Yaribu 3

1Saa ye sɔɔ, Mɔwisi u win dokiri Yetoro, Madianin yãku kowon sabenu kpare. U ka nu da yakasɔ sɔ̃ɔ duu yeru gia. Ma u tura sere guu te ba mɔ̀ Horɛbuɔ te ba maa sokumɔ Sinai te Gusunɔ u tii gɔsia. 2Yera Yinni Gusunɔn gɔrado u ka nùn gari kua dɔ̃ɔ yarin di yi yi wãa awĩi gɛɛn suunuɔ. Mɔwisi u mɛɛra u wa wee, awĩi yi kpuro yi dɔ̃ɔ mɔ̀, adama yi ǹ dɔ̃ɔ mwaaramɔ. 3Ma u nɛɛ, kon gɛra n kãsi baka te wawa, kpa n wa yèn sɔ̃ awĩi yi, yi ǹ dɔ̃ɔ mwaaramɔ. 4Ye Yinni Gusunɔ u wa ma u gɛra u ka wa, yera u nùn soka saa awĩi yin suunu sɔɔn di u nɛɛ, Mɔwisi, Mɔwisi. Ma Mɔwisi u wura u nɛɛ, nɛ wee. 5Gusunɔ u nɛɛ, a ku susima mini. A wunɛn salubata ye poto domi nɛna na wãa mini, 6nɛ wi na sãa wunɛn sikadoba Aburahamu ka Isaki ka Yakɔbun Yinni. Ma Mɔwisi u win wuswaa berua domi bɛrum nùn mɔ̀ u ka Gusunɔ mɛɛri. 7Yinni Gusunɔ u kpam nɛɛ, na nɛn tɔmbun nɔni swãaru wa be ba wãa Egibitiɔ. Na maa ben weeweenu nua dam mɛ ba bu dɔremɔn sɔ̃. Na ben nuku sankiranu yɛ̃. 8Yera na sarama n ka bu wɔra Egibitigibun nɔman di, kpa n ka bu da tem bakam gam sɔɔ mɛ mu gea sãa mu tim ka bom yiba. Tem mɛ sɔɔra Kananiba ka Hɛtiba ka Amɔreba ka Feresiba ka Hefiba ka Yebusiba ba wãa. 9Wee, na Isireliban weeweenu nua. Na maa dam mɛ wa mɛ Egibitigiba bu dɔremɔ. 10A doo n nun gɔri tɛ̃ Egibiti sunɔn mi, a nɛn tɔmbu Isireliba yarama win tem di. 11Mɔwisi u nùn wisa u nɛɛ, wara ra n nɛ n ka da Egibiti sunɔn mi, n Isireliba yara win tem di. 12Gusunɔ u nɛɛ, ko na n ka nun wãa. Sanam mɛ a tɔn be yarama Egibitin di, guu tenin miya i ko na i man sã. Yeniwa ya ko n sãa yĩreru a n ka yɛ̃ ma nɛna na nun gɔra. 13Mɔwisi u Gusunɔ sɔ̃ɔwa u nɛɛ, ǹ n mɛn na, kon da Isireliban mi, n bu sɔ̃ n nɛɛ, bɛsɛn sikadoban Yinniwa u man gɔrima ben mi. Adama bà n man bikia, amɔna win yĩsiru, mba kon gere. 14Gusunɔ u nùn wisa u nɛɛ, nɛna wi na ra n wãa. A Isireliba wisio a nɛɛ, wi u tii sokumɔ Wi u ra n wãa, wiya u nun gɔrima ben mi. 15Mɛniwa nɛn yĩsiru sere ka baadommaɔ. Mɛya ba ko n da man soku sere ka ben bweserun bibɔ. Ma u kpam Mɔwisi sɔ̃ɔwa u nɛɛ, amɛniwa kaa Isireliba sɔ̃ a nɛɛ, nɛ wi na ra n wãa na sãa bɛɛn sikadoba Aburahamu ka Isaki ka Yakɔbun Yinni, na maa nun gɔrima ben mi. 16A doo a Isireliban guro gurobu mɛnna a bu sɔ̃ a nɛɛ, nɛ wi na ra n wãa, na sãa bɛɛn sikadoba Aburahamu ka Isaki ka Yakɔbun Yinni, na maa nun kure na ka nun gari kua na nɛɛ, na bu wa, na maa wa ye ba bu kuammɛ Egibitiɔ. 17Ma na nɛɛ, kon bu yara Egibitin di mi ba nɔni swãaru waamɔ. Kpa n ka bu da Kananiba ka Hɛtiba ka Amɔreba ka Feresiba ka Hefiba ka Yebusiban temɔ mɛ mu tim ka bom yiba. 18Ba koo wunɛn gari wura kpa wunɛ ka Isireliban guro gurobu i da Egibiti sunɔn mi, i nɛɛ, nɛ wi na ra n wãa na sãa bɛɛ Heberuban Yinni, na maa ka bɛɛ gari kua. U de i da gbaburɔ i tonda nge sɔ̃ɔ itan sanum saka kpa i nɛ bɛɛn Yinni yãkuru kua mi. 19Na yɛ̃ ma Egibiti sunɔ ù n nua mɛ, u ǹ wuramɔ i da ma n kun mɔ na nùn nɛn dam sɔ̃ɔsi. 20Yen sɔ̃, kon nɛn nɔmu dɛmia kpa n sɔm maamaaki bwese bweseka dabinu ko Egibitiɔ. Yen biru ba koo bɛɛ gira i doona. 21Sanam mɛ ba koo doona ba ǹ doonɔ nɔm dira. Domi kon de nɛn tɔmbu bu kĩi geeru wa Egibitigibun mi. 22Bɛɛn tɔn kurɔ baawurewa u koo win beruse ǹ kun mɛ ka wi ba wãa yɛnu teu sɔɔ bura yãa ni ba kua ka wura ka sii geesu kana, ka maa beka kpa bu ye kpuro ben bibu dokea. Nge mɛya i ko ka Egibitigibun arumani gura.

will be added

X\