Waasu kowo 9

1Geema, na tii wɛ̃, na ye kpuron kaso kua, ma na wa gemgibu ka bwisigibu ka ben sɔma wãawa Gusunɔn nɔmuɔ. Mɛya maa kĩru ka tusiru. Adama tɔnu kun yɛ̃ ye ya koo nùn deema. 2Gemgii ka tɔn kɔ̃so ka tɔn geo wi u dɛɛre ka wi u kun dɛɛre ka wi u yãkuru mɔ̀ ka wi u kun yãkuru mɔ̀ ka wi u kun toraru mɔ ka wi u toraru mɔ ka wi u nɔɔ mwɛɛru mɔ̀ ka sere wi u nɔɔ mwɛɛru nasie, gãa teena nu ra be kpuro deemɛ. 3Ye ya kooramɔ handunia ye sɔɔ, gãa teenu wãa ni nu ǹ sãa dee dee. Niya, kɔkɔrɔ tia ba mɔ. Ben gɔ̃rusɔ, nuku kɔ̃suru ka wiira gariya yi ra n yiba ben wãarun tɔ̃ru kpuro sɔɔ. Amɛn biru, gɔribun wãa yerɔwa ba dɔɔ. 4Be ba wasi, ba yĩiyɔbu mɔ. Bɔ̃ɔ wasu ga gbee sunɔn goru kere. 5Be ba wasi, ba yɛ̃ ma ba koo gbi. Adama be ba gu, ba ǹ gãanu yɛ̃. Ba ǹ maa kɔsiaru wasi domi ba bu duariwa mi. 6Ben kĩru ka ben tusiru ka ben binɛ, ye kpuro ya kpawa mi. Ba ǹ maa baa gaa mɔ handunia ye sɔɔ. 7Yen sɔ̃, a doo a di a nɔ ka nuku dobu. Domi sɔmbu te a kua, ta Gusunɔ wɛ̃re. 8A de a n da n tɔ̃ɔ baka yãnu sebua baadomma kpa a ku duari a tii turare yɛ̃ka. 9A de a ka wunɛn kurɔ wi a kĩ nuku dobu ko wunɛn wãarun tɔ̃ru sɔɔ te Gusunɔ u nun wɛ̃ te ta ra doonɛ mi nge woo. Domi yera ya ko n sãa nuku doo bi kaa n mɔ wunɛn sɔmburu sɔɔ handunia ye sɔɔ. 10Sɔmbu te a gesi wa kpuro, a tu koowo. Domi sɔmburu ka bwisikunu ka yɛ̃ru ka bwisi, yen gaa sari gɔribun wãa yerɔ mi a dɔɔ. 11Na maa wa handunia ye sɔɔ, n ǹ mɔ be ba duka mɔ tɔnawa ba ra garasa di baadomma. N ǹ maa mɔ tabu durɔ damgibu tɔnawa ba ra tabu di baadomma. Mɛya n ǹ maa mɔ bwisigiba ba ra dĩanu wa ba kun wahala kue. N ǹ maa mɔ laakarigibu tɔnawa ba ra ko gobigibu baadomma. N ǹ maa yɛ̃rugibu tɔna tɔmbu ba ra bɛɛrɛ wɛ̃. Domi be kpurowa kɔ̃sa ka gea ya ra deemɛ. 12Nge mɛ swɛ̃ɛ yi ku ra n yɛ̃ saa ye ba koo yi mwa subaru sɔɔ ka yãakororu, ǹ kun mɛ nge mɛ gunɔ ga ku ra n yɛ̃ saa ye ba koo ge mwa ka taa, nge mɛya tɔnu ku ra n win gɔɔn kɔba yɛ̃. Nɔni swãaru ta ra tɔnun bii deemɛ subaru sɔɔ nge mɛ ba ra yɛɛ yi mwɛɛri. 13Na maa gãanu wa bwisin swaa sɔɔ ni na tamaa nu sãa gãa girinu. 14Wuu gaga wãa ga ǹ tɔmbu dabi. Yera sina boko goo u seema u gu tabu wɔri. Ma u sansani kpĩ u ka gu sikerena. 15Wuu ge sɔɔ, bwisigii goo wãa. Adama bwɛ̃ɛbwɛ̃ɛwa u sãa. Durɔ wi, u koo raa kpĩ u wuu ge faaba ko saa sina boko win nɔman di. Adama goo kun nùn yaaye win bwɛ̃ɛbwɛ̃ɛ ten sɔ̃. 16Nɛn mi, bwisi yi kere dam. Adama bwisigii ù n sãa bwɛ̃ɛbwɛ̃ɛ, tɔmba ra nùn gɛmwa kpa bu yina bu ka win bwisi kɛ̃ru sɔmburu ko. 17Adama ba n yɛ̃ ma bwisigiin gari yi ba swaa daki tɛɛru yi kere wi u gbãramɔ u ka gari bakasu kpare. 18Bwisi yi maa tabu yãnu kere. Adama toro u ra gea sankuwa.

will be added

X\