Yaribu 1

1Yakɔbu wi ba maa sokumɔ Isireli, win bibun yĩsa wee, be ba ka nùn na Egibitiɔ, ben baawure ka win kurɔ ka bibu. 2Beya Rubɛni ka Simɛɔ ka Lefi ka Yuda 3ka Isakari ka Sabuloni ka Bɛnyamɛɛ 4ka Danu ka Nɛfitali ka Gadi ka Asɛɛ. 5Yakɔbun bibu ka win debumii ni, ba sãawa tɔnu wata ka wɔkuru. N deema Yosɛfu, wi, u wãa Egibitiɔ sanam mɛ. 6Sanam dɔɔ sanam wure Yosɛfu ka win maabu ka be ba wãa win waati sɔɔ kpuro ba gu. 7Ma Isirelin bii be, ba marura ba dabia ba tɛria ba yiba tem mɛ sɔɔ ba kua damgibu. 8Yen biru sunɔ kpao u bandu di wi u kun Yosɛfun wãarun gari gɛɛ yɛ̃. 9Yera u win tɔmbu sɔ̃ɔwa u nɛɛ, Isireliba wee, ba sun dabiru kere ba maa sun dam kere. Ǹ n mɛn na, kari baka sa tii derie. 10Tabu bù n da seewa ba koo bɛsɛn wɛrɔbu somi bu ka sun tabu ko. Bà n kpa bu sere sun kisirari bu doona. Yen sɔ̃, i de su bu bwisi gɛɛ kasua su ka ben marubu yɔ̃rasia kpa bu ku maa dabiru sosi. 11Ma ba bu sɔman wirugibu gɔsia be ba koo bu yoo sɔm sɛ̃sɔginu koosia. Nge mɛya ba kua ba ka wuu marosu bana si ba sokumɔ Pitomu ka Ramusɛsi, si su kua Egibiti sunɔn dukia beru yenu. 12Adama nge mɛ ba bu nɔni sɔ̃ɔmɔ, nge mɛya ba maa dabiamɔ ba sosimɔ. Ma Egibitigibu ba bu tusa n banda. 13Ma ba bu yoo sɔmburu doke. 14Ba birikiba muramɔ ka sɔndu, ba maa gbee sɔma baayere mɔ̀. Ma ben wãara sɛ̃sia domi ka nuku kɔ̃sura ba ka bu sɔma ye kpuro koosiamɔ. 15Ma Egibiti sunɔ u Heberuban marusio beni, Sifira ka Pua sɔ̃ɔwa u nɛɛ, 16ì n Heberuban kurɔbu marusiamɔ, ì n wa bii tɔn durɔwa ba mara, i nùn goowo. Ǹ n tɔn kurɔn na, i nùn derio u n wãa. 17Adama marusio be, ba Gusunɔ nasie. Yen sɔ̃na ba ǹ kue nge mɛ sunɔ wi, u bu yiire. Ba bii be kpuro deriwa. 18Ma u bu soka u nɛɛ, mban sɔ̃na i ka kua mɛ, i dera bii be, ba wãa. 19Marusio be, ba nùn wisa ba nɛɛ, Heberuban kurɔbu ba ǹ sãa nge Egibitigibu. Ben wasi yi sãu. Ba ra mawa su sere tunuma. 20- 21Ma Gusunɔ u marusio be durom kua u ben tii bibu kã yèn sɔ̃ ba nùn nasie. Mɛya maa Heberu be, ba dabiamɔ ba dam sosimɔ. 22Ma Egibiti sunɔ u win tɔmbu kpuro wooda wɛ̃ u nɛɛ, i Heberuban bii wɛ̃ɛ tɔn durɔbu kpuro kpɛ̃ɛyɔ daa baka te ba mɔ̀ Nilu sɔɔ, kpa i bii wɛ̃ɛ tɔn kurɔbu deri.

will be added

X\