Waasu kowo 3

1Handunia ye sɔɔ, gãanu baanire ka nin saa. Tara mi, saa baayere ka yen saa. 2Marubu ka bin saa, gɔɔ maa ka win saa. Duurubu ka bin saa, wukabu maa ka bin saa. 3Goberu ka ten saa, bɛkiabu maa ka bin saa. Kɔsukubu ka bin saa, bana maa ka yen saa. 4Swĩi ka yin saa, yɛ̃ɛsu maa ka sin saa. Weeweenu ka nin saa, yaabu maa ka bin saa. 5Kɔ̃ɔ mɛnnabu ka bin saa, kɔ̃ɔ mɛnnabun deribu ka bin saa. Bɔkasinaa ka yen saa, bɔkasinaan deribu maa ka bin saa. 6Gãanun kaso ka gen saa, nin kɔ̃ɔrabu ka maa bin saa. Gãanun yiibu ka bin saa, nin kɔ̃ɔbu maa ka bin saa. 7Gɛ̃ɛkubu ka bin saa, yina maa ka yen saa. Maribu ka bin saa, gari gerubu maa ka bin saa. 8Kĩanaa ka yen saa, tusinaa maa ka yen saa. Tabu ka bin saa, bɔri yɛndu maa ka ten saa. 9Arufaani yerà tɔnu u ra wa win sɔmburu sɔɔ. 10Na wa sɔma ye Gusunɔ u ra tɔnu sure. 11Yinni Gusunɔ u ra gãanu kpuro kowa nin saa sɔɔ nu n wã. U mam doke tɔnun bwisikunu sɔɔ ma gãanu wãa ni nu ku ra kpe, baa mɛ tɔnu kun kpɛ̃ u tubu sɔma ye Gusunɔ u mɔ̀ saa toren di sere ka handunian kpeerɔ. 12Na tuba ma gãanu sari ni nu wã ma kun mɔ tɔnu u nuku dobu ko kpa u wãa geeru di win wãarun tɔ̃ru kpuro sɔɔ. 13Adama tɔnu ù n waamɔ u dimɔ u nɔrumɔ ma u nuku dobu mɔ win sɔman aren sɔ̃, ye, ya sãawa Gusunɔn kɛ̃ru. 14Na gia ma ye Gusunɔ u kua kpuro, ya koo tɛwa. Ba ǹ gãanu ganu sosimɔ ye sɔɔ, ba ǹ maa gãanu ganu kawamɔ ye sɔɔ. Nge mɛya Gusunɔ u ra ko kpa tɔmbu bu ka nùn nasia. 15Ye ya wãa tɛ̃, ka ye ya ko n wãa sia, ya raa wãa kɔ. Gusunɔ u ra dewa ye kpuro yu maa wure ya n kooramɔ. 16Yen biru, na wa siri gbaburɔ ma kɔ̃sa kowo u gemgii siribu di handunia ye sɔɔ. 17Ma na tii sɔ̃ɔwa na nɛɛ, Gusunɔ u koo gemgii ka tɔn kɔ̃so siri. Domi gãanu baanire ka nin saawa. Nge mɛya ba koo maa kookoosu baasire siri. 18Na maa tii sɔ̃ɔwa na nɛɛ, sɔ̃ɔ teeru, Gusunɔ u koo tɔmbun laakari mɛɛri kpa ben tii bu gia ma ba ǹ yɛɛ sanɔ kere. 19Domi tɔnun kɔkɔrɔ ka yɛɛgia ya sãawa tia. Be kpuro ba ra gbiwa. Saa ye sɔɔ, tɔnu u ǹ yɛɛ sanɔ kere. Yeni ya tubum sɛ̃. 20Gãanu kpuro nu dɔɔwa yam tem. Tua ba ka ni kpuro kua. Tua ye sɔɔra ni kpuro nu maa wurɔ. 21Wara koo kpĩ u nɛɛ, tɔnun hundewa ya ra yɔ wɔllɔ kpa yɛɛgia ya n wãa temɔ. 22Ye na wa n buram bo tɔnun sɔ̃, yera u nuku dobu ko ka win sɔmburun are. Yera u mɔ mi. Domi wara u koo maa de u nuku dobu ko ka ye ya wee win biru.

will be added

X\