Yaribu 33

1Yinni Gusunɔ u kpam Mɔwisi sɔ̃ɔwa u nɛɛ, i seewo i doona minin di, wunɛ ka tɔn be a yarama Egibitin di, kpa i da tem mi, mɛ̀n nɔɔ mwɛɛru na kua ka bɔ̃ri na nɛɛ, kon mu Aburahamu ka Isaki ka Yakɔbu ka ben bibun bweseru wɛ̃. 2Kon nɛn gɔrado goo gɔri u n nun gbiiye kpa n nun Kananiba ka Amɔreba ka Hɛtiba, ka Feresiba ka Hefiba ka Yebusiba gira. 3I doo tem mɛ sɔɔ. Tim ka bom yiba mi. Adama na ǹ ka bɛɛ dɔɔ. Kpa n ku ra bɛɛ kam koosia swaaɔ, domi bɛɛn swaa tau. 4Ye tɔn be, ba labaari kɔ̃sa ye nua, ben wasi dwiiya. Ba ǹ maa ben bura yãnu ganu doke nuku sankiranun sɔ̃. 5Yinni Gusunɔ u Mɔwisi sɔ̃ɔwa u nɛɛ, a Isireliba sɔ̃ɔwɔ a nɛɛ, ben swaa tau. Nà n ka bu sĩimɔ nɔni kpaki teeru sɔɔ mam, kon bu kam koosia. Bu ben bura yãnu potirio tɛ̃, kpa n wa ye kon bu kua. 6Ma ba ǹ maa ben bura yãa ni doke saa mìn di ba doona Horɛbun guu ten di. 7Mi Isireliba ba ben sansani gira kpuro, Mɔwisi u ra ka kuu bekurugii te dewa u gira mi n ka sansani ye dɛsire. U tu soka Yinni Gusunɔn kuru. Be ba kĩ bu Yinni Gusunɔ gãanu bikia bera ba ra yari sansanin di bu da kuu ten mi. 8Mɔwisi ù n yariɔ u dɔɔ kuu ten mi, tɔn be kpuro ba ra sewa bu yɔ̃ra ben kunun kɔnnɔwɔ ba n Mɔwisi mɛɛra sere u ka du kuu te sɔɔ. 9Ù n dua mi, saa yera guru wii wuro te, ta ra saramɛ tu yɔ̃ra kuu ten kɔnnɔwɔ kpa Yinni Gusunɔ u ka nùn gari ko. 10Tɔn be kpurowa ba ra guru wii wuro te wa, ta yɔ̃ kuu ten kɔnnɔwɔ. Kpa ben baawure u yiira win kurun kɔnnɔwɔ. 11Yinni Gusunɔ u ra ka Mɔwisi gari kowa nɔni ka nɔni nge mɛ tɔnu u ra ka win bɔrɔ gari ko. Yen biru Mɔwisi u ra gɔsiramɛ u na sansaniɔ. Adama win bɔ̃ɔ aluwaasi Yosue, Nunin bii, u ku ra yari kuu ten min di. 12Mɔwisi u Yinni Gusunɔ sɔ̃ɔwa u nɛɛ, wee, a nɛɛ, n ka tɔn be doo tem mɛ sɔɔ. Mɛya a maa nɛɛ, a man yɛ̃ sãa sãa. Kaa n ka man nɔnu geu mɛɛra. Adama a ǹ man sɔ̃ɔwa wi u koo man yɔ̃siri. 13Ǹ n mɛn na, tɛ̃, a man wunɛn himba sɔ̃ɔsio kpa n nun gia, kpa n kpam wunɛn durom wa. A yaayo ma tɔn be, ba sãawa wunɛn tɔn be a gɔsa. 14Ma Yinni Gusunɔ u nɛɛ, nɛn tii kon ka nun da kpa n nun nasara wɛ̃. 15Mɔwisi u wisa u nɛɛ, à kun ka sun dɔɔ wunɛn tii, a ku de su doona minin di. 16Amɔna ba koo ka tubu ma sa wunɛn kĩi geeru wa, nɛ ka wunɛn tɔmbu, ma n kun mɔ a ka sun da. À n ka sun da, saa yera sa ko n sãa nɛnɛm handunian tɔn be ba tie sɔɔ. 17Yinni Gusunɔ u Mɔwisi sɔ̃ɔwa u nɛɛ, kon ko nge mɛ a man bikia. Domi na nun yɛ̃ sãa sãa, a maa nɛn kĩi geeru wa. 18Mɔwisi u nɛɛ, a man wunɛn yiikon girima sɔ̃ɔsio. 19Yinni Gusunɔ u wisa u nɛɛ, kon na n sara wunɛn wuswaaɔ ka nɛn girima kpuro, kpa n nun nɛn yĩsiru sɔ̃, nɛ, Yinni Gusunɔ. Be na kĩ n durom kua, beya na ra durom kue. Be na maa kĩ n wɔnwɔndu kua, kpa n bu wɔnwɔndu kua. 20Adama na ǹ derimɔ a nɛn wuswaa wa, domi goo sari wi u koo nɛn wuswaa wa kpa u n wãa. 21Yen sɔ̃, ayeru garu wee nɛn bɔkuɔ kpee baa sɔɔ, mi kaa kpĩ a n wãa. 22Sanam mɛ na sarɔ ka nɛn yiikon girima, kon nun nɛn nɔma wukiri kpee baa ye sɔɔ. 23Yen biru kon nɛn nɔma wuna kpa a nɛn biru wa, adama a ǹ nɛn wuswaa wasi.

will be added

X\