Yaribu 14

1Yen biru Yinni Gusunɔ u Mɔwisi sɔ̃ɔwa u nɛɛ, 2a Isireliba sɔ̃ɔwɔ bu wuro Piha Hirotun bera gia bu ben sansani gira Migidoli ka nim wɔ̃kun baa sɔɔ, Baali Sefonin deedeeru. Miya i ko gina yɔ̃ra nim wɔ̃kun bɔkuɔ, 3kpa Egibiti sunɔ u n tamaa bɛɛ Isireliba i kɔ̃ɔrawa tem mɛ sɔɔ, mi gbaburu ta bɛɛ sikerenɛ, 4kpa n win gɔ̃ru bɔbiasia u bɛɛ naa swĩi. Adama kon wi ka win tabu kowobu dendi n ka nɛn yiiko sɔ̃ɔsi kpa Egibitigibu bu ka gia ma nɛna Yinni Gusunɔ. Ma Isireliba ba kua mɛ. 5Sanam mɛ ba Egibiti sunɔ sɔ̃ɔwa ma tɔn be, ba yakurawa, yera wi ka win bwãabu ba ben himba gɔsia. Ba nɛɛ, mban bwesera sa kua mini. Domi sa dera Isireliba ba bɛsɛn yoru yara ba doona. 6Ma Egibiti sunɔ u win tabu kɛkɛ sɔɔru kua ka win tabu kowobu sannu. 7U tabu kɛkɛ nata (600) sua yi yi gia sãa ka sere Egibitin tabu kɛkɛba kpuro, yen baayere ka yen tabu kowo damgii. 8Saa yera Yinni Gusunɔ u sunɔ win gɔ̃ru bɔbiasia, ma u Isireliba naa gira baa mɛ u yɛ̃ ma Yinni Gusunɔwa u bu yara. 9Egibitigibun tabu kowobu ka ben maasɔbu ka dumi, ka tabu kɛkɛba ba bu naa gira ma ba bu naamwɛ mi ba yɔ̃ra nim wɔ̃kun bɔkuɔ ba ben sansani gira Piha Hirotun bera gia Baali Sefonin deedeeru. 10Sanam mɛ Egibiti sunɔ u turuku kua, Isireliba ba nɔni seeya ba wa wee, Egibitigiba kɛkua ba wee. Ma bɛrum bu mwa gem gem, ma ba Yinni Gusunɔ nɔɔgiru sue. 11Ba Mɔwisi sɔ̃ɔwa ba nɛɛ, siku yeru sariwa Egibitiɔ? Yen sɔ̃na a ka sun na su gbi gbaburu mini? A wa ye a ka sun deema ye a sun yarama Egibitin di? 12Sa ǹ daa nun sɔ̃ɔwa mɛ Egibitiɔ sa nɛɛ, a sun derio su Egibitigibu yoru diiya? Domi sa kĩru bo su bu yoru diiya ka sere ye sa ko gbi gbaburu mini. 13Yera Mɔwisi u tɔn be wisa u nɛɛ, i ku bɛrum ko, i yɔ̃ro sɛ̃ɛ, kpa i wa nge mɛ Yinni Gusunɔ u koo bɛɛ faaba ko gisɔ. Domi Egibitigii be i waamɔ mini, i ǹ maa bu wasi sere ka baadommaɔ. 14I yɔ̃ro sɛ̃ɛ, Yinni Gusunɔwa u koo bɛɛ sanna. 15Ma Yinni Gusunɔ u Mɔwisi bikia u nɛɛ, mban sɔ̃na i man nɔɔgiru mɔ̀. A Isireliba sɔ̃ɔwɔ bu seewo bu da wuswaaɔ. 16Wunɛ maa, a wunɛn dɛka suo a tĩi nim wɔ̃ku wɔllɔ kpa gu bɔnu ko yiru Isireliba bu ka du bu tɔbura ge sɔɔ, ga n tem gbere. 17Nɛna kon Egibitigibun gɔ̃rusu bɔbiasia bu ka bu swĩi mi. Kpa n ben sunɔ kamia ka win tabu kowobu ka win tabu kɛkɛba ka win maasɔbu, kpa bu nɛn yiiko wa. 18Saa ye sɔɔra ba koo gia ma nɛna na Yinni Gusunɔ. 19Sanam mɛ sɔɔ, Gusunɔn gɔrado wi u Isireliba gbiiye u gɔsira ben biru gia ma guru wii wuro te, te ta raa bu gbiiye, ta maa wurama biruɔ. 20Ma ta da Egibitigibu ka Isireliban sansani yiru yen baa sɔɔ. Ta yam tĩri Egibitigibun bera gia ma ta yam buriri Isireliban mi gia. Ma Isireliba ka Egibitigibu ba ǹ susinɛ wɔ̃ku te kpuro. 21Ye ba tura nim wɔ̃ku gen mi, yera Mɔwisi u win dɛka tĩi gen wɔllɔ ma Yinni Gusunɔ u woo damguu seeya sɔ̃ɔ yari yerun di wɔ̃ku giriru sɔɔ, ga dera nim wɔ̃ku gen nim mu bɔnu kua yiru, ma gen suunu sɔɔ mi, n gbera. 22Nim mu kpaasinɛ bera ka bera ben nɔm geuɔ ka nɔm dwarɔ. Ma Isireliba ba sĩa tem gbebum sɔɔ, ba tɔbura. 23Egibitigibu ba bu naa swĩi ba dua nim wɔ̃ku gen suunu sɔɔ, ka ben sunɔn dumi ka win tabu kɛkɛba ka win maasɔbu. 24Ye n kua buru buru yellu, ma Yinni Gusunɔ u bu mɛɛrima saa guru wii wuro ten min di, ma u bu nandasia. Be kpuro ba yɔ̃suna. 25U dera ben kɛkɛban naasu wɔɔramɔ, ba kpana bu sĩ fuuku. Ma ba nɛɛ, su duki gɔsira Isireliban min di, domi Yinni Gusunɔ u ka sun sannamɔwa ben sɔ̃. 26Ma Yinni Gusunɔ u kpam Mɔwisi sɔ̃ɔwa u nɛɛ, a wunɛn dɛka tĩiyɔ nim wɔ̃ku mi, kpa nim mɛ, mu wurama mu Egibitigibu ka ben tabu kɛkɛba ka maasɔbu wukiri. 27Mɔwisi u win dɛka ye tĩi nim wɔ̃ku gen mi. Ye n kua yam sãreru, ma nim mɛ, mu wurama nge mɛ mu raa sãa. Egibitigibu ba kĩ bu nim mɛ suuri, adama Yinni Gusunɔ u bu sure mɛn suunu sɔɔ. 28Nim mɛ, mu wurama mu Egibiti sunɔn tabu kɛkɛba ka win maasɔbu ka tabu kowobu kpuro wukiri be ba Isireliba naamwɛm da nim wɔ̃ku gen suunu sɔɔ. Baa ben turo, u ǹ yara. 29Adama Isireliba ba sĩa tem gbebum sɔɔ nim wɔ̃ku gen suunuɔ. Domi nim mu kpaasinɛwa bera ka bera ben nɔm geuɔ ka nɔn dwarɔ. 30- 31Ye Isireliba ba sɔm damgiru wa te Yinni Gusunɔ u Egibitigibu koosi ma ba ben gonu wa nim wɔ̃kun goorɔ, yera ba gia ma Yinni Gusunɔwa u bu faaba kua dɔma te, saa Egibitigibun nɔman di. Ma ba nùn nasia ba sosi, ba nùn naanɛ kua ka maa win gɔro Mɔwisi.

will be added

X\