Sɔ̃ɔsiru 33

1Mɔwisi Gusunɔn tɔnu u sere gbi, u Isireliba domaru kua, u nɛɛ, 2Yinni Gusunɔ u na Sinain guurun di nge dɔ̃ɔ wi u Seirin guuru wukiri, ma u win tɔmbu yam bururasia saa Paranin guurun di. Gusunɔn gɔradoba dabi dabira ta nùn yɔ̃sirima. Ma u wooda nɛni win nɔm geuɔ nge dɔ̃ɔ. 3Yinni Gusunɔ u Isireliba kĩ. U ra tɔmbu kpuro kɔ̃su be ba sãa wigibu, ba ra yiire win nuurɔ bu ka win sɔ̃ɔsiru wa. 4Nɛ, Mɔwisi, na bɛɛ wooda wɛ̃ ye ya sãa bɛɛ Yakɔbun bibun bweserun tubi ye ya kpuro kere. 5Yinni Gusunɔ u kua sina boko Isireliɔ sanam mɛ ben guro gurobu ka ben kparobu ba mɛnna ka sere maa ben bwese kɛri. 6Mɔwisi u den domaru torua u nɛɛ, Rubɛnin bwese kɛra yu dakaa da, yu ku raa gbi. Gusunɔ u de yen tɔmbu bu dabia. 7U maa gerua Yudan bwese kɛran sɔ̃ u nɛɛ, Yinni Gusunɔ, a swaa dakio a Yudan bwese kɛran sokuru nɔ. A de ba n nɔɔ tia sãa ka Isirelin bwese kɛri yi yi tie. A ye somiɔ yen yibɛrɛba bà n ye wɔrim wee. 8Lefin bwese kɛran sɔ̃ u nɛɛ, Yinni Gusunɔ, wuna a wunɛn sɔm kowobu Lefiba urimu ka tumimu nɔmu bɛria. A ben laakari mɛɛra Masaɔ, ma a bu siri Mɛriban bwian gari sɔɔ. 9Ba nun naanɛ kua n kere ben mɛro ka ben tundo ka ben wɔnɔbu ka sere ben bibu. Ba wunɛn woodaba mɛm nɔɔwa. Ma ba wunɛn arukawani ye yibia. 10Ba wunɛn tɔmbu wunɛn wooda sɔ̃ɔsi bu ka nun mɛm nɔɔwa. Ba ra yãku dɔ̃ɔ mwaararuginu ko kpa bu turare dɔ̃ɔ doke wunɛn yãku yerɔ. 11Yinni Gusunɔ, a ben bwese kɛra somiɔ bu ka dam ko. A ben ye ba mɔ̀ kpuro domaru kuo. A ben yibɛrɛban dam buo. A ku maa de bu se sere ka baadommaɔ. 12Bɛnyamɛɛn bwese kɛran sɔ̃ u nɛɛ, Bɛnyamɛɛn bwese kɛra ya sãawa ye Yinni Gusunɔ u kĩ. Maa ya wãa bɔri yɛndu sɔɔ win bɔkuɔ. U bu kɔ̃su baadomma. U maa wãa ben suunu sɔɔ. 13Yosɛfun bwese kɛran sɔ̃ u nɛɛ, Yinni Gusunɔ, a ben tem domaru kuo, kpa mu guran nim wa, ka maa nim mɛ mu koo yari tem sɔɔn di. 14A ben tem mɛ domaru kuo, kpa dĩanu nu se, kpa suru baawure ba n da n gɛ̃ɛru mɔ̀. 15A de dĩa geenu nu koora ben guunu kpuron wɔllɔ. 16A de tem mɛ, mu dukia yibu. Kpa wunɛ wi a gari gerua saa kiki bekusun din domaru tu du Yosɛfun bwese kɛra sɔɔ. Domi yen tɔmbu ba kua begibun wirugibu. 17Yosɛfun bwese kɛra ye, ya bɛɛrɛ mɔ. Ya dam mɔ nge kɛtɛ kinɛru. Yen dam mu sãawa nge gbeeku kɛtɛn kɔbin dam. Dam mɛya ya ra ka bwese tukunu so, kpa yu nu gira. Efaraimun tɔn dabira ta sãa nge kɔbi yin tia, ma Manasen tɔn dabira maa sãa nge kɔbi yin yiruse. 18Sabuloni ka Isakarin bwese kɛrin sɔ̃ u nɛɛ, Gusunɔ, a Sabulonin bwese kɛra kuurasio yen tenkurun sɔ̃ te ya mɔ̀ nim goorɔ. Kpa a de Isakarin bwese kɛra ya n wãa bɔri yɛndu sɔɔ yen kunɔ. 19Ba koo tɔmbu soku ben guunɔ kpa bu yãkunu ko sannu nge mɛ wooda ya gerua. Ben dukia ya koo nawa nim wɔ̃kun tenkurun di ka sere maa yani sɛɛrin di. 20Gadin bwese kɛran sɔ̃ u nɛɛ, bu Gusunɔ siaro wi u Gadin bwese kɛra batuma baka wɛ̃. Ya yen yibɛrɛba mara nge gbee sunɔ ge ga gen yaa mara gu kasuku saa wirun di sere ka naasɔ. 21Ya tii tem mɛ mu gea bo gɔsia. Ye wirugii u ra sue yera ya sua. Ya gbia Isireliba kpuron wuswaaɔ tabu sɔɔ. Ya Yinni Gusunɔn wooda ka win gere mɛm nɔɔwa. 22Danun bwese kɛran sɔ̃ u nɛɛ, Danun bwese kɛra ya sãawa nge gbee sunɔ kpɛmbu ge ga yɔ̃ɔma Basanin di. 23Nɛfitalin bwese kɛran sɔ̃ u nɛɛ, Nɛfitalin bwese kɛra ya Yinni Gusunɔn domaru yiba ma ya win durom wa. Yen tem mu ko n wãawa saa sɔ̃ɔ duu yerun di n ka da sɔ̃ɔ yɛ̃san nɔm dwarɔ. 24Asɛɛn bwese kɛran sɔ̃ u nɛɛ, Asɛɛn bwese kɛra yu domaru wa n kere bwese kɛri yi yi tie. Gusunɔ u de yen maabu bu ye kĩru sɔ̃ɔsi, kpa yen tem mu n olifin gum yiba too, 25kpa yen wusun gbãranun kɔnnɔsu su n sãa sisugisu ka sii gandugisu, kpa ya n dam mɔ yen wãarun tɔ̃ru kpuro sɔɔ. 26Yera Mɔwisi u kpam gerua u nɛɛ, bɛɛ Isireliba, i n yɛ̃ ma Yinni goo sari nge Gusunɔ. Wee u wɔllu sɔni u ka sisi bɛɛn mi ka win yiiko baka. Guru wira u dua u ka wee u bɛɛ somi. 27Wiya u sãa bɛɛn kuku yeru sere ka baadommaɔ. Saa yee yellun diya win nɔm damguu ga bɛɛ kɔ̃su. Ma u bɛɛ yibɛrɛba gira u nɛɛ, i bu kam koosio. 28Yen sɔ̃na bɛɛ Isireliba, Yakɔbun bweseru, i sɔ̃ bɔri yɛndu sɔɔ. I sɔ̃wa mi dĩa binnu ka resɛm ya ra koore too. Mɛya gura ya ra maa nɛ mi. 29Bɛɛ Isireliba, i sãawa doo nɔɔrugibu. I ǹ ka bweseru garu weenɛ. Domi i sãawa bwese te Yinni Gusunɔ u faaba kua. U sãawa nge bɛɛn tɛrɛru te ta bɛɛ kɔ̃su. U sãawa nge bɛɛn takobi ye ya bɛɛ nasara wɛ̃ɛmɔ. Bɛɛn yibɛrɛba ba koo na bu bɛɛ suuru kana kpa i ben tii suabu kpeerasia.

will be added

X\