Yaribu 10

1- 2Yinni Gusunɔ u kpam Mɔwisi sɔ̃ɔwa u nɛɛ, na dera Egibiti sunɔ ka win bwãabun gɔ̃rusu bɔbia, kpa n ka nɛn yĩre ni sɔ̃ɔsi ben suunu sɔɔ. Kpa wunɛn tii a ka wunɛn bibu ka wunɛn debuminu sɔ̃ nge mɛ na ka Egibitigibu yaakoru kua, ka yĩre ni na sɔ̃ɔsi ben suunu sɔɔ kpa i n ka yɛ̃ ma nɛna Gusunɔ wi u ra n wãa. Ǹ n mɛn na, a doo Egibiti sunɔn mi. 3Mɔwisi ka Aroni ba da sunɔ win mi, ba nɛɛ, amɛniwa bɛsɛ Heberuban Gusunɔ wi u ra n wãa u gerua. U nɛɛ, sere domma kaa n yinɛ a tii kawa win wuswaaɔ. A de win tɔmbu bu doona bu nùn sã. 4À n maa yina a bu kara, wee, sia u koo de twee yi na wunɛn tem kpuro sɔɔ. 5Yi koo tɛria yi tem wukiri. Baa tem bau ba ǹ wasi. Yi koo dĩa ni nu tie di ni guru kpenu kun sanka, kpa yi bɛɛn gbean dãa wurusu kpuro di. 6Yi koo wunɛ ka wunɛn bwãabu ka Egibitigibu kpuron dia duuri yi yibu. Wunɛn baababa ka wunɛn sikadoba ba ǹ yen bweseru waare saa mìn di ba wãa handunia sɔɔ sere ka gisɔ. Ma Mɔwisi u seewa u yara Egibiti sunɔn min di. 7Yera Egibiti sunɔn bwãaba nùn bikia ba nɛɛ, sere domma durɔ wini u ko n sun wahala mɔ̀. A de tɔn be, bu doona bu da bu Gusunɔ ben Yinni sã. A ǹ wa ma bɛsɛn tem mu kam kobu dɔɔ? 8Ma ba dera Mɔwisi ka Aroni ba wurama Egibiti sunɔn mi. Ye ba tura mi, yera u bu sɔ̃ɔwa u nɛɛ, i doo i Gusunɔ bɛɛn Yinni sã, adama bɛɛ sɔɔ berà ba koo da. 9Mɔwisi u wisa u nɛɛ, bɛsɛ kpurowa, bibu ka bukurobu ka bɛsɛn yaa sabenu. Sanna sa ko da. Domi tɔ̃ɔ bakara sa ko Yinni Gusunɔ kua. 10Ma Egibiti sunɔ u bu yaakoru kua u nɛɛ, Yinni Gusunɔ u ka bɛɛ da baani, nà n dera i da ka bɛɛn kurɔbu ka bibu. Domi gãa kɔ̃suna i bwisikumɔ. 11Adama bɛɛ tɔn durɔbu tɔnawa i ko da. Domi mɛya i bikia. Yera u dera ba bu gira win min di. 12Ma Yinni Gusunɔ u Mɔwisi sɔ̃ɔwa u nɛɛ, a wunɛn dɛka suo a tĩi Egibitin tem sɔɔ kpa twee yi na yi tem mɛ wukiri, yi kpuro di ye ya kpia mi, ye guru kpenu nu deri. 13Yera Mɔwisi u win dɛka ye sua u tĩi mi. Ma Yinni Gusunɔ u dera woo gaga seema saa sɔ̃ɔ yari yerun di tem mɛ sɔɔ. Woo ge, ga kuawa saa sɔ̃ɔ sɔɔn di sere ka wɔ̃kuru kpuro. Sisi bururu ba deema twee wee yam kpuro yi woo ge, ga ka na. 14Twee yi, yi na wuunu ka wuunu yi pusa Egibitin tem baama. Yi dabia yi sara yi ba raa waare. Mɛya ba ǹ maa yin bweseru wasi. 15Tem kpuro mu tĩra twee yin saabu. Ma yi yakasu ka dãa binu kpuro di, ni guru kpenu kun daa sanka. Wuru gaga kun maa tie Egibitin tem sɔɔ dãaɔ ka dãa kikisɔ. 16Yera Egibiti sunɔ u Mɔwisi ka Aroni sokusia fuuku u nɛɛ, na Gusunɔ bɛɛn Yinni tora, mɛya, na maa bɛɛn tii tora. 17Tɛ̃, i man suuru kuo nɔn tee teni kpa i Gusunɔ bɛɛn Yinni kana u man wahala gɔɔgia yeni wunari. 18Ma Mɔwisi u yara min di u da u Yinni Gusunɔ suuru kana. 19Yera Yinni Gusunɔ u dera woo damguu ga seema saa sɔ̃ɔ duu yerun di ga ka twee yi doona ga gure nim wɔ̃ku sɔɔ ge ba mɔ̀ Naa yari. Baa yin tia kun tiare tem mɛ kpuro sɔɔ. 20Adama Yinni Gusunɔ u kpam dera Egibiti sunɔn gɔ̃ru ga bɔbia, u ǹ wure Isireliba bu doona. 21Yen biru Yinni Gusunɔ u Mɔwisi sɔ̃ɔwa u nɛɛ, a wunɛn dɛka tĩiyɔ wɔllɔ kpa yam wɔ̃ku sinumgiru tu Egibitin tem wukiri, sere bu tu baba. 22Yera Mɔwisi u win dɛka ye tĩi wɔllɔ ma yam wɔ̃kura kua Egibitin tem kpuro sɔɔ sɔ̃ɔ ita. 23Egibitigiba kun waanamɔ, goo kun seere win yɛnun di sere sɔ̃ɔ ita ye. Adama mi Isireliba ba wãa kpuro, yam bururam mu wãawa. 24Egibiti sunɔ u Mɔwisi sokusia u nɛɛ, i doo i Yinni Gusunɔ sã ka bɛɛn kurɔbu ka bibu sannu. Adama i ku ka bɛɛn yaa sabenu da. 25Mɔwisi u wisa u nɛɛ, ǹ n mɛn na, a sun yaa sabenu wɛ̃ɛyɔ domi n ǹ koo koora sa kun nu mɔ su ka Gusunɔ bɛsɛn Yinni yãku dɔ̃ɔ mwaararuginu ka yãkunu ganu kua. 26Yen sɔ̃, sa ko ka bɛsɛn yaa sabenu dawa, baa samu sa ǹ derimɔ. Domi miya sa ko gɔsi ye sa ko ka nùn sã. Sa ǹ maa gina yen geeru yɛ̃ ka yen ye sa ko gɔsi sere sà n tura mi. 27Adama Yinni Gusunɔ u dera Egibiti sunɔn gɔ̃ru ga bɔbia, u ǹ wure bu doona. 28Ma sunɔ wi, u Mɔwisi sɔ̃ɔwa u nɛɛ, a gɛsiro nɛn bɔkun di. A ku ra maa na nɛn wuswaaɔ, domi dɔma te na maa nun wa, a guwa. 29Mɔwisi u nɛɛ, too, ya wã, a ǹ maa man wasi.

will be added

X\