1 Sɔn si su gbiisi turare kowon gum sɔɔ, su ra gum mɛ sankuwa. Nge mɛya gari baka kookoosu baa sin fiiko su ra bwisi ka bɛɛrɛ kawe. 2 Bwisigiin gɔ̃ru ga ra n sãawa dee dee. Adama gari bɔkɔguu ga ku ra dee dee swĩi. 3 Gari bɔkɔ ù n sĩimɔ swaa sɔɔ, bwisi yi ra n nùn kɔmiɛwa kpa u n baawure sɔ̃ɔsimɔ ma u sãawa gari bɔkɔ. 4 Wunɛn yinni ù n ka nun mɔru seewa, a ku wunɛn sɔmburu deri. Domi tii nɛnubu bu ra tora dabinu gbarewa. 5 Na toraru garu wa handunia ye sɔɔ te ta wee kparobun min di. 6 Tera, ba ra gasɔ gari bakasu aye damginu wɛ̃, kpa bu tɔn bɛɛrɛgibu aye piiminu wɛ̃. 7 Mɛya, na wa yobu ba dumi sɔni ma sinambu ba ka naasu sĩimɔ nge yobu. 8 Wi u suura gbemɔ, wiya u koo kpĩ u wɔri ye sɔɔ. Wi u maa gbãraru suramɔ kpa waa yu nùn dɔm. 9 Wi u kpenu suamɔ, u koo mɛɛra wa. Wi u maa dãa bɛramɔ, u ko n wãawa kari sɔɔ. 10 Win gbãa yara yà kun nɔɔ do, ma u ǹ ye nɔɔ dɛ̃ɛre, tilasiwa u ka dãa ye kĩi ka dam bakam. Adama bwisiya yi ra de gãanu nu koora. 11 Wi u waa sabua, ma ya nùn dɔmmɔ, arufaani yerà u mɔ. 12 Bwisigiin gari yi ra n bɛɛrɛ mɔ. Adama gari bɔkɔn gari yi ra gu kam koosiewa. 13 U ra gari torewa ka gari bakaru kpa u yi wiru go ka wiira gari kɔ̃si. 14 U ra n gari saarimɔwa too. Adama tɔnu, a ku ra n yɛ̃ ye ya koo nùn deema. Goo maa sari wi u koo nun sɔ̃ ye ya koo koora wunɛn gɔɔn biru. 15 Gari bɔkɔ ga ra tii wasiraru dokewa sɔmburu baatere sɔɔ. Mɛya u ku ra maa kpĩ u da wuu sɔɔ. 16 Bɔ̃rurama tem mɛ̀ sɔɔ aluwaasi gari bɔkɔ u sãa sunɔ ma mɛn sina asakpɔbu ba ra n ben tiin nukurun gari mɔ̀ mɛ̀n nɔɔ yam sãra. 17 Doo nɔɔrugiba be ba sunɔ mɔ wi u yĩsiru yara, ma win sina asakpɔbu ba ra di dim saa sɔɔ bu ka dam wa, n ǹ mɔ bu ka tam nɔ. 18 Wi u yikuru mɔ, win dirun kpɛɛru ta ra kpunɛwa kpa ta n nim dumɔ. 19 Damgibu ba ra tɔ̃ɔ baka dim kowa bu ka nuku dobu ko. Tam mu ra bu nuku dobu wɛ̃ kpa gobi yi de bu kpuro wa. 20 A ku sina boko wĩi, baa wunɛn gɔ̃ruɔ. A ku maa yiikogii wĩi, baa asiri sɔɔ. À n kua mɛ, gunɔ ga koo wunɛn gari yi sua gu ka da gu nùn sɔ̃ ye a gerua.
