Waasu kowo 12

1Ǹ n mɛn na, a wunɛn taka kowo yaayo wunɛn aluwaasirun saa sɔɔ, nuku sankiranun tɔ̃ru tu sere na tè sɔɔ kaa nɛɛ, a ǹ maa wãaru kĩ. 2Saa ye sɔɔ, kaa n wãa yam wɔ̃kuru sɔɔ nge sanam mɛ suru ka sɔ̃ɔ ka kperi, ye kpuro ya tĩra ǹ kun mɛ nge sanam mɛ guru wiru ta wurama gura yà n na ya kpa. 3Yen tɔ̃ɔ te sɔɔ, kaa n sãawa nge yɛnun kɔ̃so wi u diirimɔ bɛrum sɔ̃ ǹ kun mɛ nge damgii wi u dam dwiiya ma u yãara tɔkɔrun sɔ̃ ǹ kun mɛ nge kurɔ be ba som nambu yɔ̃ra yèn sɔ̃ ba ǹ maa dabi ǹ kun mɛ nge kurɔ be ba kun kpɛ̃ bu maa yam wa saa fɛnɛntin di. 4Wunɛn wãaru ta ko n sãawa nge gambo ye ya kɛnua ǹ kun mɛ nge nɛɛru tèn wɔkinu dwiiya ǹ kun mɛ nge gunɔbu ge ga swĩi mari ǹ kun mɛ nge womu ge ba mari. 5Saa ye sɔɔ, kaa n bɛrum mɔ̀ à n gunguru yɔɔmɔ kpa a n wahala mɔ̀ à n sĩimɔ. Wunɛn seri yi koo burura nge dãa wɛ̃su gasu. A ǹ maa kpɛ̃ a yɔ̃ nge twee. Mɛya kpee yãnun nubura kun maa wunɛn binɛ seeyamɔ. Domi sɔ̃ɔ teeru baawure u koo da win wãa yee dãakirɔ kpa wuri yi nɔɔra baama swɛɛ sɔɔ. 6Saa yera wãaru ta koo kasira nge sii geesun yɔni ǹ kun mɛ tu kɔsira nge boo wuraguu ǹ kun mɛ nge bwãaru daarɔ, ǹ kun mɛ tu kasira nge dɔkɔ kaaru dɔkɔ sɔɔ 7kpa tɔnun tii u wura temɔ mìn di u yara kpa win hunde yu wura Gusunɔ wi u raa nùn ye wɛ̃n mi. 8Waasu kowo u nɛɛ, gãanu kpuro nu tubum sɛ̃, nu maa sãawa biti. 9Yen biru, waasu kowo u ǹ sãa bwisigii tɔna, u maa tɔmbu yɛ̃run keu sɔ̃ɔsi. U mɔn dabinu swaa daki ma u nu wɛ̃ɛra, u nu wunana doo dooka. 10U kookari kua ma u gari dori wa u yorua. Gari yi, yi sãawa gari gee. 11Bwisigiin gari yi sãawa nge yabiri yi yi ra tɔnun laakari yamiɛ. Mɛya yi maa sãa nge sɔretii yi yi yɛ̃ru gabe. Yi weewa Gusunɔn min di wi u sãa kparo geo. 12Nɛn bii, ye n tie, yera, a de yi nun bwisi kɛ̃. Bà n yin gari yorumɔ tirenu sɔɔ, tire ni, nu ǹ ko n geeru mɔ. Keu bakan kobu bu ra maa wasi wasirasiewa. 13Yen sɔ̃, su gari yi kpuron wii goberu swaa daki te ta nɛɛ, a Gusunɔ nasio kpa a win woodaba mɛm nɔɔwa. Yera, n weenɛ baawure u ko. 14Domi Gusunɔ u koo kookoosu kpuro siri ka mam si su beruan tii, geesu ka kɔ̃susu.

will be added

X\