1 Isireliban wuu te kpuro ta sĩima saa gbaburun di te ba mɔ̀ Sini, ta ka ten sanum dɔɔ nge mɛ Yinni Gusunɔ u bu sɔ̃ɔwa. Ye ba tura Refidimuɔ ma ba ben sansani gira, adama ba ǹ nim wa mi, bu nɔ. 2 Miya ba Mɔwisi nɔɔ kuurim wɔri ba nɛɛ, a sun nim wɛ̃ɛyɔ su nɔ. Mɔwisi u bu sɔ̃ɔwa u nɛɛ, mban sɔ̃na i ka man nɔɔ kuurimɔ. Nge mba n kua i ka Yinni Gusunɔn laakari mɛɛrimɔ. 3 Adama nim nɔru ga tɔn be baasi gia ma ba Mɔwisi wɔkisimɔ ba mɔ̀, mban sɔ̃na a sun yarama Egibitin di. Kaa ka de nim nɔru gu sun go, bɛsɛ ka bɛsɛn bibu ka bɛsɛn yaa sabenu. 4 Ma Mɔwisi u Yinni Gusunɔ nɔɔgiru sue u nɛɛ, mba kon tɔn beni kua. Wee, ba kĩ bu man kpenu kasuku. 5 Yinni Gusunɔ u nùn sɔ̃ɔwa u nɛɛ, i saro i da i n tɔn be gbiiye wunɛ ka ben guro gurobu sannu, kpa a n wunɛn dɛka ye nɛni yè a ka daa ten nim so. 6 Wee, kon yɔ̃ra wunɛn wuswaaɔ kperu garun wɔllɔ Horɛbun guurɔ, te ba maa sokumɔ Sinai, kpa a kpee te so. Nim mu koo yari min di tɔn be, bu ka nɔ. Ma Mɔwisi u kua mɛ, Isireliban guro gurobun wuswaaɔ. 7 Yera u yam mi yĩsinu yiru kã Teera Masa domi miya Isireliba ba nùn nɔɔ kuura. Yiruse maa Mɛriba domi miya ba Yinni Gusunɔn laakari mɛɛra ba nɛɛ, Yinni Gusunɔ u wãa bɛsɛn suunu sɔɔ? Nge u sari. 8 Sanam mɛ sɔɔra Amalɛkiba ba na ba Isireliba tabu wɔri Refidimuɔ. 9 Yera Mɔwisi u Yosue sɔ̃ɔwa u nɛɛ, a durɔbu gabu gɔsio kpa i yari i da i ka Amalɛkiba tabu ko sia. Nɛn tii kon da n yɔ guuru wɔllɔ na n dɛka ye sue wɔllɔ ye Gusunɔ u nɛɛ, na n nɛni. 10 Yosue u Amalɛkiba tabu wɔri nge mɛ Mɔwisi u nùn sɔ̃ɔwa. Ma Mɔwisi ka Aroni ka Huri ba da guu ten wɔllɔ. 11 Mɔwisi ù n win nɔma sue wɔllɔ, Isireliba ba ra n kamiamɔwa, adama ù n ye sura temɔ, Amalɛkibara ba ra n bu kamiamɔ. 12 Mɔwisin nɔma ya mɔnya ma ba kperu garu sua ba yi win kɔkɔrɔ ma u tu sinari. Ma Aroni ka Huri ba win nɔma sue wɔllɔ, turo nɔm geuɔ, turo maa nɔm dwarɔ. Ma win nɔma suare wɔllɔ dim dim sere sɔ̃ɔ ka dua. 13 Ma Yosue u Amalɛki ka win tɔmbu kamia mam mam. 14 Ma Yinni Gusunɔ u Mɔwisi sɔ̃ɔwa u nɛɛ, a yeni yoruo tireru sɔɔ i ka ye yaaya, kpa a Yosue sɔ̃ ma kon de bu Amalɛkiba duari mam mam handunia sɔɔ. 15 Yen biru Mɔwisi u yãku yeru gira ma u tu yĩsiru kã Yinni Gusunɔwa nɛn tuuta. Domi wiya u bu nasara wɛ̃. 16 U nɛɛ, yèn sɔ̃ Amalɛkiba ba Yinni Gusunɔ seesi, yen sɔ̃na u koo ka bu tabu ko sere ka baadommaɔ.
