ma Yinni Gusunɔ u nɛɛ, a ye kɔ̃ɔwɔ temɔ. Ma u ye kɔ̃ temɔ, ma ya gɔsia waa. Yera Mɔwisi u duka sua yen min di. 4Yinni Gusunɔ u kpam nùn sɔ̃ɔwa u nɛɛ, a wunɛn nɔmu dɛmiɔ kpa a yen siru nɛnɛ a sua. Ma u win nɔmu dɛmia u yen sii te nɛnua u sua, ma ya kpam gɔsia dɛka win nɔmuɔ. 5Yinni Gusunɔ u maa nɛɛ, yeniwa kaa ko, kpa bu gia ma nɛ wi na ra n wãa na ka nun gari kua, nɛ wi na sãa ben baababa Aburahamu ka Isaki ka Yakɔbun Yinni. 6Ma Yinni Gusunɔ u kpam nɛɛ, a wunɛn nɔmu dokeo wunɛn yaberun sɔɔwɔ tororɔ. Ma u doke, yen biru u wuna. Wee ga burura nge wɛ̃su, ga bara disigiru wa. 7Yinni Gusunɔ u kpam nɛɛ, a maa wunɛn nɔmu ge wesio mi. U wesia, ma u ge wuna. Ma ga kpam kua nge mɛ ga raa sãa. 8Yinni Gusunɔ u nɛɛ, bà kun nun naanɛ kue, bà kun yĩre gbiikiru wure, ba koo yiruseru wura. 9Bà kun maa wure baa mɛ ba yĩrenu yiru ye wa, bà n wunɛn gari yina, a daa baka ten nim sɔko a yari temɔ. Nim mɛ a sɔka mi, mu koo gɔsiawa yɛm temɔ. 10Yera Mɔwisi u Yinni Gusunɔ wisa u nɛɛ, Yinni, gari gerubu bu ra n ka man sɛ̃ yellun di, baa ka tɛ̃ ye a ka man gari mɔ̀, domi nɛn yara bunu. 11Ma Yinni Gusunɔ u nùn sɔ̃ɔwa u nɛɛ, wara tɔnun nɔɔ kua. Wara ra tɔnu ko soso. Wara ra yam waasie. Wara ra tɔnu ko wɔ̃ko. N ǹ nɛ, Yinni Gusunɔ wi ro? 12Ǹ n mɛn na, a doo tɛ̃. Kon nun somi. Kon nun sɔ̃ɔsi ye kaa gere. 13Adama Mɔwisi u nɛɛ, aawo, a goo gɔsio a gɔri. 14Saa yera Yinni Gusunɔ u ka Mɔwisi mɔru kua. Ma u nɛɛ, n ǹ Aroni Lefi u sãa wunɛn mɔɔ? Na yɛ̃ ma gari gerubu kun ka nùn sɛ̃. Win tii wee, u nun sennɔ sisi. Ù n nun wa, win nukura koo dora. 15A ka nùn gari koowo, kpa a nùn sɔ̃ ye u koo gere. Nɛna kon wunɛn nɔɔ ka win nɔɔ dendi, kpa n bɛɛ sɔ̃ɔsi ye i ko ko. 16Wiya u koo tɔmbu wunɛn gari tusia. U ko n sãa nge wunɛn nɔɔ, kpa a n sãa nɛn kɔsire win sɔ̃. 17Tɛ̃, a dɛka ye suo ye kaa ka yĩreru ko, kpa a n ye nɛni wunɛn nɔmuɔ. 18Yen biru Mɔwisi u doona min di. U gɔsira u da win dokiri Yetoron mi. Ye u tura mi, u nùn sɔ̃ɔwa u nɛɛ, a de n da n nɛn dusibu wa mɛ ba ka wãa Egibitiɔ. Ma Yetoro u nùn sɔ̃ɔwa u nɛɛ, a doo ka bɔri yɛndu. 19- 20Ma Mɔwisi u win kurɔ ka win bibu sua u bu kɛtɛkunu yɔɔsia ba da Egibitin temɔ. U maa dɛka ye sua ye Gusunɔ u nùn sɔ̃ɔwa u n nɛni mi. Domi Yinni Gusunɔ u raa nùn sɔ̃ɔwa u nɛɛ, be ba raa kasu bu nùn go, be kpuro ba gu. Yen sɔ̃, u gɔsiro u da Egibitiɔ. 21Yinni Gusunɔ u kpam Mɔwisi sɔ̃ɔwa u nɛɛ, tɛ̃, a doo Egibiti mi, kpa a n yaaye yĩre ni na nun nɔmu bɛria, a ka nu ko Egibiti sunɔn wuswaaɔ. Adama kon win gɔ̃ru bɔbiasia. U ǹ wuramɔ u tɔn be deri bu doona. 22Kpa a nùn sɔ̃ a nɛɛ, amɛniwa nɛ, Yinni Gusunɔ na gerua, Isirelin bweseru ta sãawa nge nɛn bii yeruma. 23Yen sɔ̃, u de nɛn bii wi, u doona u ka man sã. Ù n maa yina, kon win bii yeruma go. 24Swaa sɔɔ mi Mɔwisi u yɔ̃ra u kpuna, miya Yinni Gusunɔ u nùn sɛ̃re, u kĩ u nùn go. 25Ma Sefora u kpee nɔɔ durorugiru sua u win bii bango kua, ma u win sen sarusu sua u ka Mɔwisin tiin tɔn durɔru baba u nɛɛ, wee, na wunɛn woro yɛmgiru kua. 26Bango yen sɔ̃na u gerua mɛ. Sanam mɛ sɔɔra Yinni Gusunɔ u Mɔwisi deri. 27N deema Yinni Gusunɔ u raa Aroni sɔ̃ɔwa u nɛɛ, a seewo a Mɔwisi sennɔ da gbaburɔ. Aroni u seewa u da ma u ka Mɔwisi yinna guu ten mi, te Gusunɔ u tii gɔsia. Ma ba gabana ba bɔkasina nuku dobun sɔ̃. 28Yen biru Mɔwisi u Aroni saaria kpuro ye Yinni Gusunɔ u ka nùn gɔrima, ka yĩre ni u nùn sɔ̃ɔwa u ko. 29Ma Mɔwisi ka Aroni ba gurena ba da Egibitiɔ, ba Isireliban guro gurobu mɛnna. 30Ma Aroni u bu gari yi kpuro saaria yi Yinni Gusunɔ u Mɔwisi sɔ̃ɔwa mi. Ma Mɔwisi u tɔn be yĩre ni kua. 31Yera, ba naanɛ doke. Ba gia ma Yinni Gusunɔ u wa nge mɛ ba bu nɔni sɔ̃ɔmɔ. Tɛ̃ u kĩ u bu faaba ko. Ma ba yiira ba nùn sãwa.

will be added

X\