1 I wooda be mɛm nɔɔwɔ be na bɛɛ wɛ̃ɛmɔ gisɔ kpa bɛɛn hunde yu dakaa da, kpa i marura i dabia, kpa i du tem mɛ sɔɔ, mɛ Yinni Gusunɔ u nɔɔ mwɛɛru kua ka bɔ̃ri u nɛɛ, u koo bɛɛn baababa wɛ̃. 2 I yaayo sanum bakam mɛ Gusunɔ bɛsɛn Yinni u dera sa sĩa gbaburɔ sere wɔ̃ɔ weeru. Ma u bɛsɛn laakari mɛɛra, u dera sa nɔni sɔ̃ɔra su ka tii kawa kpa u ka bɛsɛn gɔ̃run bwisikunu gia, kpa u wa sà n ko win wooda mɛm nɔɔwan na, ǹ kun mɛ su ye yina. 3 U dera sa nɔni sɔ̃ɔra sa wahala kua gɔ̃ɔrun sɔ̃, su ka tii kawa ma u sun manna wɛ̃, dĩa ni bɛsɛ ka bɛsɛn baababa sa ǹ daa yɛ̃. Nge mɛya u ka sun sɔ̃ɔsi ma tɔnu kun ko n wãa dĩanu tɔnan sɔ̃ ma n kun mɔ wi, Gusunɔn gere kpuron sɔ̃. 4 Wɔ̃ɔ weeru ye sɔɔ, bɛsɛn yãnu kun kpeere, bɛsɛn naasu kun maa mɔsire. 5 I n yɛ̃ ma Gusunɔ bɛsɛn Yinni u sun nɔni dokewa nge mɛ tɔnu u ra win bii nɔni doke. 6 I Gusunɔ bɛsɛn Yinnin woodaba mɛm nɔɔwɔ i sĩ win swɛɛ sɔɔ, kpa i nùn nasia. 7 Gusunɔ bɛsɛn Yinni u koo bɛɛ duusia tem gem sɔɔ, mi nim tori ka yɛrusu ka bwii dabira wãa wɔwi sɔɔ ka guunɔ. 8 Alikama ka dobi ka dãa bii ni ba mɔ̀ resɛm ka figi ka gerenadi ya kpia tem mɛ sɔɔ ma mu olifin gum ka tim yiba. 9 Tem mɛ sɔɔ, i ko i dĩanu wa nu n kpã i di, i ǹ maa gãanu ganun yãaru mɔ̀. Mɛn kpenu nu ko n sii wɔ̃kusu mɔ, kpa mɛn guunun sɔɔwɔ sii ganda n wãa. 10 Sanam mɛ i dĩanu wa i di i deba, i Gusunɔ bɛsɛn Yinni siaro tem gem mɛ u bɛɛ wɛ̃n sɔ̃. 11 I n tii sɛ kpa i ku ra Gusunɔ bɛsɛn Yinni duari. I ku ra win woodaba ka win sɔ̃ɔsinu ka win yiirebu mɛm nɔɔbu yina be na bɛɛ wɛ̃ɛmɔ gisɔ. 12 I ko i dĩanu wa i di i debu kpa i dii geenu bani i n wãa ni sɔɔ. 13 Bɛɛn kɛtɛba ka bɛɛn yãanu ka bɛɛn bonu nu koo marura nu dabia kpa bɛɛn sii geesu ka bɛɛn wura ka bɛɛn arumani bwese bweseka ye i mɔ yu kuura. 14 Saa ye sɔɔ, i n tii sɛ kpa i ku ra tii sua i Gusunɔ bɛsɛn Yinni duari wi, wi u sun yarama Egibitin di, mi sa raa yoru dimɔ. 15 U dera sa sĩa gbabu baka nanumgiru sɔɔ mi wɛɛ dɛ̃ɛgii ka nii yi wãa, mi tem mu gbere, nim sari, ma u dera nim mu kokuma kperun di bɛsɛn sɔ̃. 16 U sun manna wɛ̃ gbaburu mi, sa di ye bɛsɛn baababa ba ǹ daa yɛ̃. Ma u dera sa nɔni sɔ̃ɔra su ka tii kawa kpa u ka bɛsɛn laakari mɛɛri u sere sun gea kua. 17 I n tii sɛ kpa i ku ra gere i nɛɛ, bɛɛn hania ka bɛɛn tiin dama i ka arumani ye wa. 18 I yaayo ma Gusunɔ bɛsɛn Yinniwa u bɛɛ dam wɛ̃ i ka arumani ye wa. Ma u arukawani ye sire ye u ka bɛsɛn baababa bɔkua ka bɔ̃ri nge mɛ i waamɔ gisɔ. 19 Ì kun Gusunɔ bɛsɛn Yinni mɛm nɔɔwɛ, ma i nùn duari, i da i bũnu yiirammɛ i sãamɔ, na bɛɛ sɔ̃ɔmɔ na siremɔ gisɔ, i ko i kpeerawa nge mɛ u bwese ni kpeerasia bɛsɛn wuswaaɔ.
