Waasu kowo 1

1Gari wee yi waasu kowo u gerua. U sãa Dafidin bii, u maa sãa sina boko Yerusalɛmuɔ. 2Wiya u nɛɛ, gãanu kpuro nu tubum sɛ̃. Ka gem ya sãawa biti. 3Arufaani yerà tɔnu u ra wa handunia mini win wahala ye u mɔ̀ kpuro sɔɔ. 4Gaba gbimɔ ma gaba kɔsire mɔ̀. Adama tem mu ko n wãawa mɛ sere ka baadommaɔ. 5Sɔ̃ɔ u yarimɔ, u dumɔ, u wuramɔ mìn di u yarimɔ. 6Woo gà n seewa, ga ra dewa sɔ̃ɔ yɛ̃san nɔm dwaru gia kpa gu wurama sɔ̃ɔ yɛ̃san nɔm geu gia. Swaa tia yera ga ra n swĩi mi. 7Daa bakanu kpurowa nu ra nin nim sure nim wɔ̃kuɔ. Adama nim wɔ̃ku ge, ga ku ra yibu. Swaa tia yera daa ni, nu ka nin nim mɛ suremɔ ge sɔɔ. 8Gãanu kpurowa nu sɔmburu mɔ̀ sere tɔnu kun kpɛ̃ u gãanu gere. Nɔni ku ra yam mɛɛribu wasire. Mɛya swasu ku ra maa gari nɔɔbu wasire. 9Ye ya raa wãa gĩa, yera ya ko n maa wãa sia. Ye ya raa koora gĩa, yera ya koo maa koora sia. Gãanu sari handunia yè sɔɔ ni nu sãa kpaanu. 10Goo ù n nɛɛ, gãa kpaanu wee, a n yɛ̃ ma gãa ni, nu raa wãa kɔ saa yellun di. 11Sa ku ra n yaaye ye ya bɛsɛn sikadoba deema yellu. Mɛya be sa maa gbiiye, ba ǹ yaayamɔ ye ya sun deema. 12Nɛ, waasu kowo, na kua Isireliban sunɔ Yerusalɛmuɔ. 13Ma na wɛ̃ɛra na kasu ka bwisi ye ya kooramɔ handunia mi. Ma na deema ya sãawa sɔm sɛ̃sɔgiru te Gusunɔ u dera tɔmba mɔ̀. 14Na wa ye ya kooramɔ handunia sɔɔ kpuro. Ma na deema ya tubum sɛ̃. Ya sãawa nge wi u kĩ u woo kpara. 15Domi ye ya sikire, ya ǹ dɛmiarɔ. Ye ya maa sari, ba ǹ kpɛ̃ bu ye gari. 16Yera na tii sɔ̃ɔwa na nɛɛ, wee na bwisi kasu, ma na yi wa n kere be ba man gbiiye bandu sɔɔ Yerusalɛmuɔ. Na bwisi ka yɛ̃ru wa too. 17Ma na tii wɛ̃ n ka gia ye n sãa bwisi ka ye n sãa gari bakaru. Adama na deema ye kpuro ya tubum sɛ̃ ya sãawa nge wi u kĩ u woo kpara. 18Domi wi u win bwisi sosimɔ, wahalawa u tii sosiammɛ. Wi u maa win yɛ̃ru sosimɔ, nuku sankirana u tii sosiammɛ.

will be added

X\