1 Na tii sɔ̃ɔwa na nɛɛ, kon nuku dobu kasuwa. Kon dawa n dabura ye n sãa doo nɔɔru. Adama na deema ye kpuro ya tubum sɛ̃. 2 Ma na nɛɛ, yɛ̃ɛsu su sãawa gari bakaru, arufaani yerà nuku dobu bu maa mɔ. 3 Ma na gɔ̃ru doke na nɛɛ, kon tam nɔwa nge mɛ gari bakasu su ra ko. Adama ko na n ka tii nɛniwa. Domi na kĩwa n gia ye n buram bo tɔmbu bu ko ben wãaru sɔɔ. 4 Na sɔm bakanu kua. Na dia bana ma na resɛm dãa gbaanu kua. 5 Na tii kara kua ka maa dãa gbaanu. Ma na dãa marum bwese bweseka duura mi. 6 Na bwii gba yìn nim ba ko n da dãa ni yɛ̃ke. 7 Na yoo tɔn durɔbu ka tɔn kurɔbu dwa. Ma na ben bii be ba mara yoo te sɔɔ nɛni. Mɛya na maa kɛtɛ gɔ̃su ka yãa gɔ̃su mɔ n kere sinam be ba man gbiiye Yerusalɛmuɔ. 8 Na sii geesu ka wura gura ka sere sinambun arumani ka bera ka beran arumani. Ma na tii wom kowobu kasua tɔn durɔbu ka tɔn kurɔbu ka sere ye tɔn durɔ u ra kã. Yera kurɔ dabinu. 9 Ma na yĩsiru yara n kere sinam be ba man gbiiye Yerusalɛmuɔ. Ka mɛ, nɛn bwisi man wãasi. 10 Ye nɛn nɔni yi binɛ kua kpuro ka nuku doo bi nɛn gɔ̃ru ga kĩ, na ku ra yinɛ. Nɛn sɔmburu kpuro ta ra man nuku dobu wɛ̃. Nuku doo biya bu kua nɛn are. 11 Yen biru, na sɔma ye na kua kpuro mɛɛra ka wahala ye na kua ye sɔɔ. Ma na deema ye kpuro ya tubum sɛ̃. Ya sãawa nge wi u kĩ u woo kpara. Sɔma ye tɔnu u mɔ̀ u ku ra yen arufaani wa u di ka gem. 12 Ma na nɛn laakari wesia n ka wa arufaani ye ya wãa bwisi ka gari bakaru ka wiiraru sɔɔ. Wi u koo nɛ sina boko kɔsire ko, mba u koo ko ma n kun mɔ ye ya raa koore kɔ. 13 Na wa bwisi yi gari bakaru arufaani kere nge mɛ yam bururam mu yam wɔ̃kuru arufaani kere. 14 Bwisigii u ra n yɛ̃ mi u dɔɔ, adama gari bɔkɔ ga ra n babiwa yam wɔ̃kuru sɔɔ. Ka yen de, na yɛ̃ ma gãa teenu nu be kpuro mara. 15 Ma na tii sɔ̃ɔwa na nɛɛ, nɛ ka gari bɔkɔ, wãarun kɔkɔrɔ tia bɛsɛ kpuro sa mɔ. Ǹ n mɛn na, mban sɔ̃na na sãa bwisigii. Domi na wa ma yen tii ya tubum sɛ̃. 16 Bwisigiin bwisi kun gari bɔkɔn gari bakaru tɛɛbu keramɔ, domi saa fiiko sɔɔ, ba koo be kpuro duari. Bwisigii u koo gbiwa nge mɛ gari bɔkɔ u koo gbi. 17 Ma na wãaru tusa. Domi ye ya kooramɔ handunia ye sɔɔ, ya man bwɛ̃ra yara yèn sɔ̃ ye kpuro ya tubum sɛ̃. Ya sãawa nge wi u kĩ u woo kpara. 18 Na sɔmburu tusa te na kua handunia ye sɔɔ. Domi kon ten nuku dobu goo deriawa wi u koo man kɔsire ko. 19 Wara yɛ̃ yɛ̃ro wi, ù n ko n sãan na bwisigii ǹ kun mɛ gari bɔkɔ. Ka mɛ, wiya u koo nɛn sɔmbu ten arufaani di te na kua ka bwisi. Na wa ma ye kpuro ya tubum sɛ̃. 20 Ma ye kpuro sɔɔ, nɛn nuki sankira wahala ye na kuan sɔ̃. 21 Wee tɔnu u ra sɔmburu ko ka bwisi ka yɛ̃ru kpa tu nùn are marua. Adama sɔ̃ɔ teeru u ra tu goo deriewa wi u kun gãanu kue te sɔɔ. Anna a kɔ̃sa wa mi! Ya maa sãawa ye ya tubum sɛ̃. 22 Ǹ n mɛn na, arufaani yerà tɔnu u mɔ win sɔmbu te u tii kuammɛ sɔɔ handunia mini. 23 Domi ye u mɔ̀ win wãaru sɔɔ kpuro wahala ka bwisikuna ya ra ka nùn naawɛ. Baa ka wɔ̃kurɔ, win laakari ku ra n kpĩ. Yeniba kpuro ya tubum sɛ̃. 24 Gãanu ganu sari ni nu wã ma n kun mɔ tɔnu u di u nɔ, kpa u nuku dobu ko win sɔman aren sɔ̃. Adama na wa ma ye kpuro ya weewa Gusunɔn min di. 25 Goo sari wi u koo di u nuku dobu ko win sɔmburun sɔ̃ ma n kun mɔ ka Gusunɔn yɛ̃ru. 26 Domi wi u nùn wɛ̃rewa u ra bwisi ka yɛ̃ru ka nuku dobu wɛ̃. Adama u ra dewa tɔn kɔ̃so u arumani kasu u mɛnna wi u wi, Gusunɔ wɛ̃ren sɔ̃. Yenin tii ya maa tubum sɛ̃. Ya sãawa nge wi u kĩ u woo kpara.
