Sɔ̃ɔsiru 7

1Gusunɔ bɛsɛn Yinni u koo de i du tem mɛ i ko i mwa sɔɔ kpa u bwese dabi nini gira bɛɛn wuswaan di. Niya, Hɛtiba ka Girigasiba ka Amɔreba ka Kananiba ka Feresiba ka Hefiba ka Yebusiba. Nu sãawa mi bwesenu nɔɔba yiru ni nu bɛɛ dabiru kere ma nu bɛɛ dam kere. 2U koo bɛɛ bu nɔmu bɛria kpa i bu kamia i kpeerasia. I ku ra ka bu arukawani bɔke, i ku ra maa ben wɔnwɔndu ko. 3I ku ra ka bu nɔɔ tia ko i suana bɛɛ ka be. I ku ra bɛɛn bii wɔndiaba ben bii aluwaasiba kɛ̃ bu sua kurɔbu. I ku ra maa ben bii wɔndiaba kasu bɛɛn bii aluwaasiba bu sua kurɔbu. 4Domi ba koo de bɛɛn bibu bu gɛra Yinni Gusunɔn swaan di bu ben bũnu sã, kpa Yinni Gusunɔ u ka bɛɛ mɔru ko u bɛɛ kpeerasia mii mii. 5Wee nge mɛ i ko i bu kua. I ko i ben bũu turanu suririwa, kpa i ben bwãarokunu kɔsuku i dɔ̃ɔ mɛni. 6Domi i sãawa bwese te Gusunɔ bɛsɛn Yinni u wuna nɛnɛm handunian bwese ni nu tie sɔɔn di, kpa i n ka sãa win tɔmbu. 7N ǹ mɔ yèn sɔ̃ i bwesenu kpuro dabiru kere Yinni Gusunɔ u ka bɛɛ arukawani bɔkua. Bɛɛya i mam piiburu bo bwesenu kpuro sɔɔ. 8Adama Yinni Gusunɔ u bɛɛ kĩwa ma u kĩ u win nɔɔ mwɛɛru yibia te u bɛɛn baababa kua. Yen sɔ̃na u bɛɛ yarama ka win dam bakam Egibiti sunɔn yorun di. 9Yen sɔ̃, i de i n yɛ̃ ma Gusunɔ bɛsɛn Yinniwa u sãa Gusunɔ. U ra win arukawani nɛnɛ ka be ba win woodaba mɛm nɔɔwammɛ sere ka ben bibun bweserun nɔrɔm nɔrɔmwɔ (1.000). Be ba nùn kĩ, u ku ra bu tɔnu kandu kue. 10Adama u ra be ba nùn tusa ben kɔ̃sa kɔsiewa u bu kpeerasia yande. 11Yen sɔ̃, i win woodaba ka win yiirebu ka win sɔ̃ɔsinu mɛm nɔɔwɔ ni na bɛɛ wɛ̃ɛmɔ gisɔ, kpa i ka ye sɔmburu ko. 12Ì n wooda be swaa daki, ma i bu mɛm nɔɔwa, u ko n arukawani ye nɛniwa mam mam ye u ka bɛsɛn baababa bɔkua ka bɔ̃ri. 13U koo bɛɛ kĩa kpa u bɛɛ domaru kua u de i dabia. U koo bɛɛn bibu domaru kua ka dĩa ni i duura ka dĩa binnu ka dãa bii ni ba ra ka tam ko ka ni ba ra ka gum ko. U koo de bɛɛn naa gɔ̃su ka bɛɛn yãa gɔ̃su ka bɛɛn boo gɔ̃su su kuura tem mɛ sɔɔ, mɛ u nɔɔ mwɛɛru kua ka bɔ̃ri u nɛɛ, u koo bɛɛn baababa wɛ̃. 14U koo bɛɛ domaru kua n bwesenu kpuro kere. Bɛɛ sɔɔ, tɔn durɔ goo, ǹ kun mɛ tɔn kurɔ goo kun mɔ̀ wĩro. Mɛya bɛɛn yaa saberu gara kun maa gimare mɔ̀. 15Yinni Gusunɔ u koo de baranu nu ka bɛɛ tonda. I yɛ̃ bara kɔ̃su ni u raa Egibitigibu sure. U ǹ derimɔ ten garu tu bɛɛ deema. Adama be ba bɛɛ tusa, bera u koo nu sure. 16I ko i bwesenu kpuro kpeerasiawa mam mam ni Yinni Gusunɔ u bɛɛ nɔmu bɛria. I ku ra nin wɔnwɔndu ko, i ku ra maa nin bũnu sã. Domi bũu ni, nu ko n sãawa yina bɛɛn sɔ̃. 17Sɔrɔkudo i ko i gere bɛɛn gɔ̃ruɔ i nɛɛ, bwese ni, nu bɛɛ dam kere. Amɔna i ko i ko i ka nu gira. 18I ku nin bɛrum ko. I yaayo ye Gusunɔ bɛsɛn Yinni u Egibitigibu kpuro ka ben sunɔ kua. 19Bɛɛn nɔni yi wa nɔni swãa baka te u bu kpɛ̃ɛ ka sɔm maamaakigii ni u kua ka win dam bakam mɛ u sɔ̃ɔsi sanam mɛ u bɛɛ yarama tem mɛn di. Nge mɛya u koo maa bwese ni kpuro kua nìn bɛrum i mɔ mi. 20U koo nu susu bakanu sure sere be ba kisira ba kuku yenu kasu bu ka kpeera mam mam. 21I ku diiri bwese nin sɔ̃. Domi Gusunɔ bɛsɛn Yinni u ka bɛɛ wãa wi, wi u kpã ma u nanum mɔ. 22U koo bɛɛ bwese ni kpuro gira kpurɛ kpurɛ. I ǹ kpɛ̃ i nu kpeerasia mii mii gbeeku yɛɛ yi ku ka bɛɛ yibusin sɔ̃. 23Gusunɔ bɛsɛn Yinni wi, u koo bɛɛ bu nɔmu bɛria. U koo de bu duki su bɛɛn wuswaan di sere bu ka kpeera mam mam. 24U koo bɛɛ ben sinambu nɔmu bɛria kpa i de ben yĩsiru tu gbi handunia sɔɔ. Ben goo kun yɔ̃ramɔ bɛɛn wuswaaɔ. I ko i bu kpeerasiawa kpuro. 25I ko i ben bwãarokunu dɔ̃ɔ mɛniwa. I ku nin sii geesu ka nin wura ye ba nu sebusie binɛ ko i sua kpa yu ku raa ko bɛɛn yina. Domi ya sãawa disi wi, Gusunɔ bɛsɛn Yinnin mi. 26I ku ra bwãaroku nin bweseru duusia bɛɛn diaɔ. Ì n kua mɛ, i ko kam kowa ka ni sannu. I ko i nu bwɛ̃ra yariwa, i nu garisi disiginu. Domi nu koo kam kowa.

will be added

X\