1 Bɛsalɛli ka Oholiabu ka tɔn be Yinni Gusunɔ u bwisi ka yɛ̃ru ka laakari wɛ̃ bu ka kuu ten sɔmburu kpuro ko, ba koo tu kowa nge mɛ u gerua. 2 Ma Mɔwisi u Bɛsalɛli ka Oholiabu sokusia ka sere be Yinni Gusunɔ u maa sɔmbu ten bwisi ka yɛ̃ru kã ma ba tii wɛ̃ ka nuku tia. 3 Ma ba kɛ̃ɛ ni mwɛɛra Mɔwisin min di, ni Isireliba ba wɛ̃ Yinni Gusunɔn kuu ten sɔ̃. Adama bururu baatere ba ra n maa ka kɛ̃ɛ ni naamɔwa Mɔwisin mi ka kĩru. 4 Ma tɔn be ba sɔmbu te mɔ̀ mi, ben baawure u gina win sɔmburu deri, 5 ma ba na Mɔwisin mi, ba nùn sɔ̃ɔwa ba nɛɛ, tɔmba ka kɛ̃nu naamɔ n kere mɛ̀n bukata sa mɔ su ka sɔmbu te ko te Yinni Gusunɔ u gerua. 6 Yera Mɔwisi u dera ba kpara ba nɛɛ, goo u ku maa ka kɛ̃nu na kuu ten sɔ̃. Mɛsuma u kua u ka kɛ̃ɛ ni yɔ̃rasia. 7 Domi ni ba wɛ̃ kɔ nu koo turi nu tiara. 8 Tɔn be ba sɔmbu ten yɛ̃ru mɔ mi, ba kuu te kua ka beka wɔku te ba wesa ka wɛ̃ɛ damgii ka wɛ̃ɛ yi ba wɔ̃kua ka bura ka maa gaadura, ka wɛ̃ɛ wunɔmgii. Ma ba wɔllun kɔ̃sobun weenasibu kua ya kua buraru beka ye sɔɔ. 9 Beku nin teerun dɛ̃ɛbu bu sãawa gɔm soonu tɛna yiru sari. Ten yasum maa gɔm soonu nnɛ. 10 Yen biru ba beka yen nɔɔbu sua ba swɛɛna. Nge mɛya ba maa kua ka nɔɔbu ye ya tie. 11 Ma ba yen baayeren goo baka teerɔ wɛ̃ri doke ka wɛ̃ɛ yi ba wɔ̃kua ka bura, yi ba koo ra ka ye sɔrena. 12 Wɛ̃ri weeraakuukuubuwa ba doke beka ye ba swɛɛnan baayeren goo baka teerɔ yi n nɔɔ kisinɛ. 13 Yen biru ba sɔretinu weeraakuru kua ka wura ba ka beka ye kpuro sɔrena ma ya kua beku teeru kuu ten sɔ̃. 14 Ba maa bekunu wɔkura tia wesa ka boo sansu bu ka kuu bekurugii te wukiri. 15 Beku nin baateren dɛ̃ɛbu bu sãawa gɔm soonu tɛna, ten yasum gɔm soonu nnɛ. 16 Ma ba beka yen nɔɔbu sua ba swɛɛna. Ma ba maa nɔɔba tia ye ya tie swɛɛna nɛnɛm. 17 Ma ba wɛ̃ri weeraakuukuubu doke beka ye ba swɛɛnan baayeren goo baka teerɔ. 18 Ma ba sɔretii kua weeraakuru ka sii gandu bu ka beka ye kpuro sɔrena, kpa bekunu wɔkura tia ye, yu ko beku teeru. 19 Ma ba yãa kinɛnun gɔni swɛ̃rasia ba swɛɛna bu ka kuu te wukiri. Ma ba maa yaa gɔni sinumgii gɛɛ swɛɛna yi ba koo sɔndi ye kpuron wɔllɔ. 20 Yen biru ba akasian dãa bɛsi kasu yi ba koo gira yi ka ko kuu ten dãa. 21 Dãa bɛsi yin dɛ̃ɛbu bu sãawa gɔm soonu wɔkuru, yin yasum maa gɔm soo teeru ka bɔnu. 22 Ma ba yi sɔretii dokea yiru yiru yi biru kisinɛ. 23 Dãa bɛsi yɛnda ba kua bu ka gira kuu ten sɔ̃ɔ yɛ̃san nɔm dwaru gia. 24 Ma ba yen baayere yɔ̃ratii yiru kua ka sii geesu. Ma ba yi doke mi sɔretii yi, yi wãa. 25 Ma ba maa dãa bɛsi yɛndu kua bu ka gira ten sɔ̃ɔ yɛ̃san nɔm geu gia. 26 Ma ba yen baayere yɔ̃ratii yiru dokea yi ba kua ka sii geesu. 27 Dãa bɛsi nɔɔba tia ba kua bu ka gira ten biruɔ sɔ̃ɔ duu yeru gia. 28 Ba maa dãa bɛsi yiru kua bu ka doke tia tia ten goo gɔmkinɔ biru gia, 29 yi n ka yiɔnɔ maninɛ saa tem di sere ka wɔllɔ ma ba yi sumi wasi wɔllɔ. Mɛsuma ba goo gɔmkinu yiru ye kpuro kua. 30 Nge mɛya ba dãa bɛsi nɔɔba ita kua bu ka gira kuu ten biru gia, yin baayere ka yen yɔ̃ratii yiru yi ba kua ka sii geesu. Ma yi kua yɔ̃ratii wɔkura nɔɔbu ka tia. 31 Yen biru ba ten yɛ̃si itaɔ akasian dãa nɔɔbu nɔɔbu kare. Ma ba sɔ̃ɔ yari yerugia deri. 33 Dãa karetia ye ya wãa yɛ̃sa baayeren suunu sɔɔ mi, yen nɔɔ ga yɔ̃ra dãa gɔmkinɔ. 34 Ma ba dãa bɛsi yi ka dãa karetii yi wura pote. Ma ba wuran sumi kua yì sɔɔ ba koo dãa karetii yi wasi wasi. 35 Ma ba beku kareru kua ka wɛ̃ɛ damgii ka wɛ̃ɛ yi ba wɔ̃kua ka bura ka maa gaadura, ka wɛ̃ɛ wunɔmgii. Ma ba wɔllun kɔ̃sobun weenasibu kua beku te sɔɔ, ya kua ten buraru. 36 Yen biru ba dãa bɛsi sinumgii nnɛ kua ba wura pote, ma ba sɔretii wuragii doke yi sɔɔ yi ka beku kare te gaba. Ma ba dãa bɛsi yi yɔ̃ratii dokea yi ba kua ka sii geesu. 37 Ma ba kuu ten beku kɛnutiru wesa ka wɛ̃ɛ damgii ka wɛ̃ɛ yi ba wɔ̃kua ka bura ka maa gaadura, ka wɛ̃ɛ wunɔmgii ma ba beku te sɔma dokea. 38 Ba akasian dãa bɛsi sinumgii nɔɔbu kua bu ka beku kɛnutii te bwɛ̃, ka sɔretii yi yi koo tu gaba, ma ba dãa bɛsi yi furɔsu ka sii dɛki kua ba ye kpuro wura pote. Ma ba yin baayere yɔ̃ratia kua ka sii gandu.
