Waasu kowo 11

1A nɔni yinuɔ a ka wunɛn dĩanu gabu bɔnu ko. Sɔ̃ɔ teeru kaa yen are wa. 2A nin sukum tɔmbu nɔɔba yiru ǹ kun mɛ tɔmbu nɔɔba ita bɔnu kuo, domi a ǹ yɛ̃ nɔni swãa te ta koo nun deema handunia ye sɔɔ. 3Guru wiru tà n ye, ta ra de gura yu nɛwa. Bera mi dãra wɔruma kpuro, bera miya ta ra n wãa. 4Wi u woo ka guran bɛrum mɔ̀, u ǹ dĩanu duurumɔ u sere mam nɛɛ, u koo gɛ̃. 5Nge mɛ tɔnu kun woon swaa yɛ̃, u ǹ maa yɛ̃ nge mɛ tɔnu u ra ka mɔnde tɔn kurɔn nukurɔ, nge mɛya tɔnu kun maa Gusunɔ wi u kpuro mɔ̀n sɔman asansi yɛ̃. 6A wunɛn dĩanu duuruo bururu, kpa a n wãasi mi ka yokaɔ. A ku nɛɛ, kaa wɛ̃ra. Domi a ǹ yɛ̃ yen ye ya koo gea ko. 7Yam bururam mu wã. Mɛya ya ra maa tɔnu dore ù n sɔ̃ɔ ka nɔnu wa. 8Tɔnu à n tɛ wãaru sɔɔ, a nuku dobu koowo yen sɔ̃, kpa a n yaaye ma nuku sankiranun tɔ̃nu wãa nu dabi. Adama ye ya kooramɔ kpuro ya tubum sɛ̃. 9Bii durɔbu, a yɛ̃ɛrio wunɛn aluwaasirun saa sɔɔ. A wunɛn wãaru dio nge mɛ wunɛn gɔ̃ru ga kĩ. Adama yeniba kpuron biru, a n yɛ̃ ma Gusunɔ u koo nun soku siri yerɔ. 10Yen sɔ̃, a nuku sankiranu wunɔ wunɛn gɔ̃run di kpa a kɔ̃san kobu suuri. Domi aluwaasiru ka ten dam mu ra doonɛwa nge woo.

will be added

X\