Waasu kowo 8

1Wara u sãa bwisigii kpa u gari yini tubusia yi yi nɛɛ, tɔnun bwisi yi ra win wuswaa dɛɛrasiewa kpa ya kun maa burisinɛ. 2A sina boko mɛm nɔɔwɔ nɔɔ mwɛɛ te a Gusunɔ kuan sɔ̃. 3A ku sɛnda a ka nùn duka suuri. A ku maa yɔ̃rari a kɔ̃sa ko. Domi u koo kpĩ u ko ye u kĩ 4yèn sɔ̃ win gari yi dam mɔ. Goo sari wi u koo kpĩ u nùn bikia u nɛɛ, mba u mɔ̀ mi. 5Wi u ra woodaba mɛm nɔɔwɛ, u ku ra kɔ̃sa wa. Bwisigii u siribun saa yɛ̃. 6Domi gãanu baanire nu nin saa ka nin siribu mɔ. Wahala gaa wãa ye ya tɔnu wãasi, 7yera u ku ra n yɛ̃ ye ya koo nùn deema. U ku ra n maa yɛ̃ wi u koo nùn sɔ̃ dɔma te ya koo nùn deema. 8Tɔnu kun dam mɔ u n ka win hunde nɛni. Mɛya u ǹ maa dam mɔ u ka tii wɔra win gɔɔn tɔ̃ru. U ǹ yakiarɔ gɔɔn nɔman di. Mɛya nuku kɔ̃surugiin nuku kɔ̃suru ta ǹ nùn yaramɔ. 9Na nɛn tii wɛ̃, na mɛɛra sãa sãa ye tɔnu u mɔ̀ kpuro handunia sɔɔ. Na wa ma u ra win winsim taarewa u nùn kɔ̃sa kua. 10Na wa ba tɔn kɔ̃sobu sikua ba wãa ba wɛ̃re. Be ba maa gea kua, ba ka sãa yeru tonda, ma ba ben gari duari wuu sɔɔ. Yeni kpuro ya tubum sɛ̃. 11Domi ba ku ra yande tɔn kɔ̃so be siri mii mii. Yen sɔ̃na tɔmbu ba ra n kĩ ba n kɔ̃sa mɔ̀ ba n dɔɔ. 12Tɔn kɔ̃so u ra torewa too, ka mɛ, kpa win wãaru tu dɛnya. Adama ye na yɛ̃, yera wi u Gusunɔ nasie, wiya u doo nɔɔru mɔ. 13Tɔn kɔ̃so kun doo nɔɔru wasi. Win wãara kun dɛnyamɔ tu saaru kera. Domi u ǹ Yinni Gusunɔ nasie. 14Gãanu wãa ni nu kooramɔ handunia ye sɔɔ ma nu tubum sɛ̃. Niya, ye ya koo tɔn kɔ̃so deema yera ya ra maa gemgii deemɛ. Ye ya koo maa gemgii deema, yera ya ra maa tɔn kɔ̃so deemɛ. Yenin tii ya tubum sɛ̃. 15Yen sɔ̃na na nuku dobu wɔlle suamɔ. Domi handunia ye sɔɔ, tɔnu kun gãa geenu wasi ma n kun mɔ u di u nɔ kpa u yɛ̃ɛri. Yera ya ko n sãa win sɔmburun are win wãarun tɔ̃ru kpuro sɔɔ te Gusunɔ u nùn bura handunia ye sɔɔ. 16Sanam mɛ na tii wɛ̃ ka nɛn gɔ̃ru kpuro n ka bwisin saria gia, kpa n wa ye n kooramɔ handunia ye sɔɔ, na wa baa mɛ tɔmba ku ra dweeye sɔ̃ɔ sɔɔ ka wɔ̃kuru, ba ǹ kpɛ̃ bu tubu ye Gusunɔ u mɔ̀ kpuro handunia sɔɔ. 17Na sɔma kpuro wa ye Gusunɔ u kua. Na wa ma tɔnu kun kpɛ̃ u tubu ye ya kooramɔ handunia ye sɔɔ. Baa mam ye tɔnu u kasu ka hania baka, u ǹ kpɛ̃ u ye wa. Baa bwisigii, ù n kĩ u n ye yɛ̃, u ǹ kpɛ̃ u ye tubu.

will be added

X\