1 Saa yera Mɔwisi ka Isireliba ba Yinni Gusunɔ siarabun womu kua. Ba nɛɛ, kon Yinni Gusunɔ tɔma ka womu domi u win wɛrɔbu tabu di. U dumi ka yin maasɔbu sure nim wɔ̃ku sɔɔ. 2 Yinni Gusunɔwa nɛn dam, wiya na siaramɔ ka nɛn womu. Wiya u man faaba kua. Wiya nɛn Yinni, kon nùn bɛɛrɛ wɛ̃. Wiya nɛn baaban Yinni, kon nùn wɔlle sua. 3 U sãawa tabu kowo ka gem. Win yĩsira Yinni Gusunɔ. 4 U Egibiti sunɔn tabu kɛkɛba ka win tabu kowo damgibu sure nim wɔ̃ku sɔɔ ge ba mɔ̀ Naa yari. Win tabu kowo gisonkoba ba nim diira. 5 Nim mɛ, mu bu wukiri, ma ba numa temɔ nge kperu. 6 Yinni Gusunɔ, wunɛn nɔm geu ga dam yiikogim mɔ. Geya ga wunɛn wɛrɔbu munka muku muku. 7 Wunɛn sinandun kpãaru ta ra wunɛn wɛrɔbu taare. Wunɛn mɔru yà n seewa, a ra de bu dɔ̃ɔ mwaarewa nge wĩi. 8 A wɛ̃ru wura ma nim mu kpaasina mu sinum kua bera ka bera nge gbãraru. 9 Wɛrɔ u nɛɛ, u koo bu naa swĩi kpa u bu naamwɛ. U koo mɔru kɔsia be sɔɔ nge mɛ u kĩ, kpa u takobi woma u bu go ka win nɔma, kpa u ben dukia bɔnu ko. 10 Adama a wunɛn wom wɛ̃sia, ma nim mu bu wukiri. Ba numa ba kpuna nge dɔ̃ɔ kpenu mi nim mu duku. 11 Yinni Gusunɔ, mba n ka nun weenɛ ye tɔmba sãamɔ kpuro sɔɔ. Mba n ka nun dɛɛraru nɛ, wunɛ wi a nanum mɔ. Mba n ka nun weenɛ, wunɛ wi ba koo siara. Mba n ka nun weenɛ, wunɛ wi a ra sɔm maamaakiginu ko. 12 Domi a wunɛn dam sɔ̃ɔsi, ma tem bu mwɛ. 13 Wunɛn wɔnwɔndu sɔɔra a wunɛn tɔmbu swaa sɔ̃ɔsi be a yakia. A maa bu kparama ka wunɛn dam a ka dɔɔ sere wãa yee te a bu nɔɔ mwɛɛru kua sɔɔ. 14 Tɔn tukobu ba ye nua, ma ba diirumɔ. Filisitiba ba bɛrum soora. 15 Edɔmun sinambun toronu kara. Ma Mɔabun tabu durɔbu ba diirumɔ. Kananiba kpuro, ben wasi dwiiya. 16 Bɛrum ka nandabu koo bu deema subaru sɔɔ. Wunɛn dam saabu ba koo mari sɔ̃ɔ sɔ̃ɔ nge kperu. Sere wunɛn tɔn be a yakia yorun di bu ka nim wɔ̃ku tɔbura, Yinni Gusunɔ. 17 Kaa ka bu da kpa a bu tãsisia wunɛn tiin guuru wɔllɔ, mi a wunɛn wãa yeru sɔɔru kua. Tera ta sãa wunɛn sãa yeru te a tii kua. 18 Wunɛ Yinni Gusunɔ, kaa n bandu diiwa ka baadommaɔ. 19 Sanam mɛ Egibiti sunɔn dumi ka win tabu kɛkɛba ka maasɔbu ba dua nim wɔ̃ku sɔɔ, Yinni Gusunɔ u dera nim mu wurama mu bu wukiri. Adama u dera tem mu gbera nim wɔ̃ku gen suunu sɔɔ, ma Isireliba ba tɔbura. 20 Yen biruwa Aronin sesu Mariamu wi u sãa Gusunɔn sɔmɔ, u bara kpãru sua ma tɔn kurɔbu kpuro ba nùn swĩi ba bara kpãnu soomɔ ba yaamɔ. 21 Mariamu u bu womu geni kua u nɛɛ, i Yinni Gusunɔ tɔmɔ ka womu, domi u nasara wa ka win yiiko. Dumi ka yin maasɔbu u sure nim wɔ̃ku sɔɔ. 22 Yen biru Mɔwisi u Isireliba kpara saa nim wɔ̃ku ge ba mɔ̀ Naa yarin di ba da gbaburɔ te ba mɔ̀ Suri. Sɔ̃ɔ itawa ba sĩa gbabu te sɔɔ ba ǹ nim wa. 23 Ma ba tura Maraɔ adama nim mɛ ba wa mi, mu sosu, ba ǹ kpĩa bu nɔ. Yen sɔ̃na ba yam mi soka Mara. Yen tubusiana sosura. 24 Ma tɔn be, ba Mɔwisi wɔkisi ba nɛɛ, mba sa ko nɔ. 25 Mɔwisi u Yinni Gusunɔ nɔɔgiru sue. Ma Yinni Gusunɔ u nùn dɛka gaa sɔ̃ɔsi. Ye u dɛka ye sua u kare nim mɛ sɔɔ, ma mu dora. Miya Yinni Gusunɔ u win tɔmbu woodaba wɛ̃ ka woronu. Miya u maa ben laakari mɛɛra. 26 U nɛɛ, ì n nɛ Gusunɔ bɛɛn Yinnin gere nua sãa sãa, ma i mɔ̀ ye n man wɛ̃re ma i nɛn woodaba mɛm nɔɔwa, na ǹ ka bɛɛ bara ni sɛɛyasiamɔ ni na Egibitigibu kpɛ̃ɛ. Nɛna Yinni Gusunɔ nɛ wi na ra n bɛɛ bɛkiamɔ. 27 Yen biru ba tura Elimuɔ mi nim bwii wɔkura yiru ya wãa ka kpakpa bɛ̃ɛ wata ka wɔkuru. Ma ba ben sansani gira bwii yin bɔkuɔ.
