Sɔ̃ɔsiru 5

1Mɔwisi u Isireliba kpuro sokusia ba mɛnna ma u bu sɔ̃ɔwa u nɛɛ, bɛɛ Isireliba i wooda ka yiirebu swaa dakio i nɔ bi na bɛɛ wɛ̃ɛmɔ gisɔ. I bu nɛnuɔ kpa i bu mɛm nɔɔwa mam mam. 2Gusunɔ bɛsɛn Yinni u ka sun arukawani bɔkua Horɛbun guurɔ. 3N ǹ bɛsɛn baababa tɔna u ka ye bɔkua, adama ka bɛsɛn tiiwa bɛsɛ be sa wãa sa wasi mini gisɔ. 4Yinni Gusunɔ u ka bɛɛ gari kua nɔni ka nɔni guuru wɔllɔ saa dɔ̃ɔ yara sɔɔn di. 5Saa ye sɔɔ, ma na yɔ̃ bɛɛ ka win suunu suunuka sɔɔ na ka bɛɛ tusiamɔ ye u gerumɔ, domi i ǹ yɔɔwe guu ten wɔllɔ yèn sɔ̃ i dɔ̃ɔ win bɛrum mɔ. U nɛɛ, 6wiya u sãa Gusunɔ bɛsɛn Yinni. Wiya u sun yarama Egibitin di mi sa raa wãa sa yoru dimɔ. 7U maa nɛɛ, sa ǹ ko n maa Yinni goo mɔ wi baasi. 8Su ku ra tii bwãaroku gagu kua ga n ka gãanu weenɛ wɔllɔ, ǹ kun mɛ temɔ, ǹ kun mɛ nim sɔɔ. 9Su ku ra yiira su nu sã. Domi wi, Gusunɔ bɛsɛn Yinni u sãawa nisinugii. U ra baababan durum mɔɔru mwɛ ben bibun mi, be ba nùn tusan suunu sɔɔ sere ka ben bibun bibɔ. 10Adama be ba nùn kĩ ma ba win woodaba mɛm nɔɔwammɛ u ra ben bibun bweserun nɔrɔm nɔrɔm (1.000) wɔnwɔndu kue. 11Su ku ra wi, Gusunɔ bɛsɛn Yinnin yĩsiru soku kam. Domi wi u win yĩsiru soka kam, u koo yɛ̃ro sɛɛyasia. 12Su tɔ̃ɔ wɛ̃rarugiru mɛm nɔɔwɔ su tu bɛɛrɛ wɛ̃ nge mɛ wi, Gusunɔ bɛsɛn Yinni u sun yiire. 13Sɔ̃ɔ nɔɔba tia sɔɔra sa ko n da bɛsɛn sɔma kpuro ko. 14Adama sɔ̃ɔ nɔɔba yiruseru ta sãawa Gusunɔ bɛsɛn Yinnin tɔ̃ru tè sɔɔ u wɛ̃ra. Yen sɔ̃, su ku ra sɔmburu garu ko bɛsɛ ka bɛsɛn bibu ka bɛsɛn sɔm kowobu ka bɛsɛn kɛtɛba ka bɛsɛn kɛtɛkunu, bɛsɛn yaa sabenu kpuro gesi, ka maa sɔɔ wi u wãa bɛsɛn yɛnuɔ. Bɛsɛ kpuro sa ko wɛ̃rawa. 15Su yaayo nge mɛ sa raa yoru dimɔ Egibitiɔ, ma wi, Gusunɔ bɛsɛn Yinni u sun yarama min di ka win dam bakam. Yen sɔ̃na u sun yiire su tɔ̃ɔ wɛ̃rarugii te mɛm nɔɔwa. 16Su bɛsɛn tundobu ka bɛsɛn mɛrobu bɛɛrɛ wɛ̃ɛyɔ nge mɛ wi, Gusunɔ bɛsɛn Yinni u sun yiire kpa bɛsɛn wãaru tu dakaa da kpa sa n bɔri yɛndu mɔ tem mɛ u sun wɛ̃ sɔɔ. 17Su ku ra tɔnu go. 18Su ku ra sakararu ko. 19Su ku ra gbɛni. 20Su ku ra goo gari mani. 21Su ku ra bɛsɛn tɔnusin kurɔ binɛ ko, ǹ kun mɛ win diru, ǹ kun mɛ win gberu, ǹ kun mɛ win sɔm kowo tɔn durɔ ǹ kun mɛ tɔn kurɔ, ǹ kun mɛ win kɛtɛ, ǹ kun mɛ win kɛtɛku, win gãanu kpuro gesi. 22Gari yiniwa Yinni Gusunɔ u nɔɔ sua guuru wɔllɔ u bɛsɛ win tɔmbu kpuro sɔ̃ɔwa dɔ̃ɔ yara sɔɔn di ka guru wii wuroru sɔɔn di ka guru wii sinumgirun di, u ǹ gãanu sosi. Yen biru, u ye yorua kpee bɛsi yiru sɔɔ u man wɛ̃. 23Sanam mɛ i Yinni Gusunɔn nɔɔ ge nua guru wii sinumgiru sɔɔn di, guuru wɔllɔ tèn mi dɔ̃ɔ u wãa, yera bɛɛn bwese kɛrin wirugibu ka bɛɛn guro gurobu ba na nɛ Mɔwisin mi. 24Ma ba nɛɛ, wee Gusunɔ bɛsɛn Yinni u bu win yiikon girima ka win kpãaru sɔ̃ɔsi. Ba win nɔɔ nua dɔ̃ɔ yara sɔɔn di. Gisɔ, ba wa ma Gusunɔ u ka tɔmbu gari kua ma ba wãa ba ǹ gu. 25Adama mban sɔ̃na ba koo de dɔ̃ɔ boko wi, u bu di kpa bu gbi. Domi bà n Gusunɔn nɔɔ nɔɔmɔ mɛ, ba koo gbi. 26Wara u Yinni Gusunɔ wi u ra n wãan gari nɔɔre dɔ̃ɔ yara sɔɔn di nge be, ma yɛ̃ro u wãa u ǹ gu. 27Yen sɔ̃, nɛ Mɔwisi, n susio Gusunɔ bɛsɛn Yinnin bɔkuɔ kpa n swaa daki ye u gerua. Yen biru, kpa n bu ye nɔɔsia. Ba koo ye nɔ, kpa bu ka ye sɔmburu ko. 28Ma Yinni Gusunɔ u nua ye ba man sɔ̃ɔwa. Ma u nɛɛ, ye ba gerua mi kpuro gari burɛya. 29Bà n koo raa kpĩ bu nùn ben gɔ̃ru wukia nge mɛ, bu ka nùn bɛɛrɛ wɛ̃ kpa bu win woodaba mɛm nɔɔwa, ba ko n daa bɔri yɛndu mɔ be ka ben bibun bweseru sere ka baadommaɔ. 30Yen sɔ̃ tɛ̃, u nɛɛ, n doo n bu sɔ̃ bu wuro ben kuu bekuruginɔ. 31Adama u nɛɛ, nɛ, n sinɔ ka wi, kpa u man woodaba ka sɔ̃ɔsinu ka yiirebu sɔ̃ ye kon bu wɛ̃ bu mɛm nɔɔwa tem mɛ u bu wɛ̃ɛmɔ sɔɔ. 32Ma Mɔwisi u maa bu sɔ̃ɔwa u nɛɛ, i wooda be kpuro mɛm nɔɔwɔ mam mam be Gusunɔ bɛsɛn Yinni u bɛɛ wɛ̃. I ku ra gam gɛra be sɔɔn di. 33I swaa ye swĩiyɔ mam mam kpa bɛɛn wãaru tu dakaa da kpa i n bɔri yɛndu mɔ tem mɛ wi, Gusunɔ bɛsɛn Yinni u koo bɛɛ wɛ̃ sɔɔ.

will be added

X\