Waasu kowo 4

1Na dam dɔrebu kpuro laakari kua handunia sɔɔ. Ye na wa wee. Be ba dam dɔremɔ ba ra n wuri mɔ̀wa. Goo ku ra maa bu somiru nɛ. Domi be ba bu dam dɔremɔ mi, bera ba dam bo. 2Nɛn nɔni sɔɔ, be ba gu, ba doo nɔɔru mɔ n kere be ba wasi. 3Wi ba ǹ gina mara, u doo nɔɔru mɔ n kere wi ba mara, domi u ǹ maa handunia yen dam dɔrebu wa. 4Na wa ma sɔma ye tɔmba mɔ̀ kpuro, ka hania ye ba dokemɔ ye sɔɔ kpuro, nisinun sɔ̃na bu wa bu ka ben winsim kera. Adama na wa ma ye kpuro ya tubum sɛ̃. Ya sãawa nge wi u kĩ u woo kpara. 5Gari bɔkɔ wi u ku ra sɔmburu ko, gɔ̃ɔra ta koo nùn go. 6Adama n buram bo a n fiiko mɔ kpa a wɛ̃ra ye kaa ka sɔmburu ko too te ta ǹ arufaani gaa mɔ. 7Na maa gãanu wa ni nu tubum sɛ̃ handunia yè sɔɔ. 8Niya, tɔnu wi u wãa wi turo. U ǹ bɔrɔ mɔ, u ǹ dusi mɔ, u ǹ maa bii goo mɔ. Ma win sɔmburu ta ǹ sere nɔru mɔ. Dukia ya ku ra maa nùn turi baa mɛ u ra n tii bikiamɔ u n mɔ̀, wara na sɔmburu kuammɛ na ka tii doo nɔɔru yinarimɔ. Na wa ma ye kpuro ya tubum sɛ̃. Ya ǹ maa nuku dobu mɔ. 9Tɔmbu yiru bà n wãasinɛ ba sɔmburu mɔ̀ sannu, ba tɔn turo kere, domi ben sɔmburun are yi kpã. 10Turo ù n wɔruma, turo wi u tie u koo nùn seeya. Adama wɔnwɔndowa wi u wãa wi turo ma u wɔruma u ǹ yiruse mɔ wi u koo nùn seeya. 11Tɔmbu yiru bà n kpĩ sannu, ba ǹ wooru wasi. Adama wi u kpĩ wi turo, amɔna u koo ka yam susuru wa. 12Wi u tɔn turo dam kere, tɔmbu yiru ba maa nùn dam kere. Wɛ̃ɛ siiri ita yi ku ra fuuku kare. 13Bii aluwaasi wi u sãa bwɛ̃ɛbwɛ̃ɛ, ma u bwisi mɔ u sunɔ tɔkɔ gari bɔkɔ kere ge ga ku ra goon gari wure. 14Domi bii wi, u koo kpĩ u yarima pirisɔm di u ka bandu di baa bà n nùn mara bwɛ̃ɛbwɛ̃ɛ. 15Handunia ye sɔɔ, na wa mi tɔmba bii aluwaasi sikerenɛ wi u koo bandu di goon ayerɔ. 16Tɔn be, ba ǹ geeru mɔ bè sɔɔ u sãa wirugii mi. Adama bii be ba koo marura amɛn biru, ba ǹ ko n nùn kĩ. Ma na wa ye kpuro ya tubum sɛ̃. Ya sãawa nge wi u kĩ u woo kpara. 17A de a du Yinni Gusunɔn sãa yerɔ ka laakari kpa a susi a swaa daki ye kaa ka yãkunu ko nge gari bakasu. Domi ba ǹ yɛ̃ ma kɔ̃sa ba mɔ̀.

will be added

X\