Yaribu 31

1Yinni Gusunɔ u kpam Mɔwisi sɔ̃ɔwa u nɛɛ, 2wee na Bɛsalɛli, Urin bii, Hurin debubu gɔsa Yudan bweseru sɔɔ. 3Na nùn nɛn Hunde yibie u n ka sɔm bwese bwesekan bwisi mɔ, kpa u n yen asansi kpuro yɛ̃. 4U koo kpĩ u yen kpunaaba yi. U wuran sɔmburu yɛ̃, ka sii geesu ka sii gandu. 5Ka nge mɛ ba ra kpee gobiginu sɔɔ yore ni ba koo gore, ka sere maa dãa dãkubu, ye kpuro gesi ye n sãa burarun sɔmburu. 6Ma na nùn Oholiabu, Ahisamakin bii wi u sãa Danun bweseru nɔmu sɔndia u ka nùn somi. Yen biru na maa gabu bwisi kã be ba sɔmbu te yɛ̃. Be kpurowa ba koo mɛnna bu sɔmbu te ko te na nun sɔ̃ɔwa mi. 7Tera kuu bekurugii te, ka nɛn woodan kpakoro te, ka ten wukiritia, ka sere maa kuu ten dendi yãa ni nu tie, 8ka tabulu ye, ka yen dendi yãnu, ka dabu wuraguu ge, ka gen dendi yãnu, ka kpakoro tèn wɔllɔ ba ko n da turare dɔ̃ɔ doke, 9ka yãku yee te, ka ten dendi yãnu, ka boo ge, ka gen sɔwaritia, 10ka sere yãa ni Aroni ka win bibu ba ko n da sebe bu ka yãkurun sɔmburu ko, 11ka gum mɛ ba ko n da gãanu yɛ̃ke bu ka sɔ̃ɔsi ma ya wãa nɛnɛm nɛn sãarun sɔ̃, ka sere turare nubu durorugia ye. Ye kpurowa ba koo ko nge mɛ na nun sɔ̃ɔwa. 12Yinni Gusunɔ u kpam Mɔwisi sɔ̃ɔwa u nɛɛ, 13a Isireliba sɔ̃ɔwɔ a nɛɛ, i ko tɔ̃ɔ wɛ̃rarugirun wooda mɛm nɔɔwawa mam mam. Domi ta ko n sãawa nɛn arukawanin yĩreru ye na bɔkua ka bɛɛ sere ka baadommaɔ. Yĩre tera ta koo sɔ̃ɔsi ma nɛna na bɛɛ gɔsa na yi nɛnɛm nɛn sɔ̃. 14I n da wɛ̃re tɔ̃ɔ wɛ̃rarugii te sɔɔ. I ku tu garisi nge sanam dirum. Wi u yina ma u sɔmburu kua te sɔɔ, ba koo yɛ̃ro wunawa bɛɛn suunu sɔɔn di bu go. 15Yen sɔ̃, alusuma tia sɔɔ, sɔ̃ɔ nɔɔba tia i ko n da sɔmburu ko, adama nɔɔba yiruse te, ta ko n sãawa tɔ̃ɔ wɛ̃rarugiru te na yi nɛnɛm nɛn sɔ̃. Bɛɛn wi u sɔmburu kua tɔ̃ɔ te sɔɔ, ba koo yɛ̃ro gowa. 16A de bɛɛ Isireliba i n tɔ̃ɔ wɛ̃rarugii ten wooda mɛm nɔɔwammɛ, sere ka bɛɛn bibun bweserɔ, domi arukawani ye, ya ko n wãawa sere ka baadommaɔ. 17Tɔ̃ɔ te, ta sãawa yĩreru te ta ko n wãa nɛ ka bɛɛn suunu sɔɔ. Domi sɔ̃ɔ nɔɔba tia sɔɔra na wɔllu ka tem taka kua na kpa. Nɔɔba yiruse ma na sɔmburu deri na wɛ̃ra. 18Ye Yinni Gusunɔ u ka Mɔwisi gari yi kua guu te ba mɔ̀ Sinaiɔ u kpa, yera u nùn kpee bɛsi yiru wɛ̃ yì sɔɔ win tii u woodaba yorua.

will be added

X\