Ɛsitɛɛ 6

1Yen wɔ̃ku te, sina boko u kpana u dweeya. Yera u nɛɛ, bu nùn ben tem garin tirenu tama. Tire ni sɔɔra ba ra yore ye n koora kpuro ben tem sɔɔ. Ma ba ka nùn tire ni naawa ba nùn garia. 2Ma ba girari mi sina bokon sɔm kowobu Bigitani ka Terɛsi ba raa nɔɔ tia kua bu ka sina boko go. Ma Maadose u ye sina boko dɔmɛya. 3Yera sina boko u bikia u nɛɛ, ba sere Maadose wɔlle sua gari yin sɔ̃? Ma sɔm kowo be, ba wisa ba nɛɛ, aawo, ba ǹ nùn gãanu kue. 4Sina boko u bikia u nɛɛ, wara u wãa sina kpaaru mi. N deema saa yera Hamani u duumam sisi u ka sina boko kana u Maadose sãarusia dãa ye u sɔɔru kuan wɔllɔ. 5Yera sina bokon sɔm kowo be, ba nùn wisa ba nɛɛ, Hamaniwa u wãa mi. Ma sina boko u nɛɛ, u duuma. 6Yera Hamani u dua. Ma sina boko u nùn bikia u nɛɛ, amɔna kon yɛ̃ro kua wi na kĩ n wɔlle sua. Yera Hamani u tii sɔ̃ɔwa u nɛɛ, wara sina boko u koo maa wɔlle sua n kere nɛ. Ma u wisa u nɛɛ, 7yinni, à n kĩ a goo wɔlle sua, 8a de bu wunɛn tiin yaberu sua ka wunɛn tiin duma ye ba sina furɔ dokea wirɔ. 9Kpa a de wunɛn sɔm kowo damgii turo u durɔ wi sina yãa ni sebusia kpa u nùn yɔɔsia wunɛn duman wɔllɔ. Kpa u ka nùn da wuu suunuɔ u n gerumɔ u n mɔ̀, wee nge mɛ sina boko u ra yɛ̃ro kue wi u wɔlle sua. 10Yera sina boko u Hamani sɔ̃ɔwa u nɛɛ, tɛ̃, a seewo a yãa ni ka duma ye sua kpa a Yuu wi kua nge mɛ a gerua mi. Baa yen gãa piibu a ku ra duari. U wãa sina kpaa kɔnnɔwɔ u sɔmburu mɔ̀ mi. 11Ye Hamani u da u yãa ni suama ka duma ye, yera u nu Maadose sebusia. Ma u nùn yɔɔsia duma yen wɔllɔ u ka nùn da wuu suunuɔ u gerumɔ u mɔ̀, wee nge mɛ sina boko u ra yɛ̃ro kue wi u wɔlle sua. 12Yen biru, Maadose u gɔsira u wura sina kpaa kɔnnɔ mi. Ma Hamani u maa doona fuuku win yɛnuɔ, u tuke sekurun sɔ̃. 13Ye u tura mi, u ye kpuro win kurɔ Serɛsi ka win bɔrɔba saaria. Ma ba nùn bwisi kã ba nɛɛ, Maadose wi, Yuuwa. Ma win wuswaaɔra ba nun sekuru doken torua mɛ, a n yɛ̃ ma kaa n kaaramɔwa a n dɔɔ. 14Sanam mɛ ba gari gerumɔ ba ǹ kpa, yera sina bokon sɔmɔbu ba tunuma, ma ba yande Hamani sua ba ka da Ɛsitɛɛn tɔ̃ɔ baka dii yerɔ.

will be added

X\