Yaribu 2

1Durɔ goo wãa Lefin bweseru sɔɔ, win kurɔ maa sãa win bwese te. 2Yera saa ye sɔɔ, ye ba mɛnna ka kurɔ wi, ma kurɔ wi, u gura sua u mara bii tɔn durɔ. U wa ma bii wi, u wã, ma u nùn berua suru ita. 3Saa ye bii wi kun maa berurɔ, u kpakoro bwĩigiru kua u tu kɔntaa ka dãa swĩi swĩinu tɛɛni, nim mu ku ka du mi, ma u bii wi sua u kpɛ̃ɛ sɔɔ. U da u tu yi naa yarin suunu sɔɔ daa baka ten goorɔ. 4Ma bii win sesu u da mi, u yɔ̃ n dɛsire u ka mɛɛra u wa ye n koo bii wi deema. 5Saa ye sɔɔra Egibiti sunɔn bii tɔn kurɔ u na daaru mi, u ka wobure. Ma win yoba bɔsu daa ten bɔ̃ɔwɔ. Ye u kpakoro bwĩigii te wa, ma u yoo ben turo gɔra u ka tu na. 6Yera u tu wukia u deema bii wɛ̃ɛra ta wãa mi, tɔn durɔ, ta sumɔ. Ma wɔnwɔnda nùn mwa u nɛɛ, Heberuban biiwa. 7Yera bii win sesu besirama u sunɔn bii wi sɔ̃ɔwa u nɛɛ, a kĩ n da n nun goo kasuama Heberuban kurɔbu sɔɔ wi u koo nun bii wi nɔɔria? 8Ma sunɔn bii wi, u nɛɛ, oo, a doo. Yera wɔndia wi, u da u bii wɛ̃ɛ ten mɛro sokuma. 9Ye u na, yera sunɔn bii wi, u nɛɛ, a bii wi mɔɔ a man nɔɔria, kon da nun yen kɔsiaru wɛ̃. Kurɔ wi, u bii wɛ̃ɛ te sua u ka da u nɔɔri. 10Sanam mɛ bii wi, u bɔm karabu tura, yera u ka nùn wura, ma sunɔn bii wi, u nùn kua nge win tiin bii maruro. U tii sɔ̃ɔwa u nɛɛ, na nùn yaramawa nim di. Yen sɔ̃, win yĩsira Mɔwisi. 11Sanam dɔɔ sanam wure, Mɔwisi u kpɛ̃a. Yera u win mɛro bisibu Heberuba beram da, u wa ba sɔm sɛ̃sɔginu mɔ̀. Ma u mam Egibitigii goo wa u ben turo soomɔ u kĩ u go. 12Yera Mɔwisi u mɛɛra gee ka giɔ, u ǹ goo wa. Ma u Egibitigii wi so u go. U nùn sikua yani sɛɛri sɔɔ. 13Yen sisiru u kpam wura mi. Yera u deema Heberuba yiru ba sannamɔ. Ma u bu yakiana u wi u kun gem mɔ sɔ̃ɔwa u nɛɛ, mban sɔ̃na a wunɛn beruse soomɔ. 14Ma durɔ wi, u Mɔwisi wisa u nɛɛ, wara nun kua bɛsɛn wirugii a ka sun siri. A kĩ a man gowa nge mɛ a Egibitigii wi go? Ye Mɔwisi u nua mɛ, bɛrum nùn mwa. U nɛɛ, ǹ n mɛn na, tɔmbu kpuro ba gari yi nua. 15Saa ye Egibiti sunɔ u nua ye ya koora yera u swaa kasu u ka Mɔwisi go. Adama Mɔwisi u yakura u doona min di u da u wãa Madianin temɔ. Sɔ̃ɔ teeru u da u sɔ̃ dɔkɔ gaan bɔkuɔ. 16Yera Madianin yãku kowon bii wɔndiaba nɔɔba yiru ba nim takam na dɔkɔ mi, ma ba nim yibia sabenun nim nɔru yerɔ ben baaban sabenu nu ka nɔ. 17Ma kparobu gaba na ba bu gire. Adama Mɔwisi u seewa u bu sanna u ben sabenu nim kã. 18Saa ye ba gɔsira yɛnuɔ, ben tundo Rewɛlin mi, wi ba maa mɔ̀ Yetoro, u nɛɛ, amɔna i ka yellu wɔma mɛ gisɔ. 19Ba nùn wisa ba nɛɛ, Egibitigii goowa u ka sun yina ye kparo be, ba sun gire, sere u mam sun nim taka u bɛsɛn sabenu kã. 20Yera u win bii be bikia u nɛɛ, mana durɔ wi, u sere wãa. Mban sɔ̃na i ǹ ka nùn nɛ. I doo i nùn sokuma u na u di. 21Ye Mɔwisi u na u di ma u wura u ka sina durɔ win mi. Ma u nùn bii ben turo kã kurɔ, wi ba mɔ̀ Sefora. 22Kurɔ wi, u gura sua u Mɔwisi bii tɔn durɔ marua. Yera Mɔwisi u nùn yĩsiru kã ka win barum Gɛɛsɔmu, yen tubusiana, sɔɔ, domi u nɛɛ, u sãawa sɔɔ tem tukumɔ. 23Sanam dɔɔ sanam wure, Egibiti sunɔ wi, u gu. Saa ye sɔɔ, Isireliba ba weeweenu mɔ̀ ba wuri mɔ̀ ben yoo sɔma yen sɔ̃. Ben wuri yi, yi Gusunɔ girari, 24ma u ben weeweenu nua. N deema u ǹ win arukawani duari ye u ka ben baababa Aburahamu ka Isaki ka Yakɔbu bɔkua. 25Yera u bu mɛɛrima u ben wɔnwɔndu wa.

will be added

X\