Waasu kowo 6

1Na maa kɔ̃sa gaa wa ye ya dabi handunia ye sɔɔ. 2Yera goo wi Gusunɔ u ra dukia baka ka bɛɛrɛ wɛ̃. U ku ra n gãanu bie win wãaru sɔɔ. Adama Gusunɔ ku ra de u ye dendi. Tɔn tukowa u ra ye dendi. Yeni ya tubum sɛ̃. Ya maa sãa kɔ̃sa baka. 3Mɛya goo u ra bibu wunɔbu (100) ma, kpa u tɛ u ko wɔ̃ɔ dabinu kpa doo nɔɔru ta kun nùn tura win wãaru sɔɔ, kpa u kun maa siki wɔru wa mi ba koo nùn sike. Na gerumɔ ma bii wi ba mara win suru kun yiba, u nùn nuku dobu kere. 4Domi ba bii wi marawa u ǹ gãanu kue. Yam wɔ̃kuru sɔɔra u doona. Mɛya goo kun maa nùn yaayamɔ. 5U sãawa wi u kun sɔ̃ɔ waare, u ǹ maa nùn yɛ̃. Adama ka mɛ, u wɛ̃rabu mɔ n kere durɔ wi u bibu wunɔbu (100) mara mi. 6Baa durɔ wi, ù n daa wãa sere wɔ̃ɔ nɔrɔbun suba yiru (2.000), ma u kun doo nɔɔru wa, ye kpuro tia. 7Tɔnun sɔmburu kpuro, nɔɔ sɔɔra ta ra de. Ka mɛ, win binɛ ya ku ra kpe. 8Mba bwisigii u ka gari bɔkɔ kere. Bwɛ̃ɛbwɛ̃ɛ wi u yɛ̃ nge mɛ u koo tii kpara tɔmbun suunu sɔɔ, mba u ka bu kere. 9Ye a wa a nɛni ya kere ye a binɛ sãa. Domi ye kpuro ya tubum sɛ̃. Ya sãawa nge wi u kĩ u woo kpara. 10Ye ya wãa saa yellun di, ya yĩsiru mɔ kɔ. Sa maa yɛ̃ ma tɔnu u ǹ kpɛ̃ u ka wi u nùn dam kere sikirina. 11Gari dabira ku ra n asansi mɔ. Arufaani yerà tɔnu u ra n mɔ ye sɔɔ. 12Wara yɛ̃ ye ya sãa gãa geenu tɔnun sɔ̃ win wãaru sɔɔ te ta ra doonɛ mi nge saaru. Wara u koo kpĩ u nùn sɔ̃ ye ya koo na win gɔɔn biru.

will be added

X\