Yaribu 37

1Bɛsalɛli u Yinni Gusunɔn woodan kpakoro te kua ka akasian dãa. Ten dɛ̃ɛbu bu sãawa gɔm soonu yiru ka bɔnu. Ten yasum ka ten gunum mu nɛwa, ye kpuro gɔm soo teeru ka bɔnu bɔnu. 2Ma u tu wura pote ten sɔɔwɔ ka tɔɔwɔ. Ma u ten goonu nnɛ ye, nɔɔ bɔka kua ka wura. 3Ma u wuran sumi kua wasi nnɛ u doke ten goo gookan yinna yenu sɔɔ, yiru ya mɛɛrinɛ bee tia, yiru yeni ya maa mɛɛrinɛ bee tia. 4Ma u dãa pɔɔsi kua yiru u yi wura pote. 5Ma u yi wasi kpakoro ten sumi yi sɔɔ beri berika. Yiya ba ko n da ka tu sue. 6Yen biru u kpakoro te wukiritia kua ka wura. Wukiritia yen dɛ̃ɛbu bu sãawa gɔm soonu yiru ka bɔnu, yen yasum maa gɔm soo teeru ka bɔnu. 7- 8Ma u wɔllun kɔ̃sobun weenasibu yiru kua ka wura u mani wukiritia yen goo piiminun wɔllɔ gee ka gee. 9Ma yi kpakoro ten wukiritia ye kasa wukiri mam mam. Yi wuswaa kisinɛwa yi mɛɛrinɛ. 10U tabulu ye kua ka akasian dãa. Yen dɛ̃ɛbu bu sãawa gɔm soonu yiru, yen yasum maa gɔm soo teeru. Ma yen gunum maa sãa gɔm soo teeru ka bɔnu. 11U ye kpuro wura pote ma u ye nɔɔ bɔka kua ka wura. 12Ma u dãa bɛsi piiminu gore yen goo gooka mi, ni nu ka nɔm tararun yasum nɛ u ka sikerena ma u maa nin tii wura pote. 13Ma u sumi nnɛ kua ka wura u doke yen goo gookaɔ mi yen naasu gire gire. 14Sumi yi, yi wãa mi ba dãa bɛsi piimii ni goren bɔku bɔkukaɔ. Yi sɔɔra ba koo dãa pɔɔsi wasi bu ka tabulu ye sua. 15Ma u dãa pɔɔsi yiru kua u wura pote. 16Yen biru u tabulu yen dendi yãnu kua. Niya pɛrɛntiba ka nɔri ka gbɛ̃a ka gbɛ̃ɛ yorukunu nì sɔɔ ba ko n da tam doke bu ka yãkunu ko. U ye kpuro kuawa ka wura. 17Ma ba dabu ge seka ka wura. Gen yɔ̃ratia ka gen pɔtura ka gen kãasi ka gen bura te ta ka dãa marum ka biibii weenɛ, ye kpuro ya sãawa bɔri tia. 18Kãasi nɔɔba tia ga mɔ. Gen yɛ̃si yɛ̃sikaɔ kãasi ita ita. 19Gen kãasa baayere, buranu itawa ya mɔ. Nu ka dãa marum ka biibii weenɛ. 20Dabu gen pɔturan tii ya buranu nnɛ mɔ ni nu ka dãa marum ka biibii weenɛ. 21Mi kãasi yiru yiru yi gbinnɛ ka pɔtura, u min temɔ buraru koosiwa te ta ka dãa marum weenɛ. 22Bura ni ka kãasi yi, ye kpuro ya sãawa wuran bɔri tia. 23Yen biru ba fitila nɔɔba yiru ye kua ka nin baku ka mi torom mu ko n da wɔriki. Ye kpurowa ba kua ka wura. 24Wura ye ba ka dabu ge ka gen dendi yãnu kpuro kua, ya sãawa kilo tɛna. 25Yen biru ba maa kpakororu kua tèn wɔllɔ ba ko n da turare dɔ̃ɔ doke. Ten dɛ̃ɛbu bu sãawa gɔm soo teeru. Ten yasum maa gɔm soo teeru. Ten goonu nnɛ ye, ya nɛwa. Ten gunum maa gɔm soonu yiru. Ma ba dera ten goo gɔmkinu nnɛn dãa ya nɔɔ yara nge kãanu. 26Ma ba kpakoro te kpuro wura pote, sere ka ten kãanɔ ma ba tu nɔɔ bɔka kua ka wura ba ka sikerena. 27Ma ba sumi nnɛ kua ka wura ba doke ten goo gɔmkinɔ nɔɔ bɔka yen temɔ yi mɛɛrinɛ yiru yiru. Sumi yi sɔɔra ba koo dãa pɔɔsi yiru wasi beri berika yi ba ko n da ka tu sue. 28Ma ba dãa pɔɔsi yi kua ka akasian dãa ba yi wura pote. 29Yen biru be ba ra turare ko ba gum mɛ kua mɛ ba ko n da kpuro tãre bu ka sɔ̃ɔsi ma Gusunɔ u ye gɔsa nɛnɛm, ka sere maa turare ye ba ko n da dɔ̃ɔ doke.

will be added

X\