Waasu kowo 7

1Yĩsi geeru ta turare nubu durorugia kere. Tɔnun gɔɔn tɔ̃ru ta win marubugiru kere. 2N buram bo a da yɛnu mi ba gɔɔ sɔ̃ ye kaa ka da yɛnu mi ba tɔ̃ɔ bakaru mɔ̀. Domi gɔɔwa u sãa tɔnun wãarun nɔru. Mɛya wi u wasi, u koo yaaya ma gɔɔ wee. 3Nuku sankiranu nu yɛ̃ɛsu kere. Domi baa tɔnun wuswaa yà n burisinɛ, ka mɛ, u koo kpĩ u n bɔri yɛndu mɔ gɔ̃ruɔ. 4Bwisigiin gɔ̃ru ga ra n woowa yɛnu mi ba gɔɔ sɔ̃. Adama gari bɔkɔn gɔ̃ru ga ra n woowa yɛnu mi ba nuku dobu mɔ̀. 5N buram bo a bwisigiin gerusibu swaa daki ye kaa ka gari bɔkɔn womusu swaa daki. 6Domi gari bɔkɔn yɛ̃ɛsu sãawa nge gãa ni nu kuramɔ dɔ̃ɔ sɔɔ. Ya maa sãa kam dirum. 7Dam dɔrebu bu ra bwisigii gɔsiewa gari bɔkɔ. Kɛ̃ru ta ra maa tɔnun gɔ̃ru sĩiyɛwa. 8Gãanun kpeeru ta buram bo n kere nin torubu. Suurugii u maa tii suo kere. 9A ku de wunɛn mɔru ya n da fuuku se. Domi gari bɔkɔn miya mɔru ya ra n wãa. 10A ku gere a nɛɛ, mban sɔ̃na yellu ta tɛ̃ dobu kere. Yeni ya ǹ sãa bwisigiin bikiabu. 11Bwisi yi sãawa tubi gea, yi mam tubi kere tɔmbu kpuron mi. 12Yi ra tɔnu kɔ̃suwa nge mɛ gobi yi ra tɔnu kɔ̃su. Adama yi arufaani mɔ n kere gobi. Yi ra de wi u yi mɔ u n wãa wãaru sɔɔ. 13A Gusunɔn nɔman sɔma mɛɛrio. Ye u dera ya sikire, wara u koo kpĩ u ye dɛmia. 14Doo nɔɔrun saa sɔɔ, a nuku dobu koowo. Wahalan saa sɔɔ, kpa a bwisiku ma Gusunɔwa u tɔ̃ɔ ni kpuro kua, kpa tɔnu u ku ka gia ye ya koo koora win gɔɔn biru. 15Ye na wa nɛn wãarun tɔ̃ru sɔɔ n tubum sɛ̃, yera gemgii u ra gbi win gem sɔɔ kpa tɔn kɔ̃son wãaru tu dɛnya win nuku kɔ̃suru sɔɔ. 16Ǹ n mɛn na, a ku tii garisi gemgii. A ku maa sɔ̃ɔsi ma wuna a bwisi bo. Mban sɔ̃na kaa tii kam ko sɛkum. 17A ku tii sure kɔ̃sa sɔɔ, a ku maa wɔri gari baka kookoosu sɔɔ. Mban sɔ̃na kaa de a gbi tumaru. 18Ye n weenɛ a n yaaye kpa a ku ye atafiiru ko, yera wi u Gusunɔ nasie, u ra yariwa kari baayeren di. 19Bwisi yi ra bwisigii dam wɛ̃wa n kere kparobu wɔkuru be ba wãa wuu teu sɔɔ. 20Geema, handunia ye sɔɔ, goo sari wi u gea mɔ̀ kpa u kun toramɔ. 21A ku gari kpuro dasabu doke yi tɔmba gerumɔ kpa a ku ka nɔ wunɛn sɔm kowo u wunɛn kɔ̃sa gerua. 22Domi wunɛn gɔ̃ru ga koo nun sɔ̃ ma wunɛn tii a gabu bɔ̃rusire. 23Na ye kpuro wɛ̃ɛra ka bwisi ma na nɛɛ, kon ko bwisigii. Adama na ǹ bwisi yi wa. Yi ka man tondawa. 24Ye n toma ka ye ya duku, wara u koo ye naa turi. 25Na kookari kua na tii doke n ka bwisi ka yɛ̃ru ka nuku kɔ̃surun kookoosu ka gari bakarun kookoosun saria gia. 26Tɔn kurɔ wìn gɔ̃ru ga sãa nge yina, ma win nɔma ya sãa nge taa u gɔɔ sɛ̃sɔ kere. Adama tɔn durɔ wìn daa ya Gusunɔ wɛ̃re, u ra kurɔ wi kisirariwa. Durumgiiwa u ra wɔri kurɔ win nɔmaɔ. 27Ye nɛ waasu kowo na wa ye na gãanu kpuro wɛ̃ɛra tia tia n ka nin saria gia, yera, 28na tɔn durɔbu nɔrɔbu (1.000) sɔɔ turo wa wi ba koo bɛɛrɛ wɛ̃. Adama tɔn kurɔbu kpuro sɔɔ, baa turo na ǹ wa. N deema na kasu n tɛ, adama na ǹ wa. 29Ye na tuba mi sɔɔ, yera Gusunɔ u tɔmbu kuawa ba sãa dee dee. Adama ben tiiwa ba ben wãaru sɛ̃siasia.

will be added

X\