1 Nɔɔ bɔku ten sɔ̃ɔ itase, yera Ɛsitɛɛ u win sina yãnu sebua. Ma u da sina kpaarɔ. Ye u dua ten sɔɔwɔ, u deema sina boko u sɔ̃ win sina kitarɔ u kɔnnɔ mɛɛra. 2 Sanam mɛ u Ɛsitɛɛ wa u yɔ̃ win yɛnu ge sɔɔ, yera u ka nùn nɔnu geu mɛɛra. Ma u nùn win sina dɛka tĩi ye ba kua ka wura. Ma Ɛsitɛɛ u susi u dɛka yen sɛ̃ru baba. 3 Ma sina boko u nùn bikia u nɛɛ, Ɛsitɛɛ, mban sanuma a mɔ̀. A man sɔ̃ɔwɔ ye a kĩ n nun kua. Na sɔɔru kpa n ka nun kpuro wɛ̃, baa ǹ n nɛn tem bɔnun na. 4 Ma Ɛsitɛɛ u nɛɛ, yinni, à n ka man nɔnu geu mɛɛran na, na kĩwa wunɛ ka Hamani i na nɛn mi. Domi na tɔ̃ɔ baka dim sɔɔru kua mi, bɛɛn sɔ̃. 5 Yera sina boko u gɔra bu Hamani sokuma fuuku bu ka da Ɛsitɛɛn mi. Ye Hamani u na, yera be yiru ye kpuro ba da ba tɔ̃ɔ baka dim mɛ di. 6 Sanam mɛ ba tam nɔrumɔ, yera sina boko u Ɛsitɛɛ sɔ̃ɔwa u nɛɛ, mba a kĩ a man kana. Na sɔɔru kpa n ka nun kua ye a kĩ baa ǹ n nɛn tem bɔnun na, kon nun wɛ̃. 7 Ma Ɛsitɛɛ u wisa u nɛɛ, yinni, wee ye na kĩ a man kua. 8 À n ka man nɔnu geu mɛɛra, ma a sɔɔru sãa a ka man kua ye na kĩ, kon maa tɔ̃ɔ baka dim sɔɔru ko sia, kpa i wurama wunɛ ka Hamani i di. Saa ye sɔɔra kon nun sɔ̃ ye na kĩ. 9 Yen tɔ̃ɔ te, Hamani u yara Ɛsitɛɛn yɛnun di ka nuku dobu. Adama ye u tura kɔnnɔwɔ, u wa Maadose kun seewe u nùn bɛɛrɛ wɛ̃. Ma u mɔru bɛsira gem gem. 10 Adama u tii nɛnua u da yɛnuɔ. Yera u win bɔrɔba ka win kurɔ Serɛsi sokusia. 11 Ma u tii sua gari gerua tɔn be kpuron wuswaaɔ, win dukia baka ka win bii tɔn durɔ dabi te u maran sɔ̃ ka sere girima ye sina boko u nùn doke u ka nùn kua win sina asakpɔbu kpuron wirugii. 12 Yera u nɛɛ, nɛ turowa Ɛsitɛɛ, sina bokon kurɔ u soka n ka sina boko yɔ̃siri tɔ̃ɔ baka dim mɛ u sɔɔru kuan sɔ̃. Nɛ turo wiya u maa nɛɛ, n sina boko yɔ̃sirima sia su ka kpam di win mi. 13 Adama yeniba kpuro ya ǹ ko n man sãa gãanu nà n Maadose Yuu wi waamɔ u wãa sina kpaa kɔnnɔ mi. 14 Yera win bɔrɔ be, ka win kurɔ wi, ba nùn bwisi kã ba nɛɛ, a doo a dãru garu gira tèn gunum mu sãa gɔm soonu weeraakuru kpa a sina boko kana bu Maadose sɔku bu sãarusia mi. Saa ye sɔɔ, kaa kpĩ a tɔ̃ɔ baka dim mɛ di ka nuku dobu. Yera gari yi, yi Hamani dore. Ma u dera ba dãa te sɔɔru kua.
