1 Yinni Gusunɔ u Mɔwisi sɔ̃ɔwa u nɛɛ, i yɔɔma Sinain guuru mini, nɛn mi, wunɛ ka Aroni ka Nadabu ka Abihu ka Isireliban guro gurobu wata ka wɔkuru, kpa i man kpuna sarun di. 2 Wunɛ Mɔwisi, kaa man susima wunɛ turo. Be ba ka nun yɔɔma bu yɔ̃ro mi ba wãa mi. Tɔn be ba maa tie, bu ku raa yɔɔma mini. 3 Ma Mɔwisi u da u tɔn be Yinni Gusunɔn gari ka win woodaba kpuro sɔ̃ɔwa. Ma be kpuro ba wura ka gɔ̃ru teu ba nɛɛ, sa ko ko ye Yinni Gusunɔ u gerua kpuro. 4 Mɔwisi u Yinni Gusunɔn gari yi kpuro yorua ma u seewa buru buru u yãku yeru bana guu ten nuurɔ. U maa kpenu wɔkura yiru gira nge mɛ Isireliban bwese kɛrin geera nɛ. 5 Ma u Isireliban aluwaasiba gabu gɔra bu ka Yinni Gusunɔ yãku dɔ̃ɔ mwaararuginu kua kpa bu naa kinɛnu go bu ka siarabun yãkunu ko. 6 Mɔwisi u yaa yɛm mɛn bɔnu sua u doke gbɛ̃a sɔɔ. Ma u sukum mɛ n tie yɛ̃ka yãku yee ten wɔllɔ. 7 Ma u woodan tire te sua u tu gara tɔn ben wuswaaɔ. Ma ba nɛɛ, sa ko Yinni Gusunɔ mɛm nɔɔwa kpa su ko kpuro ye u gerua. 8 Ma Mɔwisi u yɛm mɛ sua u yɛ̃ka tɔn ben wɔllɔ u nɛɛ, yɛm mɛ wee, mɛ mu Yinni Gusunɔn nɔɔ mwɛɛru siremɔ te u bɛɛ kua sanam mɛ u bɛɛ wooda yeniba kpuro wɛ̃. 9 Ma Mɔwisi ka Aroni ka Nadabu ka Abihu ka Isireliban guro gurobu wata ka wɔku te, ba guu te yɔɔwa. 10 Ma ba Gusunɔ, be Isireliban Yinni wi wa. N sãare nge u yɔ̃ turaru garun wɔllɔ te ba kua ka kpee boogu ni nu baalimɔ weenɛ. Nu dɛɛrewa nge wɔllu te ta kun guru wiru mɔ. 11 Gusunɔ u ǹ Isireliban guro guro be kɔ̃sa gaa kue. Ba nùn wa ma ba di ba nɔra. 12 Yinni Gusunɔ u Mɔwisi sɔ̃ɔwa u nɛɛ, a yɔɔma a yɔ̃ra guuru mini. Kon nun kpee bɛsi wɛ̃ mì sɔɔ na wooda kpuro yorua, tɔn be ka ben bibun bweseru ba n ka ye mɛɛrimɔ baadomma. 13 Ma Mɔwisi u seewa ka win bɔ̃ɔ Yosue. Adama u sere guu te yɔ, 14 u guro guro be sɔ̃ɔwa u nɛɛ, i yɔ̃ro mini, i sun ma sere su ka wurama bɛɛn mi. Wee Aroni ka Huri ba wãa ka bɛɛ. Bɛɛn goo ù n gari giri gɛɛ mɔ, u na ben mi. 15 Yen biru u yɔɔwa guu ten wɔllɔ, ma guru wii wurora tu wukiri. 16 Yera Yinni Gusunɔn yiikon girima ya sɔ̃ɔsira mi. Isireliba ba ye wa, ya sãa nge dɔ̃ɔ boko. Ma guru wii wuro te, ta Sinain guu te wukiri sere sɔ̃ɔ nɔɔba tia. Sɔ̃ɔ nɔɔba yiruse Yinni Gusunɔ u Mɔwisi soka saa guru wii wuro ten min di. 18 Yera Mɔwisi u dua guru wii ten sɔɔwɔ ma u yɔɔwa guu ten wɔllɔ. Miya u wãa sɔ̃ɔ sɔɔ weeru ka wɔ̃kuru weeru.
