Ɛsitɛɛ 4

1Ye Maadose u nua ye ya kooramɔ, yera u win yaberu nɛnua u karana. Ma u saaki sebua u torom wisi wirɔ nuku sankirarun sɔ̃. Yen biru, u da wuu suunu sɔɔ, u nuku sankirarun kuuki mɔ̀ ka dam. 2Ma u da sere sina bokon kɔnnɔwɔ, baa mɛ ba ra yinɛ wi u saaki sebua u da mi. 3Tem mɛ kpuro sɔɔ, mi Yuuba ba sina bokon wooda yen gari nua, ba ra nuki sankirewa. Kpa bu nɔɔ bɔke, ba n weeweenu mɔ̀ ba n sumɔ. Ben gabu ba n kpĩ ba n saaki sebua, ba n torom wisi wirɔ nuku sankira ten sɔ̃. 4Ɛsitɛɛn sɔm kowobu ba na ba nùn ye sɔ̃ɔwa. Ma u nanda gem gem. Ma u ka yãnu gɔra bu Maadose sebusia kpa u win saaki ye pota. Adama Maadose u yina. 5Yera Ɛsitɛɛ u Hataki win sɔm kowo turo wi sina boko u nùn deria gɔra Maadosen mi, u nùn bikia ye n nùn mɔ̀. Mban sɔ̃na u mɔ̀ mɛ. 6Ma Hataki u seewa u da Maadosen mi, sina bokon kɔnnɔwɔ. 7Yera Maadose u nùn sɔ̃ɔwa kpuro ye ya koora, ka gobi yi Hamani u koo doke sina bokon arumani beru yerɔ bà n Yuuba go ba kpa. 8Ma u maa nùn sina bokon wooda ye ya gerumɔ bu Yuuba gon tireru wɛ̃, te ba yara Susiɔ. Ma u nùn kana u Ɛsitɛɛ ye kpuro sɔ̃. Kpa u be da u sina boko suuru kana u ka Yuuban bweseru deri. 9Ma Hataki u da u ye kpuro Ɛsitɛɛ sɔ̃ɔwa. 10Yera Ɛsitɛɛ u maa nùn gɔra Maadose win mi. 11U nɛɛ, sina bokon sɔm kowobu kpuro ka bwese ni nu wãa tem mini, nu yɛ̃ ma wi u da sina bokon mi, u kun yɛ̃ro soka, ba ra yɛ̃ro gowa nge mɛ wooda ya gerua. Adama sina bokon tii ù n nùn win sina dɛki wuragia tĩi, ba ǹ nùn goomɔ. Wee tɛ̃, nɛn sɔ̃ɔ tɛna mi, ye sina boko kun ka man sokure. 12Sanam mɛ ba ka Ɛsitɛɛn gari yi Maadose daawa, 13yera Maadose u gɔra bu nùn sɔ̃ bu nɛɛ, u kun tamaa wi turowa u koo kisira Yuuban wahala yen di yèn sɔ̃ u wãa sina kpaarɔ. 14Ù n mari, u ǹ win tɔmbu somi tɛ̃, ba koo somiru wa gam di, kpa bu faaba wa. Adama wi, ka win tundon yɛnugibu, ba koo gbiwa. Sɔrɔkudo yen sɔ̃na ba nùn kua sina bokon kurɔ. 15Yera Ɛsitɛɛ u maa gɔra Maadosen mi u nɛɛ, 16u doo u Yuuba kpuro mɛnna be ba wãa Susi mi, kpa bu nɔɔ bɔke win sɔ̃, sɔ̃ɔ sɔɔ ita ka wɔ̃kuru ita, bu ku dĩanu di, bu ku maa nim nɔ. Wi ka maa win sɔm kowobu ba koo maa ko mɛsum. Yen biru, kpa u da sina bokon mi, baa mɛ wooda ya mɛ yina. Ù n koo gbin na, kpa u gbi. 17Yera Maadose u da u kua kpuro nge mɛ Ɛsitɛɛ u nùn sɔ̃ɔwa u ko.

will be added

X\