Yaribu 18

1Saa ye sɔɔ, Yetoro Madianiban yãku kowo, wi u sãa Mɔwisin dokiri, u nua kpuro ye Yinni Gusunɔ u Mɔwisi ka win tɔmbu Isireliba kua sanam mɛ u bu yarama Egibitin di. 2- 3Ma u seewa u da Mɔwisin mi ka Mɔwisin kurɔ Sefora ka win bibu yiru be u raa deri wi, Yetoron mi. N deema, ye Mɔwisi u bii be mara, u turo yĩsiru kã Gɛɛsɔmu yèn sɔ̃ u wãa tem tukumɔ u ka nùn mara. 4Ma u yiruse yĩsiru kã Ɛliesɛɛ yèn sɔ̃ Gusunɔ win baaban Yinniwa u nùn somi u nùn wɔra Egibiti sunɔn nɔmun di. 5Ma Yetoro ka Mɔwisin kurɔ ka win bii be, ba tura mi Isireliba ba ben sansani gire guu te ba mɔ̀ Sinaiɔ. 6Saa yera Yetoro u Mɔwisi gɔria u nɛɛ, bu nùn sɔ̃ wee, u ka nùn win kurɔ naawa ka win bibu yiru ye. 7Ye Mɔwisi u nua mɛ, yera u yara u win dokiri sennɔ da. Ye u tura mi, ma u yiira win wuswaaɔ. Yen biru u seewa ba bɔkasina ba tɔbirina. Ma Mɔwisi u ka nùn da win dii bekurugirɔ. 8Ma u win dokiri wi saaria kpuro ye Yinni Gusunɔ u Egibitigibu ka ben sunɔ kua be Isireliban sɔ̃, ka sere nɔni swãa te ba wa swaa sɔɔ, ka nge mɛ Yinni Gusunɔ u bu yara te sɔɔn di. 9Durom mɛ Yinni Gusunɔ u Isireliba kua mi, sanam mɛ u bu yara Egibitigibun nɔman di, ya Yetoro dore. 10Yera u nɛɛ, na Yinni Gusunɔ siara wi u bɛɛ wɔra saa Egibiti sunɔ ka win tɔmbun yorun di. 11Tɛ̃ na gia ma wiya u bũnu kpuro kere. Domi u dera Egibitigibun nuku kɔ̃sura wɔri ben tii sɔɔ. 12Ma u Gusunɔ yãku dɔ̃ɔ mwaararugiru kua ka yãkunu ganu. Yera Aroni ka Isireliban guro gurobu ba na ba di ka Mɔwisin dokiri wi sannu ba ka Gusunɔ sãwa. 13Yen sisiru bururu yera Mɔwisi u sina u ka Isireliba siria, ma tɔn be, ba yɔ̃ win wuswaaɔ saa bururun di sere ka yokaɔ. 14Ye Yetoro u wa mɛ, yera u Mɔwisi sɔ̃ɔwa u nɛɛ, mba a tɔn be kuammɛ mɛ. Mban sɔ̃na a sɔ̃ wunɛ turo a bu siriammɛ saa bururun di sere ka yokaɔ. 15Ma Mɔwisi u nùn sɔ̃ɔwa u nɛɛ, tɔn be, ba naamɔwa nɛn mi, n ka bu Gusunɔ bikia ye u kĩ bu ko. 16Bà n maa gari gɛɛ mɔ ben tii tiinɛ sɔɔ kpa n bu siria n bu sɔ̃ɔsi ye Yinni Gusunɔ u kĩ. 17Yera win dokiri wi, u nɛɛ, ye a mɔ̀ mi, ya ǹ wã. 18Kaa ra tii mɛɛra kowa mi, ka sere maa tɔn be ba nun sikerenɛ mini. Domi sɔmbu te, ta kpã. A ǹ kpɛ̃ a tu ko wunɛ turo. 19Tɛ̃ a nɛn gari nɔɔwɔ, kpa Gusunɔ u nun somi. Bwisi yi kon nun kɛ̃ wee. A koowo tɔn ben wirugii Gusunɔn wuswaaɔ, kpa a n da ka ben gari de win mi. 20Kpa a bu Gusunɔn woodaba tubusia ka swaa ye ba koo swĩi, ka sɔma ye ba koo ko. 21Kpa a gabu gɔsi be sɔɔ, be ba koo kpĩ bu bu kpara kpa yɛ̃roba n sãa be ba Gusunɔ nasie, ba gem swĩi, ba ku ra nɔm biran kɛ̃nu mwɛ. Kpa a ben gabu ko tɔmbu nɔrɔbun (1.000) wirugibu, gabu maa wunɔbun (100) wirugibu, gabu weeraakurun wirugibu, gabu maa wɔkurun wirugibu. 22Beya ba ko n da tɔn be sirie baadomma kpa ba n da ka gari yi yi sɛ̃ nɛ wunɛn mi. A de bu nun wunɛn sɔmunu kawa, kpa bu ka nun sɔbe. 23À n kua mɛ, ma Gusunɔ u nun kpare swaa ye sɔɔ, kaa kura, kpa tɔn be, bu maa turi mi ba dɔɔ ka bɔri yɛndu. 24Mɔwisi u win dokirin gere wura u kua kpuro nge mɛ u nùn sɔ̃ɔwa. 25U tɔn be gɔsa Isireliba sɔɔ be ba koo sɔmbu te kpĩ. Ma u ben gabu kua tɔmbu nɔrɔbun (1.000) wirugibu, gabu maa wunɔbun (100) wirugibu, gabu weeraakurun wirugibu, gabu maa wɔkurun wirugibu. 26Bera ba ra gari yi yi ǹ sɛ̃ siri. Yi yi sɛ̃ kpa bu ka Mɔwisi daawa. 27Yen biru win dokiri u nùn nɔɔ kana ma u doona u da win temɔ.

will be added

X\