Yaribu 20

1Yen biru Gusunɔ u gari yini kpuro gerua u nɛɛ. 2Nɛna Gusunɔ bɛɛn Yinni wi u ra n wãa nɛ wi na bɛɛ yarama Egibitin tem di, na bɛɛ yakia saa yorun di. 3Yen sɔ̃, i ǹ ko i gãanu ganu sã nɛ baasi. 4I ku ra tii bwãarokunu kua ni nu sãa gãanun weenasinu ni nu wãa wɔllɔ, ǹ kun mɛ temɔ, ǹ kun mɛ nim sɔɔwɔ. 5I ku ra yiira i bwãaroku gagu sã, domi nɛna bɛɛn Yinni wi u ra n wãa. Nɛ, Yinni nisinugiiwa, nɛ wi na ra baababan durum mɔɔru mwɛ ben bibun mi be ba man tusan suunu sɔɔ sere ka ben sikadominun bibɔ. 6Adama be ba man kĩ, ma ba nɛn wooda nasie, na ra ben bibun bweseru wɔnwɔndu kue sere ka baadommaɔ. 7Nɛna bɛɛn Yinni wi u ra n wãa. I ku ra nɛn yĩsiru soku kam. Wi u tu soka kam, kon yɛ̃ro sɛɛyasia. 8I wɛ̃ro tɔ̃ɔ wɛ̃rarugiru sɔɔ, kpa i tu garisi te na yi nɛnɛm nɛn sɔ̃. 9Sɔ̃ɔ nɔɔba tia i ko n da bɛɛn sɔma kpuro ko. 10Adama sɔ̃ɔ nɔɔba yirusera ta sãa tɔ̃ɔ wɛ̃rarugiru te i nɛ Gusunɔ bɛɛn Yinni derie. Tɔ̃ɔ te sɔɔ, i ku ra sɔmburu garu ko, bɛɛ ka bɛɛn bibu, ǹ kun mɛ bɛɛn yobu, ǹ kun mɛ bɛɛn yaa sabenu, ǹ kun mɛ sɔɔ be ba wãa bɛɛn yɛnusɔ. 11Domi sɔ̃ɔ nɔɔba tian baa sɔɔra na ka wɔllu ka tem ka nim wɔ̃ku kua ka baayere kpuro ye ya wãa mi sɔɔ. Ma na wɛ̃ra sɔ̃ɔ nɔɔba yiruse. Yen sɔ̃na na sɔ̃ɔ nɔɔba yiruse te domaru kua na tu yi nɛnɛm nɛn sɔ̃. 12I bɛɛn tundo ka mɛro bɛɛrɛ wɛ̃ɛyɔ kpa bɛɛn hunde yu wa yu dakaa da tem mɛ na bɛɛ wɛ̃ sɔɔ. 13I ku ra tɔnu go. 14I ku ra sakararu ko. 15I ku ra gbɛni. 16I ku ra goo gari mani. 17I ku ra bɛɛn tɔnusin diru binɛ ko, ǹ kun mɛ win kurɔ, ǹ kun mɛ win yobu, ǹ kun mɛ win yaa sabenu, ye n sãa wunɛn tɔnusin gãanu kpuro gesi. 18Yen biru tɔn be kpuro ba guru kukiribu ka kɔban swĩi nua ma ba guru maakinu wa guu ten wɔllɔ te wiisu wukiri. Yera ba diira ba da ba yɔ̃ra n dɛsire. 19Ba Mɔwisi sɔ̃ɔwa ba nɛɛ, wunɛn tii, à n ka sun gari kua, sa ko nun swaa daki. Adama a ku de Gusunɔ u ka sun gari ko, kpa su ku ra gbi. 20Ma Mɔwisi u tɔn be sɔ̃ɔwa u nɛɛ i ku bɛrum ko. Domi Yinni Gusunɔ u nawa u ka bɛɛn laakari mɛɛri kpa i n nùn nasie, i ku ra maa ka durum ko. 21Ma tɔn be, ba yɔ̃ n dɛsire saa ye Mɔwisi u guru wii sinumgii te susi mi Gusunɔ u wãa. 22Yinni Gusunɔ u Mɔwisi sɔ̃ɔwa u nɛɛ, a Isireliba sɔ̃ɔwɔ a nɛɛ, bɛɛn tii i wa ma wɔllun diya na ka bu gari kua. 23Yen sɔ̃, i ku ra maa tii bwãaroku gagu kua ka wura, ǹ kun mɛ ka sii geesu, kpa i gu ko bɛɛn bũu. 24Adama i ko man yãku yeru bania ka tem. Kpa i bɛɛn yaa sabenu gɔsi i ka man yãku dɔ̃ɔ mwaararuginu ka siarabun yãkunu kua ten wɔllɔ. Yam kpuro mi na gɔsa i ka man sã, ko na n wãa mi, kpa n bɛɛ domaru kua. 25Ì n man yãku yeru baniammɛ ka kpenu, i ku tu bani ka kpee ni i dãka. Domi ì n kpee ni dãka, i nu disi dokewa mi. 26I ku ra de ta n yɔɔtia mɔ, kpa bu ku raa ka bɛɛn tereru wa ì n yɔɔmɔ mi.

will be added

X\