Yaribu 19

1- 2Yen biru Isireliba ba doona Refidimun di. Ye n kua suru itasen tɔ̃ɔ gbiikiru saa mìn di ba yara Egibitin di, yera ba tura Sinain gbaburɔ. Ma ba ben sansani gira guu te ba mɔ̀ Sinain nuurɔ. 3Yera Yinni Gusunɔ u Mɔwisi soka guu ten wɔllɔ u ka nùn gari ko. Ye u yɔɔwa mi, yera Yinni Gusunɔ u nɛɛ, amɛniwa kaa Yakɔbun bibu Isireliban bwese kɛri sɔ̃ a nɛɛ, 4i wa ye na Egibitigibu kua ka nge mɛ na bɛɛ tii gawe na sua ka nɛn nɔm damguu nge mɛ gunɔ bakeru ta ra ten binu sue. 5Tɛ̃, ì n nɛn gere nua, ì kun nɛn arukawani kusie, i ko ko nɛn tiin tɔmbu n tɔmbu kpuro kere. Handunia kpuro sãawa nɛgia, 6adama bɛɛ i ko n sãawa nɛn tɔn be na gɔsa na tii yiiye, kpa i n sãa nɛn yãku kowobu tɔn be ba tien sɔ̃. Gari yi kaa Isireliba sɔ̃wa mi. 7Yen biru Mɔwisi u sarama u tɔn ben guro gurobu sokusia u bu sɔ̃ɔwa kpuro ye Yinni Gusunɔ u nɛɛ u bu sɔ̃. 8Ma tɔn be kpuro ba wura ba nɛɛ, ye Yinni Gusunɔ u gerua kpuro, yeya sa ko ko. Ma Mɔwisi u maa ka tɔn ben gere wura Yinni Gusunɔn mi. 9Ma Yinni Gusunɔ u Mɔwisi sɔ̃ɔwa u nɛɛ, wee, kon na wunɛn mi guru wii wuro te ta sinum mɔ sɔɔ, kpa tɔn be, bu nɔ sanam mɛ na ka nun gari mɔ̀, kpa ba n da n nun naanɛ sãa. Saa ye sɔɔra Mɔwisi u den Yinni Gusunɔ tɔn ben gari yi tusia. 10Yera Yinni Gusunɔ u kpam nùn sɔ̃ɔwa u nɛɛ, a doo a tɔn be deema a bu sɔ̃ bu ben beka teo bu tii dɛɛrasia gisɔ ka sia, 11kpa ba n sɔɔru sãa ba n ka sɔ̃ɔ itase mara. Domi sɔ̃ɔ itase te sɔɔra nɛ, Yinni Gusunɔ kon sarama Sinain guurɔ be kpuro bu ka man wa. 12Kaa tɔn be yĩreru kua mi ba koo yɔ̃ra guu ten bɔkuɔ, kpa a bu sɔ̃ ba n tii sɛ bu ku raa guu te yɔ, bu ku mam susi ten gãarɔ bu tu bɛsu. Ben wi u tu bɛsu, yɛ̃ro koo gbiwa. 13Ba ǹ nùn sɛ̃remɔ ka nɔma, kpena ba koo nùn kasuku, ǹ kun mɛ bu nùn sɛ̃ɛnu twee bu ka go. Baa ǹ n yaa saberun na, mɛya ba koo ka tu go. Kɔba yà n swĩwa ba koo susi guu ten bɔkuɔ. 14Ma Mɔwisi u sarama guu ten min di, u tɔn be sɔ̃ɔwa u nɛɛ, bu tii dɛɛrasio bu ka Gusunɔ sã. Ma ba ben beka tea. 15U kpam bu sɔ̃ɔwa u nɛɛ, i ku ra ka bɛɛn kurɔbu bakuna i n sɔɔru sãa i n ka sɔ̃ɔ itase te mara. 16Sɔ̃ɔ itase ten bururu ba guru kukiribu nua, ma ba guru maakinu ka guru wii wuro te ta sinum mɔ wa guu ten wɔllɔ. Ma kɔba ya sumɔ tãa tãa sere tɔn be ba wãa sansani ye sɔɔ kpuro bɛrum bu mwa ba diira. 17Yera Mɔwisi u tɔn be yarama ben sansanin di bu da bu ka Gusunɔ yinna, ma ba yɔ̃ra guu ten nuurɔ. 18Wiisu Sinain guu te wukiri, domi Yinni Gusunɔ u sarama ka dɔ̃ɔ u wãa ten wɔllɔ. Wii si, su yɔɔmɔ nge dɔ̃ɔ bokon wiisu. Ma guu te, ta yĩirumɔ ka dam. 19Kɔba yen swĩi maa sosimɔ. Yera Mɔwisi u gari gerua, ma Gusunɔ u nùn wisa ka nɔɔgii te ta sãa nge guru kukiribu. 20Nge mɛya Yinni Gusunɔ u ka sarama guu ten wɔllɔ, ma u Mɔwisi soka. Yera Mɔwisi u yɔɔwa u da mi. 21Ma Yinni Gusunɔ u nùn sɔ̃ɔwa u nɛɛ, a saro a tɔn be kirɔ ko gem gem bu ku raa susima bu yĩre te sara bu man mɛɛri, kpa ben dabiru tu ku raa kam ko. 22Mɛya yãku kowobun tii, be ba ra man susi, bu de bu tii dɛɛrasia kpa n ku ra ben gabu go. 23Ma Mɔwisi u Yinni Gusunɔ sɔ̃ɔwa u nɛɛ, tɔn be, ba ǹ yɔɔmɔ guuru wɔllu mi. Domi a sun kirɔ kua gem gem a nɛɛ n bu yĩreru kuo guu ten bɔkuɔ mi ba koo yɔ̃ra. Kpa su tu garisi guu te a tii yiiye. 24Yinni Gusunɔ u nɛɛ, a saro a da kpa wunɛ ka Aroni i yɔɔma, adama yãku kowobu ka tɔn be ba tie, bu ku raa yĩre te sara bu man mɛɛri, kpa n ku ra ben gabu go. 25Ma Mɔwisi u sara u da u tɔn be gari yi sɔ̃ɔwa.

will be added

X\