Yaribu 11

1N deema Yinni Gusunɔ u raa Mɔwisi sɔ̃ɔwa u nɛɛ, n tie wahala tia ye kon Egibitigibu ka ben sunɔ doke. Yera ya koo de u bɛɛ yɔ̃su. U koo mam bɛɛ girawa minin di ka dam. 2A tɔn durɔ ka tɔn kurɔ baawure sɔ̃ɔwɔ u bura yãa wuraginu ka sii geesuginu kana win beruse Egibitigiin mi. 3N deema Yinni Gusunɔ u dera Egibitigibu ba ka Isireliba nɔnu geu mɛɛra. Mɔwisi u maa sãa tɔn boko sunɔn bwãabu ka Egibitigii be ba tien nɔni sɔɔ. 4Mɔwisi u sere doona Egibiti sunɔn min di, u nùn sɔ̃ɔwa u nɛɛ, amɛniwa Yinni Gusunɔ u gerua. Wɔ̃kurun bɔnun sakawa u koo Egibitin tem bukiana. 5Bii yerumaba kpuro ba koo gbi, saa wunɛn bii yeruman di, wi u koo wunɛn sina gɔna tubi di sere ka yoo tɔn kurɔn bii tɔn durɔ gbiikoowɔ. Yaa sabenun bii gbiikii dwanu nu koo maa gbi. 6Wuri bɛkɛ yi ko n wãa Egibitin tem kpuro sɔɔ dɔma te, yìn bweseru yi ǹ koore. Mɛya yi ǹ koo maa wure yi ko. 7Adama bɛsɛ Isireliban mi, baa bɔ̃ɔ ga ǹ sun worimɔ sere ka bɛsɛn yaa sabenɔ, kpa i n ka yɛ̃ ma Yinni Gusunɔ u sun wunanɛ ka bɛɛ Egibitigibu. 8Ma Mɔwisi u kpam nɛɛ, wunɛn bwãabu kpuro ba koo na bu kpuna nɛn wuswaaɔ bu man sɔ̃ bu nɛɛ, n yario ka nɛn tɔmbu kpuro be ba man swĩi. Yen biru na kon den yari n doona. Ye u gari yi gerua u kpa, ma u yara Egibiti sunɔn min di ka mɔru baka. 9Yinni Gusunɔ u raa nùn sɔ̃ɔwa u nɛɛ, Egibiti sunɔ kun wunɛn gari swaa dakimɔ. Yera ya koo de n maa sɔm maamaakiginu ganu ko Egibitin temɔ. 10Mɔwisi ka Aroni ba sɔm maamaakigii ni kpuro kua Egibiti sunɔn wuswaaɔ adama Yinni Gusunɔ dera win gɔ̃ru ga bɔbia ma u ǹ wure Isireliba bu doona win tem di.

will be added

X\